Senesi

21 Neʼe tokagaʼi leva e Sehova ia Sala ohage pe ko tana ui, pea neʼe fakahoko e Sehova te fakapapau ʼae neʼe ina fai ʼo ʼuhiga mo Sala.+ 2 Koia, neʼe faitama+ leva ia Sala pea neʼe ina fanauʼi he foha ʼo Apalahamo ʼae neʼe kua matuʼa, ʼi te temi totonu pe ʼae neʼe fakaha age e te ʼAtua.+ 3 Neʼe fakahigoaʼi e Apalahamo tona foha, ʼae neʼe fanauʼi e Sala ko Isaake.+ 4 Pea neʼe silikosisioʼi* e Apalahamo tona foha ko Isaake ʼi tona valu ʼaho, ohage pe ko tona fakatotonu age e te ʼAtua.+ 5 Neʼe taʼu 100 ia Apalahamo ʼi te temi ʼae neʼe tupu ai tona foha ko Isaake. 6 Neʼe ui leva e Sala: “Kua au kata ʼi te fiafia ʼuhi ko te ʼAtua. Pea ko natou fuli ʼae ka logo ki ai, ʼe natou kakata fakatahi anai mo au.”* 7 Neʼe ina hoko atu: “Ko ai ʼae neʼe feala ke ina ui kia Apalahamo ʼe au fafaga anai he tamasiʼi? Kae koʼeni, kua au fanauʼi hona foha ʼi tona temi matuʼa.”

8 Neʼe lahilahi ake te tamasiʼi pea neʼe vaheʼi leva ia ia. Neʼe teuteuʼi leva e Apalahamo he kaitahi ʼi te ʼaho ʼae neʼe vaheʼi ai ia Isaake. 9 Kae neʼe tokagaʼi e Sala te vaʼi ʼo Isaake+ e te tama ʼa te fafine Esipito ko Akale,+ ʼae neʼe ina maʼu mo Apalahamo. 10 Koia neʼe ina ui ai kia Apalahamo: “Kapu te fafine kaugana ʼaia mo tana tama, koteʼuhi ʼe mole maʼu tofiʼa fakatahi anai te tama ʼa te fafine kaugana ʼaia mo taku tama ko Isaake!”+ 11 Kae neʼe mamahi ʼaupito te loto ʼo Apalahamo ʼi te ʼu palalau ʼaia ʼo ʼuhiga mo tona foha.+ 12 Neʼe ui leva e te ʼAtua kia Apalahamo: “ ʼAua naʼa mamahi tou loto ʼi te ʼu palalau ʼae neʼe fai e Sala ʼo ʼuhiga mo te tamasiʼi pea mo tau fafine kaugana. Fakalogo kia ia,* koteʼuhi ko natou ʼae ka fakahigoaʼi ko tou hakoga ʼe natou hifo anai mai ia Isaake.+ 13 Pea ʼe au fakaliliu anai te hakoga ʼo te tama ʼa te fafine kaugana+ ko he puleʼaga,+ he ʼe ko tou foha.”

14 Koia, neʼe ʼala uhuuhu ia Apalahamo pea neʼe ina toʼo he foʼi pane mo he ʼaiʼaga vai pea neʼe ina foaki age kia Akale. Neʼe ina hili te ʼu meʼa ʼaia ki te fuga ʼuma ʼo Akale, pea neʼe ina fekauʼi leva ke alu mo te tamasiʼi.+ Neʼe alu ai pea neʼe hehe ʼi te toafa ʼo Pele-sepa.+ 15 ʼI te kua ʼago ʼo te ʼaiʼaga vai, neʼe ina tuku ai leva te tamasiʼi ʼi he kiʼi lalo fuʼu ʼakau. 16 Pea neʼe alu ʼo nofo tokotahi, ʼo mamaʼo mai tana tamasiʼi, he neʼe ina ui: “ ʼE mole au fia sio moka mate taku tamasiʼi.” Koia, neʼe nofo mamaʼo ai ʼo tagi leʼo lahi.

17 Neʼe logo te ʼAtua ki te leʼo ʼo te tamasiʼi,+ pea neʼe pauʼi te ʼaselo ʼa te ʼAtua mai te lagi kia Akale, ʼo ina ui age ki ai:+ “Akale, he koʼe ʼe ke tagi? ʼAua naʼa ke mataku, koteʼuhi neʼe logo te ʼAtua ki te leʼo ʼo te tamasiʼi ʼi te faʼahi ʼae ʼe nofo ai. 18 Tuʼu ki ʼoluga, pea ke alu ʼo fakatuʼu ake te tamasiʼi mo ke puke maʼu tona nima, he ʼe au fakaliliu anai ia ia ko he puleʼaga lahi.”+ 19 Neʼe avahi leva e te ʼAtua ʼona mata pea neʼe sio ki he vai keli. Neʼe alu ai ʼo ʼuʼutu te ʼaiʼaga vai, pea neʼe ina ʼavage ki tana tamasiʼi ke inu. 20 Neʼe lahilahi ake te tamasiʼi+ pea neʼe nofo pe te ʼAtua mo ia. Neʼe maʼuli ʼi te toafa pea neʼe liliu ko he tagata fainahau. 21 Neʼe nofo ʼi te toafa ʼo Palani+ pea neʼe kumi e tana faʼe hona ʼohoana mai te fenua ʼo Esipito.

22 ʼI te temi ʼaia, neʼe ui e Apimeleke pea mo Pikoli, te pule ʼo tana foʼi kautau kia Apalahamo: “ ʼE nofo te ʼAtua mo koe ʼi te ʼu meʼa fuli ʼae ʼe ke fai.+ 23 Koia, ʼi te ʼaho nei, ke ke fakapapau mai ʼi heni, ia muʼa ʼo te ʼAtua, ʼe mole ke kakaʼi anai au, mo ʼaku fanau mo toku hologa, pea ʼe ke fakaha mai pe anai kia au mo te hahaʼi ʼo te fenua ʼae ʼe ke maʼuli ai, te ʼofa agatonu ʼae neʼe au fakaha atu kia koe.”+ 24 Pea neʼe tali e Apalahamo: “ ʼE au fakapapau atu.”

25 Kae neʼe meo leva ia Apalahamo kia Apimeleke ʼo ʼuhiga mo te vai keli ʼae neʼe toʼo fakamalohi e te hahaʼi faifekau ʼa Apimeleke.+ 26 Neʼe tali age e Apimeleke: “ ʼE mole au iloʼi pe ko ai ʼae neʼe ina fai te faʼahi ʼaia. Neʼe mole ke ui mai he meʼa, pea ko taku hoki logo ʼae ki ai ʼi te ʼaho nei.” 27 Pea neʼe toʼo e Apalahamo he ʼu ovi mo he ʼu pipi ʼo foaki kia Apimeleke, pea neʼe nā fai leva he fuakava. 28 ʼI te temi ʼae neʼe tuku keheʼi ai e Apalahamo he ʼu akeno fafine ʼe fitu mai te faga manu, 29 neʼe ui age e Apimeleke kia Apalahamo: “He koʼe neʼe ke tuku keheʼi te ʼu akeno fafine ʼaia ʼe fitu?” 30 Neʼe ina tali age: “ ʼE tonu ke ke tali te ʼu akeno fafine ʼaeni ʼe fitu ʼe au foaki atu, ohage ko he fakamoʼoni neʼe au keli ia te vai keli ʼaia.” 31 Koia neʼe ina fakahigoaʼi ai te koga meʼa ʼaia ko Pele-sepa,*+ koteʼuhi neʼe nā fai ʼi ai he fakapapau. 32 Neʼe nā fai ai he fuakava+ ʼi Pele-sepa. Pea neʼe toe liliu leva ia Apimeleke mo Pikoli, te pule ʼo tana foʼi kautau ki te fenua ʼo te kau Filisitini.+ 33 Hili ʼaia, neʼe to leva e Apalahamo he fuʼu tamalisi ʼi Pele-sepa, pea neʼe fetapa ʼi ai ki te huafa ʼo Sehova,+ te ʼAtua ʼae ʼe maʼuli ʼo heʼe gata.+ 34 Pea neʼe maʼuli ia Apalahamo* ʼi te fenua ʼo te kau Filisitini ʼi he temi loaloaga.*+