Te ʼu Gaue ʼa Te Kau Apositolo

27 Neʼe fai leva te tonu ʼae ke matou folau vaka ki Italia.+ Koia neʼe tuku ia Paulo mo ʼihi tagata pilisoni ki te pule solia neʼe higoa ko Suliusi, ʼo te foʼi solia ʼo Aukusito.* 2 Neʼe matou heheka ki te vaka neʼe haʼu mai Atalamite pea neʼe ʼamanaki folau ki te ʼu ʼuafu ʼo te potu fenua ʼo Asia, ʼo matou olo ai leva. Neʼe folau mo matou ia Alisitake,+ te tagata Masetonia mai Tesalonika. 3 ʼI te ʼaho ake neʼe matou tau ki Sitoni, pea neʼe agalelei ia Suliusi kia Paulo ʼo ina tuku ke alu ki ʼona kaumeʼa ke natou tokakaga kia ia.

4 Neʼe matou mavae leva, pea neʼe fakalaka tomatou vaka ʼo ovi ki te motu ko Sipele, ke puipui ai te vaka he neʼe fakatau matagi. 5 Neʼe matou folau ʼi te moana, ʼo fakalaka ʼi Silisia mo Pafilia pea matou tau leva ki Mila ʼi Lisia. 6 Neʼe maʼu ʼi ai e te pule solia te vaka neʼe haʼu mai Alesatelia ʼe folau ki Italia. Pea neʼe ina fakaheka matou ki ai. 7 Neʼe matou folau lolotoga ni ʼaho he neʼe alu mamalie ia te vaka, pea neʼe faigataʼa tamatou tau atu ki Kinito. ʼUhi ʼae neʼe fakatau matagi te vaka, koia neʼe matou fakalaka ai ʼi Salamone, ʼo folau ovi ki Kelete ke puipui ai matou mai te matagi. 8 Neʼe faigataʼa ʼaupito tamatou fakalaka ʼi ai, pea neʼe matou tau leva ki te koga meʼa neʼe higoa ko Taulaga Taulekaleka, ʼe tuʼu ovi ki te kolo ko Lasea.

9 Neʼe fualoa tamatou nonofo ʼi ai pea ʼi te temi ʼaia neʼe faigataʼa te faifolau ʼi te tai, koteʼuhi neʼe kua fakalaka te temi sesunio ʼo te ʼAho ʼo Te ʼu Faifakalelei.*+ Koia neʼe fai ai e Paulo he fakatokaga. 10 Neʼe ina ui kia natou: “ ʼU tagata, ʼe au sio ʼe mole hao anai te folau ʼaeni mo tuʼutamaki pea mo he ʼu maumau, ʼo mole gata pe ki te uta mo te vaka, kae ʼe toe feala foki ke tou mamate ai.” 11 Neʼe mole fakalogo te pule solia ki te ʼu palalau ʼa Paulo kae neʼe fakalogo ia ki te pailate pea mo te tagata ʼae ʼoʼona te vaka. 12 Mai tona aluʼaga ʼae neʼe mole lelei ke tau te vaka ʼi te ʼuafu lolotoga te temi momoko, neʼe manatu ai e te tokolahi ke natou heheka ki te vaka ʼo olo ʼo vakaʼi pe ʼe feala ke natou tau ki Fenisi ki te temi momoko. Neʼe ko te ʼuafu ʼi Kelete neʼe hagahaga ki te potu noleto esite pea mo te potu saute esite.

13 Neʼe natou manatu ʼe iku lelei anai tanatou fakatuʼutuʼu he neʼe kamata agi te kiʼi matagi mai te potu saute. Koia neʼe natou fusi leva te tau ʼo natou folau ovi ki te matafenua ʼo Kelete. 14 Kae neʼe mole fualoa, pea neʼe agi te toe matagi malohi neʼe higoa ko Elakilone.* 15 Neʼe mole kei feala ke matou fakatau ki te matagi malohi ʼaia, koia neʼe matou tuku leva ke matou tafea. 16 Neʼe matou olo leva ki te kiʼi motu neʼe higoa ko Kalauta ke puipui ai matou mai te matagi. Kae neʼe matou kinakina ʼi te taʼofi ʼo te vakapa* ʼae neʼe toho e te vaka. 17 ʼI tanatou ʼosi toho ake te vakapa ki te loto vaka, neʼe natou fakamaʼumaʼu ai te vaka ʼaki ni maea. Neʼe natou tuʼania naʼa mahaʼia te vaka ʼi te Sitela,* koia neʼe natou fakahifo te ʼu la pea natou tuku ke tafea. 18 ʼUhi ko te fueʼi e te afā ia te vaka, neʼe natou fakamaʼamaʼa ai ia te vaka ʼi te ʼaho ake. 19 ʼI te tolu ʼaho, neʼe natou laku ki te tai te ʼu maea ʼae neʼe fakaʼaogaʼi moʼo fakahake te ʼu la.

20 Neʼe kua lauʼi ʼaho te mole kei ha ʼo te laʼa mo te ʼu fetuʼu, pea mo te fueʼi matou e te afā malohi ʼaia. Neʼe mole kei matou ʼamanaki ʼe matou maʼuʼuli anai. 21 ʼI te kua fualoa ʼo tanatou heʼeki kakai, neʼe tuʼu ake ia Paulo ʼi te lotolotoiga ʼo natou, ʼo ina ui: “ ʼU tagata, ka na pau la neʼe kotou mulimuli ki taku tokoni ʼae ke ʼaua naʼa tou mavae ʼi Kelete, ʼe mahino ia neʼe mole hoko ia te tuʼutamaki pea mo te ʼu maumau ʼaeni.+ 22 Kae ʼi te temi nei, ʼe au kole atu ke kotou lotomalohi, he ʼe mole he tahi* ia koutou ʼe mate anai, gata pe ki te vaka ʼe maumau anai. 23 Neʼe fekauʼi mai he ʼaselo+ ʼanapo e te ʼAtua ʼae ʼe au atolasio pea mo foaki ki ai he tauhi taputapu, 24 pea neʼe ina ui mai: ‘Paulo, ʼaua naʼa ke mataku. ʼE tonu ke ke tuʼu ia muʼa ʼo Sesale,+ pea ʼe haofaki anai e te ʼAtua ia natou fuli ʼae ʼe folau fakatahi mo koe.’ 25 Koia ʼu tagata, kotou lotomalohi, he ʼe au tui ki te ʼAtua, pea ʼe hoko anai ohage pe ko tona fakaha mai. 26 Kae ʼe tonu ke mahaʼia te vaka ʼi he motu.”+

27 Neʼe fefueʼiʼaki ia te vaka ʼi tamatou folau ʼi te Tai ʼo Atilia ʼi te 14 po. Pea ʼi te maʼupo, neʼe mahalohalo te kau vaka kua ovi mai he kele. 28 Neʼe natou fua te loloto ʼo te tai pea neʼe natou maʼu ko meta ʼe 36.* Pea neʼe natou toe hoho atu ki mamaʼo, ʼo natou toe fua leva pea neʼe natou maʼu ko meta ʼe 27.* 29 Pea ʼi tanatou tuʼania ʼae naʼa mahaʼia te vaka ʼi te lauhakau, neʼe natou li ki te tai te ʼu foʼi tau ʼe fa ʼi te taumuli ʼo te vaka, pea mo fakaʼamu ke mafoa ake la te ʼaho. 30 Kae neʼe faigaʼi leva e te kau vaka ke natou mavae ʼi te vaka, ʼo natou fakahifo te vakapa ki te tai, takua neʼe natou fia tuku ki mamaʼo te ʼu foʼi tau ʼo te taumuʼa ʼo te vaka. 31 Neʼe ui e Paulo ki te pule solia pea mo te kau solia: “Kapau ʼe mole nonofo te ʼu tagata ʼaeni ʼi te vaka, pea ʼe mole kotou maʼuʼuli anai.”+ 32 Pea neʼe tuʼusi e te kau solia te ʼu maea ʼo te vakapa, ʼo natou tuku ke to ki te tai.

33 ʼI te kei hegihegi, neʼe fakalotomalohiʼi e Paulo ia natou fuli ke natou kakai, ʼo ina ui: “Kua ʼaho 14 takotou tuʼania mo fakatalitali pea heʼeki kotou kakai. 34 Koia ʼe au fakalotomalohiʼi koutou ke kotou kakai, he ʼe ʼaoga ki tokotou maʼuli pea ʼe mole lavea anai he tahi ia koutou.” 35 ʼI tana ʼosi fai te ʼu palalau ʼaia, neʼe ina toʼo he foʼi pane, pea neʼe fakafetaʼi ki te ʼAtua ia muʼa ʼo natou fuli, ʼo ina tofitofi pea mo kai leva. 36 Neʼe kua natou lotomalohi ʼo natou kakai ai leva. 37 Neʼe matou toko 276 ʼi te vaka. 38 ʼI tanatou kua makokona, neʼe natou fakamaʼamaʼa te vaka ʼo laku ki te tai te ʼu taga fulumeto.+

39 ʼI te kua ʼaho, neʼe mole feala ke natou iloʼi te fenua,+ kae neʼe natou sisio ki he mataʼone pea neʼe natou fakatotonu ke mahaʼia ai te vaka, mo kapau neʼe feala. 40 Koia neʼe natou tuʼusi te ʼu maea ʼo te ʼu foʼi tau ke to ki te tai, pea mo natou veteki te ʼu haʼi ʼo te ʼu foe. ʼI tanatou ʼosi fakahake te la ʼo te taumuʼa ke haga ki te matagi, neʼe natou olo ai leva ki te mataʼone. 41 Kae neʼe natou lave ʼi he fuga ʼafua ʼo mahaʼia ai te vaka. Neʼe ulu te taumuʼa ʼo te vaka ki te ʼone ʼo maʼua ai, kae neʼe kamata maumau te taumuli ʼi te malohi ʼo te ʼu peau.+ 42 Neʼe fakatotonu leva e te kau solia ke natou matehi te kau pilisoni, ke ʼaua naʼa fakato he tahi ia natou ki te tai, ʼo kāuga ki ʼuta pea mo hola ai. 43 Kae neʼe loto e te pule solia ke ina haofaki ia Paulo pea neʼe ina taʼofi natou ke ʼaua naʼa natou fakahoko tanatou fakatuʼutuʼu. Neʼe ina fakatotonu kia natou ʼae neʼe popoto ʼi te kāuga ke natou fakatoto ki te tai ʼo muʼamuʼa ki ʼuta, 44 pea muli age leva ia natou ʼae neʼe kei toe ʼi he ʼu papa ʼo te vaka pea mo ʼihi atu ʼu meʼa. Pea neʼe natou kaku haohaoa fuli leva ki ʼuta.+