Te ʼu Gaue ʼa Te Kau Apositolo

19 ʼI te kei nofo ʼa Apolose+ ʼi Kolonito, neʼe fakalaka ia Paulo ʼi te loto fenua ʼo hifo ki Efeso.+ Neʼe ina maʼu ai ʼihi tisipulo 2 pea neʼe ina fehuʼi kia natou: “Neʼe foaki atu koa kia koutou te laumalie maʼoniʼoni ʼi takotou liliu ko he ʼu tisipulo?”+ Neʼe natou tali ki ai: “Neʼe mole matou logo pe la ʼe ʼi ai he laumalie maʼoniʼoni.” 3 Pea neʼe ina fehuʼi: “Neʼe ko te faʼahiga papitema fea ʼae neʼe papitemaʼi ai koutou?” Neʼe natou tali: “Ko te papitema ʼa Soane.”+ 4 Neʼe ui e Paulo: “Neʼe fai e Soane te papitema ʼae ke fakaha ai e te hahaʼi tanatou fakahemala,+ ʼo ina tala age ke natou tui kia ia ʼae ʼe muli mai,+ ia Sesu.” 5 ʼI tanatou logo ki ai, neʼe papitemaʼi natou ʼi te huafa ʼo te ʼAliki ko Sesu. 6 ʼI te temi ʼae neʼe hili ai e Paulo ʼona nima kia natou, neʼe foaki kia natou te laumalie maʼoniʼoni+ ʼo natou palalau ai ʼi he ʼu lea matapule pea mo faifakakikite.+ 7 Neʼe ko tagata ʼe toko 12.

8 Lolotoga mahina ʼe tolu, neʼe palalau ʼi te sinakoka+ mo he lototoʼa, ʼo faiakonaki ai pea mo fakamahino lelei ia te Puleʼaga ʼo te ʼAtua.+ 9 Kae ʼi te fakafisi moʼoni ʼa ʼihi ke natou tui,* ʼo natou laukoviʼi Te Ala+ ia muʼa ʼo te hahaʼi, neʼe mavae mai ia natou+ pea neʼe ina toʼo te ʼu tisipulo mo ia, ʼo faiakonaki ʼi te ʼaho fuli ʼi te fale ako ʼo Tilano. 10 Neʼe ina fai te faʼahi ʼaia lolotoga taʼu ʼe lua, ʼo feala ai ki te hahaʼi fuli, te kau Sutea mo te kau Keleka ʼae neʼe nonofo ʼi te potu fenua ʼo Asia, ke natou logo ki te folafola ʼa te ʼAliki.

11 Pea neʼe haga fai e te ʼAtua he ʼu gaue fakaofoofo ʼaki ia Paulo.+ 12 Neʼe ʼave kia natou ʼae neʼe mahahaki te ʼu musuala pea mo te ʼu kie ʼae neʼe lave ki tona sino,+ ʼo puli ai ʼonatou mahaki pea mavae te ʼu laumalie kovi ʼae neʼe ulu sino ia natou.+ 13 Kae ko ʼihi Sutea ʼae neʼe feoloʼaki ʼo kapu te ʼu temonio, neʼe toe faigaʼi mo natou ke natou fakaʼaogaʼi te huafa ʼo te ʼAliki ko Sesu kia natou ʼae neʼe ulu sino ai te ʼu laumalie kovi. Neʼe natou ui: “ ʼE au fakatotonu atu ʼaki te huafa ʼo Sesu ʼae ʼe fakamafola e Paulo ke kotou mavae.”+ 14 Pea ia natou ʼae neʼe natou fai te faʼahi ʼaia, ʼe kau ai te ʼu foha ʼe toko fitu ʼo Seva, te pelepitelo pule Sutea. 15 Kae neʼe tali e te laumalie kovi kia natou: “ ʼE au iloʼi ia Sesu,+ pea ʼe au malama kia Paulo,+ kae ko ai ia koutou?” 16 Neʼe ʼoho leva kia natou te tagata ʼae neʼe ulu sino ai te laumalie kovi pea neʼe malohi age ia natou fuli. Neʼe natou feholaki telefua ai mo lavevea ʼi te ʼapi ʼaia. 17 Neʼe iloʼi te aluʼaga ʼaia e te hahaʼi fuli, te kau Sutea mo te kau Keleka ʼae neʼe nonofo ʼi Efeso. Neʼe natou manavasiʼi fuli ai pea mo fakavikiviki aipe te huafa ʼo te ʼAliki ko Sesu. 18 Tokolahi ia natou ʼae neʼe liliu ko he ʼu tisipulo, neʼe natou ʼomai ʼo vetevete pea mo fakamatala fakahaha te ʼu meʼa ʼae neʼe natou fai. 19 ʼEi, tokolahi ia natou ʼae neʼe gaohi meʼa fakamanamana, neʼe natou ʼaumai ʼanatou tohi ʼo tutu ia muʼa ʼo te hahaʼi fuli.+ Pea neʼe natou fakafuafua te totogi ʼo te ʼu tohi ʼaia, ko foʼi piesi siliva ʼe 50 000. 20 Koia ʼi hona aluʼaga fakaofoofo, neʼe mafola aipe te folafola ʼa Sehova* pea mo malohi age.+

21 ʼI te ʼosi hoko ʼo te ʼu faʼahi ʼaia, neʼe fai e Paulo te tonu ʼae ke alu ki Selusalemi+ hili tana fakalaka ʼi Masetonia+ mo Akaia. Neʼe ina ui: “Hili leva, ʼe tonu foki ke au alu ki Loma.”+ 22 Koia neʼe ina fekauʼi ki Masetonia he toko lua ia natou ʼae neʼe tokoni ki ai, ia Timoteo+ mo Elaseto,+ kae nofo ia ʼi he kiʼi temi ʼi te potu fenua ʼo Asia.

23 ʼI te temi ʼaia, neʼe hoko te toe maveuveu lahi+ ʼo ʼuhiga mo Te Ala.+ 24 Neʼe ʼi ai te tagata neʼe higoa ko Temetelio, neʼe ko te tufuga siliva pea neʼe ina faʼu te ʼu kiʼi ʼaletale siliva ʼo te ʼatua fafine ko Aletemisi. Neʼe tokoni ki te hahaʼi tufuga siliva ke natou maʼu paʼaga.+ 25 Neʼe ina fakatahiʼi natou pea mo te tahi kau tufuga faiva, pea neʼe ina ui: “ ʼU tagata, ʼe kotou iloʼi lelei ʼe tou maʼu paʼaga mai te gaue ʼaeni. 26 Kae kua kotou sisio mo logo ʼi te temi nei, ʼe mole gata pe ʼi Efeso+ kae ʼi te teitei potu fenua katoa ʼo Asia, kua fakalotoʼi e te tagata ʼaeni ko Paulo, he hahaʼi tokolahi ke natou tui. Neʼe ina toe fetogi foki mo tanatou manatu, ʼo ina ui ko te ʼu ʼatua ʼae neʼe faʼu e te tagata ʼe mole ko he ʼu ʼatua moʼoni ia.+ 27 Pea ʼe mole gata pe ki tatatou gaue ʼaeni ka tuʼutamakiʼia koteʼuhi ʼe feala anai ke laukoviʼi, kae ʼe toe tuʼutamakiʼia foki mo te fale lotu ʼo te ʼatua fafine lahi ko Aletemisi koteʼuhi ʼe meʼa noaʼi anai. Pea ko Aletemisi ʼae ʼe atolasio ki ai te potu fenua katoa ʼo Asia mo te kele katoa, ʼe mole toe vikiʼi anai.” 28 ʼI te logo ʼa te ʼu tagata ki ai, neʼe kovi ʼosi tonatou iita mo natou kalaga: “ ʼE lahi ia te ʼatua fafine ko Aletemisi ʼo te kau Efeso!”

29 Neʼe lahi leva te maveuveu ʼo te kolo, pea neʼe natou feleleʼi fuli ki te malaʼe faigaoʼi, ʼo natou toho ia Kaiusi mo Alisitake,+ te ʼu tagata Masetonia ʼae neʼe kaugā fagona mo Paulo. 30 Neʼe loto ia Paulo ke hu ki te loto malaʼe ʼo alu ki te hahaʼi, kae neʼe taʼofi ia e te ʼu tisipulo. 31 Pea maʼia mo ʼihi pule ʼo te ʼu ʼaho fakafiafia mo te ʼu faigaoʼi ʼae neʼe kaumeʼa mo ia, neʼe natou fakatokaga age ke ʼaua naʼa hu ki te malaʼe faigaoʼi. 32 Neʼe maveuveu ia te fakatahi, koteʼuhi neʼe kalagaʼi e ʼihi he meʼa kae kalagaʼi e ʼihi he tahi age meʼa, pea tokolahi neʼe mole natou iloʼi pe la te tupuʼaga ʼo tanatou fakatahitahi. 33 Neʼe natou toʼo ia Alesatelo mai te hahaʼi, pea neʼe humuki ki muʼa e te kau Sutea. Neʼe hiki leva e Alesatelo tona nima ke feala hana palalau ki te hahaʼi. 34 Kae ʼi tanatou iloʼi ʼae ʼe ko he Sutea, neʼe natou kalaga fakatahi fuli lolotoga hola ʼe lua: “ ʼE lahi ia te ʼatua fafine ko Aletemisi ʼo te kau Efeso!”

35 Neʼe fakagata leva e te pule ʼo te kolo te logoaʼa ʼa te hahaʼi pea neʼe ina ui: “ ʼU tagata ʼo Efeso, ko ai koa te tagata ʼae ʼe mole ina iloʼi ʼe taupau e te kolo ko Efeso te fale lotu ʼo te ʼatua fafine lahi ko Aletemisi pea mo tona fakatata ʼae neʼe to mai te lagi? 36 ʼE mole feala ia ke fakafihiʼi te ʼu faʼahi ʼaia, koia kotou nonofo fakalelei pea ʼaua naʼa kotou ʼoho noa. 37 Neʼe kotou ʼaumai ki heni te ʼu tagata ʼaeni kae ʼe mole ko he ʼu tagata ʼe nā kaihaʼa te ʼu fale lotu peʼe nā laukoviʼi totatou ʼatua fafine. 38 Koia kapau ʼe fia tukugakoviʼi e Temetelio+ mo te kau tufuga siliva he tahi, ʼe ʼi ai te ʼu ʼaho faifakamau pea mo te ʼu kovana. Ke natou olo ʼi te ʼu ʼaho ʼaia ʼo tagi kia natou. 39 Kae kapau ʼe kotou kumi he meʼa ʼe fakalaka ʼi te tukugakovi ʼaia, pea ʼe tonu ia ke fakatokatoka ʼi he fono ʼo mulimuli ki te lao. 40 Koteʼuhi ʼaki te aluʼaga ʼaeni neʼe hoko ʼi te ʼaho nei, ʼe feala ke tukugakoviʼi ai tatou takua neʼe tou agatuʼu ki te puleʼaga, he ʼe mole feala ke tou fakamahino age te tupuʼaga ʼo te ʼu maveuveu ʼae neʼe fai e te hahaʼi.” 41 Pea ʼi tana ʼosi fai te ʼu palalau ʼaia, neʼe ina fakamavae te hahaʼi.