Pesalemo
74 ʼAtua e, he koʼe neʼe ke liʼaki matou ʼo talu ai?+
He koʼe ʼe ke ita ki tau faga ovi ʼae ʼe ke fafaga?+
Manatuʼi te Moʼuga ʼo Sione ʼae neʼe ke nofo ai.+
3 Alu ki te koga meʼa ʼae kua maumau ʼo talu ai.+
Neʼe maumauʼi e te fili ia meʼa fuli ʼae ʼi te koga meʼa taputapu.+
4 ʼE kalaga ʼou fili ʼi te koga meʼa ʼae ʼe fai ai te tauhi kia te koe.+
Neʼe natou fakatuʼu ai ʼanatou fuka ohage ko ni fakailoga.
5 Neʼe natou hage ko ni tagata ʼe natou fakaʼaogaʼi te toki ʼi he vao matuʼa.
6 Neʼe natou maumauʼi te ʼu pāki fuli+ ʼaki ni toki mo ni koga ukamea.
7 Neʼe natou tutu tou sagatualio.+
Neʼe natou ʼulihi pea mo holoʼi te tapenakulo ʼae ʼe tuʼu ai tou huafa.
8 Neʼe natou ui mo ʼonatou hologa ʼi ʼonatou loto:
“ ʼE tonu ke tutu ʼi te fenua katoa te ʼu koga meʼa fuli ʼae ʼe fai ai te tauhi ki te ʼAtua.”
9 ʼE mole matou sisio ki he fakailoga.
ʼE mole kei ʼi ai he polofeta,
Pea ʼe mole he tahi ia matou ʼe ina iloʼi pe ʼe fualoa anai te aluʼaga ʼaia.
10 ʼAtua e, ʼe kaku anai ki ʼafea tou laukoviʼi e te fili?+
ʼE mole fakaʼapaʼapa anai koa te fili ki tou huafa ʼo talu ai?+
11 He koʼe ʼe ke taʼofi tou nima, ʼei, tou nima mataʼu?+
Toʼo ake tou nima ʼi tou kofu ʼo pulihi natou.
12 Kae ko te ʼAtua ʼe ko toku Hau talu mai fualoa,
Ko ia ʼae ʼe ina haofaki tana hahaʼi ʼi te kele.+
13 Neʼe ke fakahou te tai ʼaki tou mafimafi.+
Neʼe ke lailaiʼi te ʼu ʼulu ʼo te ʼu manu lalahi ʼo te tai.
14 Neʼe ke lailaiʼi te ʼu ʼulu ʼo Leviatane.*
Neʼe ke foaki ko he meʼa kai ki te hahaʼi ʼae ʼe nonofo ʼi te ʼu toafa.
15 Neʼe ke tofa he ala ki te ʼu matapuna vai mo te ʼu liuʼa.+
Neʼe ke fakamamaha ni vai tafe ʼe mole feala ke mamaha.+
16 ʼE ʼa koe te ʼaho ʼo feia mo te poʼuli.
Neʼe ke fakatupu te malama pea mo te laʼa.+
17 Neʼe ke fakatuʼu te ʼu tuʼakoi fuli ʼo te kele,+
Neʼe ke fakatuʼutuʼu te temi mafana pea mo te temi momoko.+
18 Sehova e, manatuʼi te ʼu laukovi ʼa te fili,
Manatuʼi te hahaʼi agavale ʼae ʼe mole fakaʼapaʼapa ki tou huafa.+
19 ʼAua naʼa ke tuku te maʼuli ʼo tau kulukulu ki te ʼu manu ʼo te vao.
ʼAua naʼa ke galoʼi ʼo talu ai te maʼuli ʼo tau hahaʼi ʼae ʼe mamahi.
20 Manatuʼi te fuakava,
He kua liliu te ʼu koga meʼa fakapoʼuli ʼo te kele ko ni nonoʼaga ʼo te kau agamalohi.
21 Ke mole liliu lotovaivai ia ia ʼae neʼe gaohi koviʼi.+
Ke vikiʼi tou huafa e ia ʼae ʼe fiamalalo pea mo ia ʼae ʼe masiva.+
22 ʼAtua e, tuʼu ake ʼo palalau maʼa koe ʼi tou fakamauʼi.
Manatuʼi ʼe laukoviʼi koe e te kau agavale ʼi te ʼaho katoa.+
23 ʼAua naʼa ke galoʼi te ʼu meʼa ʼae ʼe lau e ʼou fili.
ʼE logoʼi tuʼumaʼu pe te ʼu pakalaga ʼa natou ʼae ʼe agatuʼu kia te koe.