Lua Samuele

21 ʼI te temi ʼo Tavite, neʼe to leva he hoge+ lolotoga taʼu ʼe tolu. Pea neʼe fakafehuʼi e Tavite ia Sehova, pea neʼe ui age e Sehova: “Neʼe fai e Saulo pea mo tona famili he ligi toto, he neʼe ina matehi te kau Kipeone.”+ 2 Neʼe pauʼi ai e te hau te kau Kipeone,+ ʼo palalau ai kia natou. (Ko te kau Kipeone neʼe mole ko he kau Iselaele, kae neʼe ko te toe ʼo te kau Amole,+ pea neʼe fakapapau age e te kau Iselaele ʼe mole matehi anai natou.+ Kae neʼe faiga ia Saulo ke ina pulihi katoa natou ʼi tana maheka ki te hahaʼi ʼo Iselaele pea mo Suta.) 3 Neʼe ui age e Tavite ki te kau Kipeone: “Kotea ʼae ʼe tonu ke au fai maʼa koutou? ʼE lava feafeaʼi haku faifakalelei atu, ke kotou tapuakiʼi ai te hahaʼi ʼa* Sehova?” 4 Neʼe tali age e te kau Kipeone: “ ʼE mole matou kole atu he siliva peʼe ko he aulo+ ki te ʼu meʼa ʼae neʼe fai e Saulo mo tona loto fale kia matou. Pea ʼe mole feala ke matou matehi he tagata ʼi Iselaele.” Neʼe ina ui age: “Ko he meʼa pe ʼe kotou ui mai, ʼe au fai anai maʼa koutou.” 5 Neʼe natou ui ki te hau: “Ko te tagata ʼaia neʼe ina matehi matou, pea neʼe ina fia pulihi katoa matou mai te fenua ʼo Iselaele.+ 6 Koia, ke tuku mai kia matou ni tagata ʼe toko fitu ʼi tona hakoga. Pea ʼe matou matehi anai natou pea mo tautau anai ʼonatou sino ʼi he ʼu pou,*+ ia muʼa ʼo Sehova ʼi Kipease+ te kolo ʼo Saulo,* ia ia ʼae neʼe filifili e Sehova.”+ Neʼe ui leva e te hau: “ ʼE au tuku atu anai natou.”

7 Kae neʼe manavaʼofa ia te hau kia Mefiposete,+ te foha ʼo Sonatane, te foha ʼo Saulo, ʼuhi ko te fakapapau ʼae neʼe fai e Tavite mo Sonatane,+ te foha ʼo Saulo ia muʼa ʼo Sehova. 8 Koia neʼe toʼo ai e te hau ia Alemoni mo Mefiposete, te ʼu tama ʼe lua ʼa Saulo mo Lisepa,+ te ʼofafine ʼo Ahia, pea mo te ʼu tama ʼe nima ʼa Mikale,*+ te ʼofafine ʼo Saulo. Ko ʼana tama ʼaia kia Ateliano,+ te foha ʼo Palesilai, te tagata Meola. 9 Neʼe ina tuku leva natou ki te kau Kipeone, pea neʼe natou matehi mo tautau ʼonatou sino ʼi he ʼu pou, ʼi te moʼuga ia muʼa ʼo Sehova.+ Neʼe mamate fakatahi te foʼi toko fitu ʼaia. Neʼe matehi natou ʼi te ʼu ʼuluaki ʼaho ʼo te taʼukai, ʼae neʼe kamata ai te taʼukai olose. 10 Neʼe toʼo leva e Lisepa,+ te ʼofafine ʼo Ahia, he taga* ʼo ina folahi ki te fuʼu maka. Pea neʼe heka ai talu mai te kamata ʼo te taʼukai ʼo kaku ki te to ifo ʼo te ʼua mai te lagi. Ka ʼaho, neʼe mole ina tuku ke tutuʼu te ʼu manulele ʼi te ʼu sino, pea ka poʼuli, neʼe mole ina tuku ke fakaovi age te ʼu manu ʼo te vao.

11 Pea neʼe fakaha age leva kia Tavite te meʼa ʼae neʼe fai e te fafine ʼa Saulo ko Lisepa, te ʼofafine ʼo Ahia. 12 Koia neʼe alu ai ia Tavite ki te kau tagata takitaki ʼo* Sapesi-kileate ʼo toʼo mai ia natou te ʼu hui ʼo Saulo mo Sonatane, tona foha.+ Neʼe natou kaihaʼa te ʼu hui ʼi te malaʼe lahi ʼo Pete-sani, ʼae neʼe tautau ai e te kau Filisitini ʼonā sino ʼi te ʼaho ʼae neʼe natou matehi ai ia Saulo ʼi Kilipoa.+ 13 Neʼe ina ʼaumai ai te ʼu hui ʼo Saulo mo Sonatane, tona foha, pea neʼe natou toe tanaki foki mo te ʼu hui ʼo te ʼu tagata ʼae neʼe matehi.*+ 14 Pea neʼe natou tuku leva te ʼu hui ʼo Saulo mo Sonatane, tona foha ki te fale maka ʼo Kisi,+ tana tamai, ʼi Tesela, ʼi te fenua ʼo Pesamino.+ ʼI tanatou ʼosi fai te ʼu meʼa fuli ʼae neʼe fakatotonu age e te hau, neʼe fagono leva ia te ʼAtua ki ʼanatou kole mamahi ʼo ʼuhiga mo te fenua.+

15 Neʼe toe fetauʼaki leva te kau Filisitini pea mo Iselaele.+ Neʼe olo ai ia Tavite mo ʼana hahaʼi faifekau ʼo tauʼi te kau Filisitini, kae neʼe kua gaʼegaʼe leva ia Tavite. 16 Pea neʼe fia matehi e Sisepi-penope ia Tavite. Neʼe hifo mai te tagata ʼaia mai te kau Lefaimi,+ pea ko te mamafa ʼo tana tao kapa neʼe ko sikele ʼe 300*+ pea neʼe toe ʼi ai mo tana heleta foʼou. 17 Kae ʼi te moʼi temi pe ʼaia, neʼe haʼu ai ia Apisai,+ te tama ʼa Teselusa ʼo tokoni kia Tavite,+ pea neʼe ina matehi te tagata Filisitini. Pea neʼe toe uga malohi ia* Tavite e ʼana tagata: “ ʼE mole tonu ke ke toe alu mo matou ki te tau.+ ʼE mole tonu ke ke matehi te malama ʼo Iselaele!”*+

18 Hili ʼaia, neʼe toe hoko he tau mo te kau Filisitini+ ʼi Kope. Pea ʼi te lakaga ʼaia, neʼe matehi e Sipekai+ te tagata Husa ia Safo, ʼae neʼe hifo mai te kau Lefaimi.+

19 Pea neʼe toe hoko he tau mo te kau Filisitini+ ʼi Kope, neʼe matehi e Elesanane te foha ʼo Saale-olekimi, te tagata Petelehemi ia Koliate te tagata Kiete, ʼae neʼe hage te ʼakau ʼo tana tao ko te ʼakau ʼae ʼe lalaga ai te filo.+

20 Pea neʼe toe hoko he tau ʼi Kiete. Neʼe ʼi ai he toe tagata lahi, mo ʼona kauʼi tuhi ʼe 6 ʼi ʼona nima lua, mo ʼona kauʼi vaʼe ʼe 6 ʼi ʼona vaʼe lua, ʼo fakatahiʼi ai ko kauʼi tuhi mo kauʼi vaʼe ʼe 24. Neʼe toe hifo mai foki mo ia mai te kau Lefaimi.+ 21 Neʼe laga tau tuʼumaʼu ki Iselaele.+ Koia, neʼe matehi leva ia ia e Sonatane te foha ʼo Simei,+ te taʼokete ʼo Tavite.

22 Ko te ʼu tagata ʼaia ʼe toko fa neʼe natou hifo mai te kau Lefaimi ʼae ʼi Kiete, pea neʼe matehi natou e Tavite mo ʼana tagata faifekau.+