ʼUluaki Koloniko

15 Pea neʼe hoko atu pe te laga e Tavite he ʼu fale maʼa ia totonu ʼi te Kolo ʼo Tavite, pea neʼe ina teuteuʼi he koga meʼa ke tuku ki ai te Aleka ʼo te ʼAtua moʼoni ʼo ina fakatuʼu he fale la ke tuku ai.+ 2 Pea neʼe ui leva e Tavite: “ ʼE mole tonu ke fata e he tahi te Aleka ʼo te ʼAtua moʼoni gata pe ki te kau Levite, he neʼe filifili natou e Sehova ke natou fata te Aleka ʼo Sehova pea ke natou tauhi tuʼumaʼu pe kia te ia.”+ 3 Neʼe fakatahiʼi ai e Tavite ia Iselaele katoa ʼi Selusalemi ke ʼaumai te Aleka ʼo Sehova ki te koga meʼa ʼae neʼe ina teuteuʼi ke tuku ki ai.+

4 Neʼe fakatahiʼi e Tavite te hologa ʼo Alone+ pea mo te kau Levite:+ 5 ʼi te kau Keate, ko Uliele te pule pea mo te toko 120 ʼi ʼona tehina, 6 ʼi te kau Melali, ko Asaia+ te pule pea mo te toko 220 ʼi ʼona tehina, 7 ʼi te kau Kelesomi, ko Soele+ te pule pea mo te toko 130 ʼi ʼona tehina, 8 ʼi te hologa ʼo Elisafani,+ ko Semaea te pule pea mo te toko 200 ʼi ʼona tehina, 9 ʼi te hologa ʼo Hepelone, ko Eliele te pule pea mo te toko 80 ʼi ʼona tehina, 10 ʼi te hologa ʼo Usiele,+ ko Aminatape te pule pea mo te toko 112 ʼi ʼona tehina. 11 Pea neʼe pauʼi leva e Tavite te ʼu pelepitelo ko Satoke+ pea mo Apiata,+ ʼo feia mo te kau Levite, ia Uliele, mo Asaia, mo Soele, mo Semaea, mo Eliele pea mo Aminatape, 12 ʼo ina ui kia natou: “Ko koutou ko te ʼu pule famili ʼo te kau Levite. Kotou fakamaʼa ia koutou totonu pea mo ʼokotou tehina, pea kotou ʼaumai te Aleka ʼo Sehova, te ʼAtua ʼo Iselaele ʼo tuku ki te koga meʼa ʼae kua au ʼosi teuteuʼi. 13 Neʼe mole ko koutou ʼae neʼe kotou fata te aleka ʼi tona ʼuluaki ʼaumai,+ koia neʼe to ai te hauhau ʼo Sehova totatou ʼAtua kia matou,+ koteʼuhi neʼe mole matou kumi pe neʼe tonu ke feafeaʼi tona fai.”+ 14 Koia, neʼe fakamaʼa ai e te ʼu pelepitelo mo te kau Levite ia natou totonu, ke feala hanatou ʼaumai te Aleka ʼo Sehova, te ʼAtua ʼo Iselaele.

15 Neʼe fata leva e te kau Levite te Aleka ʼo te ʼAtua moʼoni, ʼo natou hili te ʼu ʼakau ʼamo ʼo te Aleka ki ʼonatou fuga ʼuma,+ ohage pe ko tona fakatotonu e Moisese, ʼo mulimuli ki te folafola ʼa Sehova. 16 Neʼe ui leva e Tavite ki te ʼu pule ʼo te kau Levite ke natou filifili he kau hiva ʼi ʼonatou tehina, ke natou hiva leʼo lahi mo fakafiafia, ʼaki he ʼu meʼa faimaholo: he ʼu alepa,+ mo he ʼu simepale+ pea mo he tahi age ʼu meʼa faimaholo.

17 Koia, neʼe filifili ai e te kau Levite ia Emani+ te foha ʼo Soele pea ʼi ʼona tehina, ko Asafe+ te foha ʼo Pelekia pea ʼi te kau Melali ʼae ko ʼonatou tehina, ia Etane+ te foha ʼo Kusasa. 18 Neʼe fakatahi kia natou ʼonatou tehina ʼo te lua kalasi,+ ʼae ko Sakalia, mo Pene, mo Saasiele, mo Semilamote, mo Sehiele, mo Uni, mo Eliape, mo Penaia, mo Maasesa, mo Matitia, mo Elifele, mo Mikenesa, pea mo Opeto-etome mo Seiele, ʼae ko he ʼu tagata leʼo matapa. 19 Neʼe tonu ki te kau tagata hiva ko Emani,+ mo Asafe+ pea mo Etane ke natou ta te ʼu simepale kapa.+ 20 Pea ko Sakalia, mo Asieli, mo Semilamote, mo Sehiele, mo Uni, mo Eliape, mo Maasesa pea mo Penaia, neʼe natou ta te tahi ʼu meʼa faimaholo ʼae neʼe kalaviʼi ki te Alamote.*+ 21 Pea ko Matitia,+ mo Elifele, mo Mikenesa, mo Opeto-etome, mo Seiele pea mo Asasia, neʼe natou ta ʼanatou alepa ʼae neʼe kalaviʼi ki te Seminite,*+ pea neʼe natou taki te hiva. 22 Neʼe tokaga ia Kenania,+ te pule ʼo te kau Levite ki te ʼave ʼo te Aleka, he neʼe ina iloʼi lelei te faʼahi ʼaia, 23 kae ko Pelekia mo Elekana neʼe ko te ʼu tagata leʼo matapa ʼae neʼe gaue ʼo ovi ki te Aleka. 24 Ko te kau pelepitelo ʼae ko Sipania, mo Sosafati, mo Netanele, mo Amasai, mo Sakalia, mo Penaia pea mo Eliesele, neʼe natou pupuhi malohi te ʼu fakatagi pupuhi ia muʼa ʼo te Aleka ʼo te ʼAtua moʼoni.+ Pea ko Opeto-etome mo Sekisa neʼe ko te tahi ʼu tagata leʼo matapa ʼae neʼe gaue ʼo ovi ki te Aleka.

25 Neʼe alu ai ia Tavite, mo te kau takitaki ʼo Iselaele pea mo te kau pule ʼo he toko afe ʼaki he lotofiafia,+ ʼo toʼo te aleka ʼo te fuakava ʼa Sehova ʼi te ʼapi ʼo Opeto-etome.+ 26 Neʼe tokoni ia te ʼAtua moʼoni ki te kau Levite ʼi tanatou fata te aleka ʼo te fuakava ʼa Sehova, koia neʼe natou sakilifisioʼi ai he ʼu vitulo kei mui ʼe fitu pea mo he ʼu ovi tagata ʼe fitu.+ 27 Neʼe tui e Tavite tona kofu tuʼa ʼae neʼe fai ʼaki he kie lelei, ʼo toe feia pe mo te kau Levite fuli ʼae neʼe natou fata te Aleka, mo te kau hiva, pea mo Kenania ʼae neʼe tokaga ki te ʼave ʼo te Aleka pea mo te kau hiva. Neʼe toe tui foki e Tavite te efote* lino.*+ 28 Neʼe ʼaumai e te kau Iselaele fuli ia te aleka ʼo te fuakava ʼa Sehova, mo natou kalaga fakafiafia,+ mo pupuhi he ʼu fakatagi pupuhi kehekehe,+ mo ta he ʼu simepale, mo he ʼu alepa+ pea mo he tahi age ʼu meʼa faimaholo.

29 Kae ʼi te temi ʼae neʼe fakahu ai te aleka ʼo te fuakava ʼa Sehova ki te Kolo ʼo Tavite,+ neʼe sio ifo ia Mikale,+ te ʼofafine ʼo Saulo mai te matapa fakamalama ki te makahopohopo pea mo te fakafiafia ʼa te Hau ko Tavite. Neʼe kamata fehiʼa ai kia ia ʼi tona loto.+