Numelo

16 Ko Kole,+ te foha ʼo Siteseale,+ te foha ʼo Keate,+ te foha ʼo Levi+ neʼe fakatahi leva mo Tatane pea mo Apilame, te ʼu foha ʼo Eliape,+ ʼo feia mo Oni, te foha ʼo Peleto, ʼae ʼe natou kau ʼi te hologa ʼo Lupeni.+ 2 Neʼe natou fakafeagai kia Moisese, pea neʼe fakatahi mai kia natou te ʼu tagata Iselaele ʼe toko 250, neʼe natou takitaki pea mo fakafofoga te hahaʼi pea neʼe ko te ʼu tagata maʼu tuʼulaga. 3 Neʼe natou fakatahitahi ai ʼo olo+ kia Moisese mo Alone, pea neʼe natou ui kia naua: “Kua matou fiu ia koulua! ʼE maʼoniʼoni te hahaʼi fuli,+ pea ʼe nofo ia Sehova ʼi te lotolotoiga ʼo natou.+ He koʼe leva ʼe kolua fia maʼoluga age ʼi te hahaʼi ʼa Sehova?”

4 ʼI te logo ʼa Moisese ki te ʼu palalau ʼaia, neʼe tulolo atu aipe ki te kele. 5 Neʼe ina ui leva kia Kole pea mo natou fuli ʼae neʼe lagolago ki ai: “Apogipogi uhu, ʼe fakaha anai e Sehova pe ko ai ʼae ʼaʼana,+ pea ko ai ʼae ʼe maʼoniʼoni pea ko ai ʼae ʼe tonu ke fakaovi age kia te ia.+ Pea ʼe fakaovi age anai kia te ia, ia ia ʼae ka ina filifili.+ 6 ʼE tonu ke ke fai te faʼahi ʼaeni, Kole, ʼo feia mo natou fuli ʼae ʼe lagolago kia koe:+ Kotou toʼo he ʼu ʼaiʼaga afi,+ 7 pea apogipogi, kotou ʼai ki ai he ʼu mamala kakaha pea mo te iseso ia muʼa ʼo Sehova, pea ko te tagata ʼae ka filifili anai e Sehova+ ʼe ko ia ʼae ʼe maʼoniʼoni. Kua feʼauga takotou agatuʼu, ʼu foha ʼo Levi!”+

8 Neʼe ui leva e Moisese kia Kole: “Fakalelei siʼokotou loto, ʼu foha ʼo Levi, kae kotou fakalogo mai. 9 Neʼe vaheʼi kehe koutou e te ʼAtua ʼo Iselaele mai tana hahaʼi,+ pea mo ina fakagafua atu ke kotou fakaovi age kia te ia ʼo fakahoko te ʼu gaue ʼo ʼuhiga mo te tapenakulo ʼa Sehova, pea mo kotou tutuʼu ia muʼa ʼo te hahaʼi ʼo tauhi natou.+ ʼE mole maʼuhiga koa la kia koutou te ʼu faʼahi ʼaia? 10 ʼE mole maʼuhiga koa la kia koe tana fakagafua atu ʼae ke kotou fakaovi kia te ia, ia koe mo ʼou tehina fuli, ia te ʼu foha ʼo Levi? He koʼe ʼe kotou faiga ke kotou toe maʼu mo te tuʼulaga fakapelepitelo?+ 11 Koia, ko koe mo natou fuli ʼae kua fakatahitahi pea mo lagolago atu kia koe, ʼe kotou fakafeagai kia Sehova. Ko ai koa ia Alone ke kotou muhumuhu ki ai?”+

12 Ki muli age, neʼe fekauʼi e Moisese he tahi ke alu ʼo kumi mai ia Tatane mo Apilame,+ te ʼu foha ʼo Eliape, kae neʼe nā ui: “ ʼE mole ma fia olo atu! 13 ʼE mole ke feʼaugaʼia koa la tau haga ʼo fakamavae matou mai he fenua ʼe tafe ai te huʼa pipi mo te meli ke matou mamate ai ʼi te toafa?+ ʼE ke toe loto koa ke ke puleʼi faʼitaliha matou? 14 Pea ʼe mahino ia, neʼe mole ke taki mai matou ki he fenua ʼe tafe ai te huʼa pipi mo te meli,+ pea neʼe mole ke foaki mai he ʼu moʼi kele mo he ʼu gaueʼaga vite ko homatou tofiʼa. ʼE ke loto koa ke muliʼi koe e te ʼu tagata ʼaeni, ohage ko ni tagata kivi? ʼE mole ma olo atu anai!”

15 Neʼe kovi ʼosi ai te ita ʼo Moisese pea neʼe ina ui kia Sehova: “ ʼAua naʼa ke tali tanatou molaga meʼa kai. Neʼe mole au toʼo hanatou asino ʼe tahi pea neʼe mole au gaohi koviʼi natou.”+

16 Neʼe ui leva e Moisese kia Kole: “Apogipogi, ke ke tuʼu ia muʼa ʼo Sehova pea mo te hahaʼi fuli ʼae ʼe lagolago kia koe, ʼo feia mo Alone. 17 ʼE kotou tahi toʼo anai tana ʼaiʼaga afi ʼo ʼai ki ai te iseso, pea ʼe kotou tahi tuʼu anai mo tana ʼaiʼaga afi ia muʼa ʼo Sehova, ko ʼaiʼaga afi ʼe 250. Pea ko koe mo Alone, ʼe kolua tahi toʼo anai tana ʼaiʼaga afi.” 18 Koia, neʼe natou tahi toʼo ai tana ʼaiʼaga afi ʼo ʼai ki ai te ʼu mamala kakaha mo te iseso, pea neʼe natou tutuʼu leva ʼi te huʼaga ʼo te fale la ʼo te fono, ʼo feia mo Moisese pea mo Alone. 19 ʼI te kua fakatahiʼi e Kole ia te hahaʼi ʼae neʼe lagolago kia ia+ ʼi te huʼaga ʼo te fale la ʼo te fono ke natou fakafeagai kia naua, neʼe ha te kololia ʼo Sehova ki te hahaʼi fuli.+

20 Pea neʼe ui e Sehova kia Moisese mo Alone: 21 “Kolua mavae mai te kutuga ʼaia, ke au fakaʼauha ia natou ʼi he temi pe ʼe tahi.”+ 22 Neʼe nā tulolo atu aipe ki te kele, ʼo nā ui: “ ʼAtua e, ia koe ʼae ʼe ke foaki te maʼuli ki te hahaʼi fuli,+ ʼe ke ita anai koa ki te hahaʼi katoa ʼo Iselaele ʼuhi pe ko te agahala ʼa he tagata ʼe tahi?”+

23 Neʼe ui leva e Sehova kia Moisese: 24 “Ke ke ui age ki te hahaʼi: ‘Kotou fakamamaʼo mai te ʼu fale la ʼo Kole, mo Tatane pea mo Apilame!’ ”+

25 Neʼe alu ai leva ia Moisese, fakatahi mo te kau takitaki+ ʼo Iselaele kia Tatane mo Apilame. 26 Pea neʼe ina ui ki te hahaʼi: “Kotou fakamamaʼo mai te ʼu fale la ʼo te ʼu tagata agakovi ʼaia pea ʼaua naʼa kotou fāfā ki hanatou meʼa, ke mole fakaʼauha ai koutou ʼuhi ko tanatou agahala.” 27 Neʼe natou fakamamaʼo atu aipe mai te ʼu fale la ʼo Kole, mo Tatane pea mo Apilame. Pea neʼe ʼomai ia Tatane mo Apilame ki tuʼa ʼo tutuʼu ʼi te huʼaga ʼo ʼonā fale la, mo ʼonā ʼohoana, mo ʼonā foha pea mo ʼanā fanau ʼae kei liliki.

28 Pea neʼe ui e Moisese: “ ʼI te meʼa ʼaeni ka hoko, ʼe kotou iloʼi anai neʼe ko Sehova ʼae neʼe ina fekauʼi mai au ke au fai te ʼu meʼa ʼaia, kae neʼe mole au fai he meʼa ʼi toku loto faʼitaliha. 29 Kapau ʼe mamate te hahaʼi ʼaeni ohage pe ko te hahaʼi fuli pea kapau ʼe tatau tonatou tautea mo te tautea ʼa te hahaʼi fuli, pea ko au neʼe mole fekauʼi mai au e Sehova.+ 30 Kae kapau ʼe fai e Sehova he meʼa fakaofoofo kia natou, pea kapau ʼe ava te kele ʼo folo ia natou mo ʼanatou meʼa fuli pea mo natou hifo maʼuli ki te Faitoka,* ʼe kotou iloʼi papau ai anai neʼe mole fakaʼapaʼapa te ʼu tagata ʼaia kia Sehova.”

31 ʼI tana ʼosi fai pe te ʼu palalau ʼaia, neʼe mafaʼa te kele ʼae neʼe natou tutuʼu ai.+ 32 Pea neʼe ava ʼo folo ai ia naua, mo ʼonā famili pea mo natou fuli ʼae neʼe kau mo Kole+ ʼo feia mo ʼonatou koloa fuli. 33 Neʼe nā hifo maʼuli ki te Faitoka* ʼo feia mo natou ʼae neʼe kau mo naua, pea neʼe natou tanumia ai. Koia neʼe natou mamate fuli ai ʼi te lotolotoiga ʼo te hahaʼi.+ 34 ʼI tanatou logo ki ʼanatou kalaga, neʼe feholaki ai te kau Iselaele ʼae neʼe ʼi ʼonatou tafaʼaki, he neʼe natou ui: “Tou feholaki naʼa folo tatou e te kele!” 35 Pea neʼe fakato ifo e Sehova he afi+ ʼo tutu ai te ʼu tagata ʼe toko 250, ʼae neʼe natou momoli te iseso.+

36 Pea neʼe ui e Sehova kia Moisese: 37 “Ke ke ui age kia Eleasale, te foha ʼo Alone te pelepitelo, ke ina toʼo mai te afi te ʼu ʼaiʼaga afi+ he ʼe ko he ʼu meʼa taputapu. Pea ke ke ui age ki ai ke ina laku ki mamaʼo te ʼu mamala kakaha. 38 ʼE tonu anai ke fai ʼaki te ʼu ʼaiʼaga afi ʼa te ʼu tagata ʼaia neʼe agahala ʼo natou mamate ai, ni lauʼi ukamea pea ke ʼaofi ʼaki te ʼaletale,+ koteʼuhi neʼe natou tutuʼu ia muʼa ʼo Sehova mo te ʼu ʼaiʼaga afi ʼaia, pea kua liliu te ʼu meʼa ʼaia ʼo taputapu. ʼE ko he fakatokaga anai ki te kau Iselaele.”+ 39 Koia, neʼe toʼo ai e te pelepitelo ko Eleasale ia te ʼu ʼaiʼaga afi kapa ʼae neʼe ʼaumai e te ʼu tagata ʼaia neʼe tutu, pea neʼe ina tuki ke ʼaofi ʼaki te ʼaletale, 40 ohage pe ko tona fakaha age e Sehova ki ai ʼaki ia Moisese. Neʼe ko he fakamanatu ʼaia ki te kau Iselaele ke mole fakaovi he tahi kehe* ʼe mole kau ki te hologa ʼo Alone, ʼo tutu te iseso ia muʼa ʼo Sehova+ pea ke mole liliu he tahi ohage ko Kole mo te hahaʼi ʼae neʼe lagolago ki ai.+

41 ʼI te ʼaho ake pe, neʼe kamata muhumuhu te kau Iselaele fuli kia Moisese mo Alone,+ ʼo natou ui: “Ko koulua ʼae neʼe kolua matehi te hahaʼi ʼa Sehova.” 42 ʼI te temi ʼae neʼe fakatahitahi mai ai te hahaʼi ke natou fakafeagai kia Moisese mo Alone, neʼe natou maliu leva ʼo haga ki te fale la ʼo te fono. Pea neʼe natou sisio ai ki te ʼaofi e te ʼao ia te fale la pea neʼe ha te kololia ʼo Sehova.+

43 Neʼe olo ia Moisese mo Alone ki te muʼa fale la ʼo te fono,+ 44 pea neʼe ui e Sehova kia Moisese: 45 “Kolua mavae mai te hahaʼi ʼaia, ke au fakaʼauha ia natou ʼi he temi pe ʼe tahi.”+ Neʼe nā tulolo atu aipe ki te kele.+ 46 Pea neʼe ui leva e Moisese kia Alone: “Toʼo te ʼaiʼaga afi ʼo ʼai ki ai te ʼu mamala kakaha mai te ʼaletale+ mo te iseso, pea ke foimo alu ki te hahaʼi. Tutu te iseso ke fakamolemole ai tanatou agahala,+ he ʼe kua to te hauhau ʼo Sehova kia natou. Koʼeni kua hoko te tautea!” 47 Neʼe toʼo atu aipe e Alone te ʼaiʼaga afi, ohage pe ko tona fakatotonu age e Moisese, pea neʼe lele ki te lotolotoiga ʼo te hahaʼi, pea neʼe kua hoko moʼoni te tautea. Neʼe ina ʼai te iseso ki te ʼaiʼaga afi ke fakamolemole ai te agahala ʼa te hahaʼi. 48 Neʼe tuʼu ʼi te vaha ʼo natou ʼae kua mamate pea mo natou ʼae ʼe kei maʼuʼuli, pea neʼe gata ai leva te tautea. 49 Ko te toko 14 700 ʼae neʼe mamate ʼi te tautea ʼaia, kae neʼe mole lau ai ia natou ʼae neʼe kua mamate ʼuhi ko Kole. 50 ʼI te temi ʼae neʼe toe liliu ai ia Alone kia Moisese, ʼi te huʼaga ʼo te fale la ʼo te fono, neʼe kua gata leva ia te tautea.