Senesi

49 Pea neʼe pauʼi e Sakopo ʼona foha ʼo ina ui age kia natou: “Kotou maʼopoʼopo mai ke au fakaha atu te meʼa ʼae ka hoko kia koutou ʼi te ka haʼu. 2 Kotou fakatahitahi pea mo fakalogo mai, ʼu foha ʼo Sakopo, ʼei, kotou fakalogo mai ki takotou tamai ko Iselaele.

3 “Lupeni,+ ko koe toku ʼuluaki foha,+ toku malohi pea mo taku ʼuluaki tamasiʼi,* neʼe lahi tou fakaʼapaʼapaʼi pea mo tou malohi. 4 Kae ʼe mole ke maʼoluga anai ʼi ʼou tehina, koteʼuhi neʼe mole ke lotololomi ohage ko he ʼu vai ʼe tafe malohi, pea neʼe ke takoto ʼi te moeʼaga ʼo tau tamai.+ ʼI te temi ʼaia, neʼe ke ʼulihi ai toku moeʼaga. ʼEi, neʼe fai e Lupeni te faʼahi ʼaia!

5 “ ʼE tau tehina ia Simeone mo Levi.+ ʼE nā fakaʼaogaʼi ʼanā mahafu moʼo fakahoko he agamalohi.+ 6 Ke ʼaua naʼa au* fakatahi mo naua. Siʼoku loto,* ʼaua naʼa ke kau ki tanā kutuga, he neʼe nā matematehi he ʼu tagata ʼi tonā iita.+ Pea neʼe nā tuʼusi te ʼu ivi ʼo te ʼu vitulo kae ʼe mole hona tupuʼaga. 7 Ke malaʼia tonā ita he neʼe nā agakovi ʼaupito ʼi tonā itaita.+ Ke au fakamavetevete ʼonā hakoga ʼi te fenua ʼo Sakopo pea ke au vaevae ia natou ʼi Iselaele.+

8 “Suta,+ ʼe vikiʼi anai koe e ʼou tehina.+ ʼE tuku atu anai ʼou fili ki ʼou nima.+ ʼE tulolo anai ʼi ʼou muʼa te ʼu foha ʼo tau tamai.+ 9 Ko Suta ʼe ko he laione mui.+ Siʼoku foha, ʼe ke tuʼu moʼoni ake anai ʼi tau ʼosi kai te manu ʼae neʼe ke puke. Neʼe takoto mo nofo ohage ko he laione. Pea ko ai ʼae ʼe feala ke ina fakatuʼu ki ʼoluga he laione? 10 ʼE mole mavae kehe anai mai ia Suta te tokotoko fakahau,+ ʼo feia mo te toko fakaʼaliki mai ʼona vaʼe, ʼo kaku ki te haʼu ʼa Silo.*+ Pea ʼe fakalogo anai te hahaʼi fuli kia te ia.+ 11 ʼE ina haʼi anai tana asino ki he fuʼu vite pea mo tana asino mui ki he fuʼu vite lelei. ʼE ina fo anai ʼona teu ʼi te vino pea mo tona kofu ʼi te huʼa vite. 12 ʼE kula fakapoʼuli ʼona mata ʼi tana inu te vino pea ʼe hihina ʼona nifo ʼi tana inu te huʼa pipi.

13 “ ʼE nofo ovi anai ia Sepulone+ ki te matatai, ʼo ovi ki te taulaga vaka.+ Pea ʼe ovi anai te tuʼakoi ʼo tona kele ki Sitoni.+

14 “Ko Isakale+ ʼe ko he asino malohi, ʼe takoto mo ʼana kato ʼe lua ʼae ʼi tona tuʼa. 15 ʼE sio anai ki te lelei ʼo te koga meʼa ʼae ʼe malolo ai pea mo te matalelei ʼo te fenua. ʼE punou anai ke hili ki tona fuga ʼuma te kavega, pea ʼe ina tali anai ke gaue kinakina ohage pe ko he tagata kaugana.

16 “Ko Tane,+ ʼae ʼe kau ʼi te ʼu telepi ʼo Iselaele, ʼe ina fakamauʼi anai te hahaʼi fuli.+ 17 Ke hage ia Tane ko he gata ʼi te vaʼe ala, ko he gata mo ʼona tala ʼi te kauala, ʼae ʼe ina ʼuʼusi te ʼu mulivaʼe ʼo te hosi ke to ai ki muli te tagata ʼae ʼe heka ai.+ 18 Sehova e, ʼe au fakatalitali anai ki te temi ʼae ka ke haofaki ai matou.

19 “ ʼE ʼohofi anai ia Kate+ e he kau tagata kaihaʼa, kae ʼe ina kapu anai mo tuli natou.+

20 “ ʼE mahu* anai te pane* ʼa Asele,+ pea ʼe ina foaki anai he meʼa kai ʼe tuha mo he hau.+

21 “Ko Nefetali+ ʼe ko he tia fafine. ʼE mālie ʼana palalau.+

22 “Ko Sosefo+ ʼe ko te huli ʼo he fuʼu ʼakau ʼe fua, ko he fuʼu ʼakau ʼe ovi ki he matapuna vai pea ʼe alu ʼona vaʼa ʼi te fuga kaupa. 23 Kae neʼe tauʼi ia ia e te ʼu tagata fainahau, mo natou fana ia ia ʼaki ʼanatou kauʼi nahau pea neʼe natou fehihiʼa ia ia.+ 24 Logo la te faʼahi ʼaia, neʼe ina puke maʼu pe tana nahau,+ neʼe kei malohi ʼona nima pea neʼe vave tana fana te ʼu kauʼi nahau.+ Neʼe ko te gaue ʼaia ʼo te tagata tauhi ovi, te maka ʼo Iselaele, ia ia ʼae ʼe malohi pea ʼe tokoni kia Sakopo. 25 ʼE haʼu* mai te ʼAtua ʼo tau tamai, pea ʼe tokoni atu anai te ʼAtua kia koe. ʼE nofo mo te Mafimafi, ʼae ʼe ina tapuakiʼi anai koe ʼaki he ʼu tapuakina mai te lagi mo he ʼu tapuakina mai te ʼu vai loloto.+ Pea ʼe ina foaki atu anai he ʼu fanau ʼe kaugamalie mo he faga manu ʼe lahi. 26 ʼE lelei age anai te ʼu tapuakina ʼo tau tamai ʼi te ʼu tapuakina ʼae mai te ʼu moʼuga heʼe gata pea mo te ʼu meʼa matalelei ʼo te ʼu kiʼi moʼuga ʼae ʼe tuʼu ʼo talu ai.+ ʼE nofo anai te ʼu tapuakina ʼaia mo Sosefo, ʼei, ʼi te ʼulu ʼo ia ʼae neʼe tuku keheʼi mai ʼona tehina.+

27 “Ko Pesamino+ ʼe hage ko he lupo ʼe ina hae te ʼu manu ʼae neʼe ina puke.+ ʼI te uhu ʼe ina kai anai te manu ʼae neʼe ina puke, pea ʼi te afiafi ʼe ina vaevae anai te ʼu koloa ʼae neʼe ina maʼu.”+

28 Ko te ʼu telepi fuli ʼaia ʼe 12 ʼo Iselaele, pea ʼe ko te ʼu palalau ʼaia neʼe fai age e tanatou tamai ʼi tana tapuakiʼi natou. Neʼe ina foaki age kia natou he tapuakina neʼe tuha mo natou takitokotahi.+

29 Hili ʼaia, neʼe ina fai te ʼu fakatotonu ʼaeni kia natou: “ ʼE tuku fakatahi anai ia au mo ʼaku kui.*+ Koia, kotou ʼavaifo au ohage ko ʼaku kui ʼi te ʼana ʼae ʼe tuʼu ʼi te moʼi kele ʼo Efelone, te tagata Heti.+ 30 ʼE tuʼu te ʼana ʼaia ʼi te moʼi kele ʼo Makepela, ʼae ʼe haga ki Mamele, ʼi te fenua ʼo Kanaane. Neʼe totogi e Apalahamo te moʼi kele ʼaia kia Efelone, te tagata Heti ke tuʼu ai hona fale maka. 31 Neʼe ʼavaifo ai ia Apalahamo mo tona ʼohoana ko Sala.+ Neʼe ʼavaifo ai ia Isaake+ mo tona ʼohoana ko Lepeka, pea neʼe au ʼavaifo ai ia Lea. 32 Neʼe totogi te moʼi kele mo te ʼana ʼae ʼe tuʼu ʼi ai ki te ʼu foha ʼo Heti.”+

33 Neʼe ʼosi ai te ʼu fakatotonu ʼae neʼe fai e Sakopo ki ʼona foha. Pea neʼe takoto leva ki tona palepale. Neʼe tuku manava fakaʼosi pea neʼe tuku fakatahi leva ia ia mo ʼana kui.*+