Numelo

17 Pea neʼe ui e Sehova kia Moisese: 2 “Ke ke palalau ki te kau Iselaele pea ke toʼo he toko ʼe tahi mai te ʼu telepi takitahi, ʼei, mai te ʼu pule telepi takitahi.+ ʼE ko toko anai ʼe 12. Pea ke tohi ki ʼonatou toko takitahi ʼonatou higoa. 3 ʼE ke tohi anai te higoa ʼo Alone ʼi te toko ʼo te telepi ʼo Levi, koteʼuhi ʼe takitahi anai te pule telepi mo tona toko. 4 ʼE ke tuku anai te ʼu toko ʼaia ki te fale la ʼo te fono, ʼi te muʼa Fakamoʼoni,+ ʼae ʼe au ha tuʼumaʼu ai kia koutou.+ 5 Pea ʼe ʼi ai anai he ʼu moto ʼi te toko ʼo te tagata ʼae ka au filifili,+ pea ʼe au fakagata anai te ʼu muhumuhu ʼae ʼe fai e te kau Iselaele kia te au pea mo koe.”+

6 Pea neʼe palalau ai ia Moisese ki te kau Iselaele pea neʼe foaki age e te ʼu pule fuli ʼonatou toko. Neʼe takitahi te pule mo tona toko, koia neʼe ko toko ʼe 12, pea neʼe toe ʼi ai mo te toko ʼo Alone. 7 Neʼe tuku leva e Moisese te ʼu toko ia muʼa ʼo Sehova, ʼi te fale la ʼo te Fakamoʼoni.

8 ʼI te ʼaho ake, ʼi te hu ʼa Moisese ki te fale la ʼo te Fakamoʼoni, neʼe kua ʼi ai he ʼu moto ʼi te toko ʼo Alone, ʼae ʼo te telepi ʼo Levi. Neʼe ʼi ai ni moto, mo ni matalaʼi ʼakau, pea mo ni fuaʼi amatie kua momoho. 9 Neʼe toʼo leva e Moisese te ʼu toko fuli ʼae neʼe tuku ia muʼa ʼo Sehova, ʼo ʼave ki te hahaʼi fuli ʼo Iselaele. Neʼe natou sisio ki ai, pea neʼe tahi toʼo e te tagata tona toko.

10 Pea neʼe ui e Sehova kia Moisese: “Toe ʼave te toko ʼo Alone+ ʼo tuku ki te muʼa Fakamoʼoni, ke taupau ohage ko he fakatokaga+ ki te hahaʼi agatuʼu,+ ke gata ai tanatou muhumuhu kia te au pea ke mole natou mamate ai.” 11 Neʼe fai atu aipe e Moisese ohage ko tona fakatotonu age e Sehova. Neʼe mulimuli lelei pe ki ai.

12 Neʼe ui leva e te kau Iselaele kia Moisese: “ ʼE matou mamate anai! ʼE matou mamate moʼoni anai, ʼe matou mamate fuli anai! 13 Ko he tahi pe ʼe fakaovi ki te tapenakulo ʼo Sehova, ʼe mate anai!+ He koʼe ʼe tonu anai ke matou mamate fuli?”+