Lua Samuele

12 Pea neʼe fekauʼi leva e Sehova ia Natane+ ke alu kia Tavite.+ Neʼe alu ki ai ʼo ina ui age: “Neʼe ʼi ai te ʼu tagata ʼe toko lua ʼi he kolo, pea neʼe maʼu koloa te tahi kae masiva te tahi. 2 Neʼe lahi te faga ovi mo te faga pipi ʼa te tagata maʼu koloa.+ 3 Kae neʼe mole he meʼa ʼa te tagata masiva, gata pe ki te kiʼi akeno fafine ʼe tahi neʼe ina totogi.+ Neʼe tokaga ki ai, pea neʼe lahilahi ake mo ia mo ʼona foha. Neʼe mole lahi tana meʼa kai, kae neʼe ina fafaga ia ia ʼaki pe te meʼa ʼae neʼe ina maʼu, neʼe inu ʼi tona ipu pea neʼe moe ʼi ʼona nima. Neʼe kua hage pe ki te tagata ko hona ʼofafine. 4 Ki muli age, neʼe tau mai he tahi ki te ʼapi ʼo te tagata maʼu koloa. Neʼe mole ina fia toʼo hana ovi peʼe ko hana pipi moʼo teuteuʼi ʼaki he meʼa kai ʼa te tagata ʼae neʼe haʼu kio ia. Kae neʼe ina toʼo te kiʼi akeno fafine ʼa te tagata masiva, ʼo ina teuteuʼi maʼa te tagata ʼae neʼe haʼu kio ia.”+

5 Neʼe kovi ʼosi ai te ita ʼo Tavite, pea neʼe ina ui kia Natane: “ ʼE au tala moʼoni atu ia muʼa ʼo Sehova, te ʼAtua maʼuli,+ ʼe tonu ke matehi te tagata ʼae neʼe ina fai te meʼa ʼaia! 6 Pea ʼe tonu anai ke ina liufaki age ʼo tuʼa fa te totogi ʼo te akeno fafine,+ he neʼe mole manavaʼofa ʼi tana fai te faʼahi ʼaia.”

7 Neʼe ui age leva e Natane kia Tavite: “ ʼE ko koe te tagata ʼaia! Pea koʼeni te folafola ʼa Sehova, te ʼAtua ʼo Iselaele: ‘Neʼe au fakanofo koe ko te hau ʼo Iselaele,+ pea neʼe au haofaki koe mai te ʼu nima ʼo Saulo.+ 8 Neʼe au fia tuku atu ki ʼou nima ia te fale ʼo tou pule+ mo ʼona ʼohoana,+ pea neʼe au foaki atu te pule ki Iselaele mo Suta.+ Pea ʼe mole gata ai, neʼe toe lahi age te ʼu meʼa ʼae neʼe au fia fai maʼa koe.+ 9 He koʼe koa neʼe ke meʼa noaʼi te folafola ʼa Sehova, ʼo ke fai te meʼa ʼae ʼe kovi ki ʼona mata? Neʼe ke matehi ia Ulia, te tagata Heti ʼaki te heleta.+ Pea neʼe ke toʼo leva tona ʼohoana ke liliu ko hou ʼohoana,+ ʼi tau ʼosi matehi ia ia ʼaki te heleta ʼa te kau Amone.+ 10 ʼI te temi leva ʼaeni, ʼe tamateʼi anai te tokolahi ʼi tou famili,+ he neʼe ke meʼa noaʼi ia au ʼi tau toʼo te ʼohoana ʼo Ulia, te tagata Heti, ke liliu ko hou ʼohoana.’ 11 Koʼeni te folafola ʼa Sehova: ‘ ʼE au fakatupu anai he ʼu malaʼia kia koe pea ʼe haʼu anai mai tou famili ʼo koe totonu.+ ʼE au toʼo anai ʼi ʼou muʼa ʼou ʼohoana ʼo foaki ki he tahi age tagata,+ pea ʼe momoe anai mo natou ia muʼa ʼo te hahaʼi fuli.+ 12 Neʼe ke fai fakafufu te ʼu meʼa ʼaia,+ kae ʼe au fai anai au ia muʼa ʼo Iselaele katoa pea mo te hahaʼi fuli.’ ”

13 Neʼe ui age leva e Tavite kia Natane: “Neʼe au agahala kia Sehova.”+ Neʼe tali e Natane kia Tavite: “ ʼE fakamolemole e Sehova tau agahala.*+ ʼE mole ke mate anai.+ 14 Kae neʼe mole ke fakaʼapaʼapa kia Sehova ʼi te aluʼaga ʼaia, koia ʼe mate anai tou foha ʼae kua fanauʼi.”

15 Neʼe toe liliu leva ia Natane ki tona ʼapi.

Pea neʼe fakatupu e Sehova he mahaki ki te tamasiʼi ʼae neʼe fanauʼi e te ʼohoana ʼo Ulia kia Tavite. 16 Neʼe kole mamahi e Tavite ki te ʼAtua moʼoni ke ina haofaki te tamasiʼi. Neʼe sesunio ia Tavite pea neʼe ulu ki tona koga fale ʼo takoto ki lalo ʼi te po katoa.+ 17 Neʼe ʼomai te kau takitaki ʼo tona fale hau ʼo natou faigaʼi ke tuʼu ake, kae neʼe fakafisi ia pea neʼe mole fia kai fakatahi mo natou. 18 ʼI te fitu ʼaho, neʼe mate ai te tamasiʼi. Kae neʼe tuʼania te ʼu tagata faifekau ʼa Tavite ʼi te fakaha age kua mate te tamasiʼi. Neʼe natou ui: “ ʼI te kei maʼuli ʼa te tamasiʼi, neʼe tou palalau age kia ia, kae neʼe mole fakalogo mai. ʼE lava feafeaʼi hatatou fakaha age ki ai kua mate te tamasiʼi? ʼE lagi ina fai anai he meʼa ʼe kovi.”

19 Neʼe tokagaʼi leva e Tavite te fefanafanaʼaki ʼo ʼana hahaʼi faifekau, pea neʼe mahino ai kua mate te tamasiʼi. Neʼe fehuʼi e Tavite ki ʼana hahaʼi faifekau: “ ʼE kua mate te tamasiʼi?” Neʼe natou tali age: “ ʼEi, kua mate.” 20 Neʼe tuʼu ake ai leva ia Tavite, ʼo alu ʼo maʼanu, mo vali tona moʼi lolo,+ mo fetogi ʼona mutuʼi meʼa, pea neʼe alu ki te fale+ ʼo Sehova ʼo tulolo ai. Hili ʼaia, neʼe alu ki tona fale hau, ʼo kole ke ʼaumai hana meʼa kai, pea neʼe kai. 21 Neʼe fehuʼi leva e ʼana hahaʼi faifekau ki ai: “Kotea koa te fakaʼuhiga ʼo te meʼa ʼaeni neʼe ke fai? ʼI te kei maʼuli ʼa te tamasiʼi, neʼe ke sesunio pea mo tagi. Kae ʼi te mate leva ʼa te tamasiʼi, kua ke tuʼu ake ʼo kai.” 22 Neʼe ina tali age: “ ʼI te kei maʼuli ʼa te tamasiʼi, neʼe au sesunio+ mo tagi, he neʼe au ui ʼi toku loto: ‘Ko ai ʼae ʼe ina iloʼi, naʼa meʼa age pe ʼe ʼofa anai ia Sehova ia au ʼo tuku ke maʼuli te tamasiʼi.’+ 23 Kae ʼi tana kua ʼosi mate, ʼe kei ʼi ai koa he ʼaoga ke au sesunio ai? ʼE feala koa ke au fakamaʼuli ake?+ ʼE au alu anai kia ia,+ kae ʼe mole toe liliu mai ia kia au.”+

24 Neʼe fakafimalieʼi leva e Tavite ia Pate-sepa,+ tona ʼohoana. Pea neʼe alu ʼo momoe mo ia. Ki muli age, neʼe ina fanauʼi he tamasiʼi tagata, pea neʼe fakahigoa ko Salomone.*+ Neʼe ʼofa ia Sehova ia ia,+ 25 pea neʼe ina fakaha age ʼaki te polofeta ko Natane+ ke fakahigoa ia ia ko Setitesa,* he neʼe ʼofa ia Sehova ia ia.*

26 Neʼe hoko atu te tauʼi e Soape ia Lapa,+ te kolo ʼo te kau Amone,+ pea neʼe ina toʼo leva te kolo hau* ʼaia.+ 27 Neʼe fekauʼi e Soape he kau tagata ʼave logo ke olo kia Tavite ʼo ui ki ai: “Neʼe au tauʼi ia Lapa+ pea neʼe au toʼo te kolo ʼo te ʼu vai.* 28 ʼI te lakaga leva ʼaeni, fakatahiʼi te toe ʼo te kau solia, pea kotou ʼomai ʼo tauʼi mo toʼo te kolo. Koteʼuhi, kapau ʼe mole ke fai te faʼahi ʼaia, ʼe ko au ʼae ka ina toʼo te kolo, pea ʼe vikiʼi anai ia au ʼuhi ko te faʼahi ʼaia.”

29 Neʼe fakatahiʼi ai e Tavite te kau solia fuli, ʼo natou olo ai ki Lapa ʼo tauʼi mo toʼo te kolo. 30 Neʼe ina toʼo te pale fakahau ʼae neʼe ʼi te ʼulu ʼo Malekame. Ko tona mamafa neʼe ko he taleta* aulo ʼe tahi, pea neʼe teuteuʼi ʼaki ni maka maʼuhiga. Neʼe hili leva te pale ʼaia ki te ʼulu ʼo Tavite. Neʼe ina toe toʼo foki he ʼu tuʼuga koloa+ mai te kolo.+ 31 Neʼe ina ʼave te hahaʼi ʼae neʼe nonofo ʼi ai ʼo fakagaueʼi. Ko ʼihi neʼe ta maka, ko ʼihi neʼe gaue mo he ʼu meʼa gaue ukamea mo masila pea mo ni toki ukamea, ko ʼihi leva neʼe faʼu piliki. Neʼe ina fai te faʼahi ʼaia ki te ʼu kolo fuli ʼo te kau Amone. Neʼe toe liliu leva ia Tavite mo te kau solia fuli ki Selusalemi.