ʼUluaki Koloniko

17 ʼI te temi pe ʼae neʼe kua nofo ai ia Tavite ʼi tona fale,* neʼe ina ui kia Natane+ te polofeta: “Koʼeni ʼe au nofo ʼi he fale neʼe faʼu ʼaki te ʼakau ko te sete,+ kae tuku te aleka ia ʼo te fuakava ʼo Sehova ʼi he fale la.”+ 2 Neʼe tali age e Natane kia Tavite: “Fai te meʼa ʼae ʼe ke loto ki ai, he ʼe nofo ia te ʼAtua moʼoni mo koe.”

3 ʼI te po pe ʼaia, neʼe ui e te ʼAtua kia Natane: 4 “Alu pea ke ui ki taku tagata faifekau ko Tavite: ‘Koʼeni te folafola ʼa Sehova: “ ʼE mole ko koe anai ʼae ka ina laga he fale ke au nofo ai.+ 5 Neʼe mole au nofo ʼi he fale talu mai te ʼaho ʼae neʼe au fakamavae ai ia Iselaele mai Esipito ʼo kaku mai ki te ʼaho nei, kae neʼe au nofo tuʼumaʼu pe ’i te ʼu fale la pea mo te ʼu tapenakulo.*+ 6 ʼI te temi fuli ʼae neʼe au nofo ai mo te kau Iselaele, neʼe au palalau koa ʼo ʼuhiga mo te faʼahi ʼaia ki te ʼu tuʼi fakamau ʼo Iselaele ʼae neʼe au fakanofo ke tokaga ki taku hahaʼi? Neʼe au fehuʼi age koa pe koʼe neʼe mole natou laga hoku fale ʼaki te ʼakau ʼae ko te sete?” ’

7 “Koia, ʼi te temi ʼaeni, ui age ki taku tagata faifekau ko Tavite: ‘Koʼeni te folafola ʼa Sehova ʼo te ʼatu kautau: “Neʼe au toʼo koe mai te ʼu koga meʼa ʼae neʼe ke taupau ai te faga ovi, ʼae neʼe ke muliʼi, ke ke liliu ko te tagata takitaki ʼo taku hahaʼi ko Iselaele.+ 8 ʼE au nofo anai mo koe ʼi te ʼu faʼahi fuli pe ʼae ʼe ke alu ki ai,+ pea ʼe au pulihi anai ʼou fili fuli ʼi ʼou muʼa.+ ʼE au fakaliliu anai tou higoa ke hage ko te higoa ʼo te kau tagata iloa ʼo te kele.+ 9 ʼE au foaki anai ki taku hahaʼi ko Iselaele ia he koga meʼa ke natou nonofo ai, pea ʼe natou maʼuʼuli anai ʼi ai pea ʼe mole toe ʼi ai anai he maveuveu. ʼE mole gaohi koviʼi anai natou e he hahaʼi agakovi, ohage ko tanatou fai ʼi te temi muʼa,+ 10 talu mai te ʼaho ʼae neʼe au fakanofo ai he kau tuʼi fakamau ki taku hahaʼi ko Iselaele.+ ʼE au malo anai ʼi ʼou fili fuli.+ ʼE au tala atu: ‘ ʼE fakaliliu anai e Sehova tou famili ko he hologa hau.’*

11 “ ‘ “Ka ke mate pea moka tanu koe mo ʼau kui, ʼe au fakanofo hau anai he tahi ʼi ʼou foha, ia tou hakoga,+ pea ʼe au fakatuʼu anai ke malohi tana pule fakahau.+ 12 ʼE ko ia ʼae ka ina laga hoku fale,+ pea ʼe au fakatuʼu anai tona hekaʼaga fakahau ke malohi ʼo talu ai.+ 13 ʼE au liliu anai ko tana tamai, pea ʼe liliu anai ko toku foha.+ ʼE mole au toʼo kehe anai mai ia ia toku ʼofa agatonu,+ ohage ko taku fai ki te tagata ʼae neʼe muʼamuʼa ia koe.+ 14 ʼE au fakanofo anai ia ia ki toku hekaʼaga fakahau ʼo he’e gata,+ pea ʼe tuʼu anai tana pule pea mo tona hologa hau ʼo talu ai.” ’ ”+

15 Neʼe fakaha e Natane kia Tavite te ʼu folafola fuli ʼaia pea mo te ʼu meʼa fuli ʼae neʼe ha age kia ia.

16 Neʼe haʼu leva te Hau ko Tavite ʼo nofo ia muʼa ʼo Sehova ʼo ina ui: “Sehova e, toku ʼAtua, ko ai koa ia au? Pea ko ai koa toku famili, ke au tuha ai mo te ʼu meʼa ʼae neʼe ke fai maʼaku?+ 17 Pea ʼe mole gata ai, siʼoku ʼAtua, he ʼe ke toe palalau foki ʼo ʼuhiga mo te ka haʼu ʼo toku famili, Sehova e, toku ʼAtua,+ neʼe au hage kia koe ko he tagata ʼe tonu ke fakamaʼuhigaʼi.* 18 Kotea la he tahi age palalau ʼe feala ke au fai atu? Ko au ʼaeni ko tau tagata faifekau ko Tavite, ʼo ʼuhiga mo tau fakamaʼuhigaʼi au, kae kua ke iloʼi lelei pe ia au.+ 19 Sehova e, neʼe ke fai te ʼu meʼa lalahi fuli ʼaia ʼo ke fakaha ai tou maʼoluga, ʼuhi ko au pea neʼe ko te meʼa ʼaia neʼe ke loto ki ai.*+ 20 Sehova e, ʼe mole he tahi ʼe hage ko koe,+ ʼe mole he tahi age ʼAtua.+ ʼE fakamoʼoni ki ai te ʼu meʼa fuli ʼae neʼe matou logo ki ai. 21 ʼE ʼi ai koa he tahi age puleʼaga ʼi te kele ʼe hage ko tau hahaʼi ko Iselaele?+ Neʼe alu te ʼAtua moʼoni ʼo totogi mai natou ke natou liliu ko tana hahaʼi.+ Neʼe iloa tou huafa ʼuhi ko ʼau gaue lalahi mo fakamanavahe,+ ʼi tau haga ʼae ʼo kapu te ʼu puleʼaga ia muʼa ʼo tau hahaʼi,+ ʼae neʼe ke totogi mai Esipito. 22 Neʼe ke fakaliliu ia Iselaele ko tau hahaʼi ʼo heʼe gata.+ Sehova e, neʼe ke liliu ko tonatou ʼAtua.+ 23 Pea ʼi te lakaga nei, Sehova e, taupau ʼo talu ai te fakapapau ʼae neʼe ke fai ʼo ʼuhiga mo au mo toku famili.* Fakalelei siʼou loto, fakahoko tau fakapapau.+ 24 ʼOfa pe ke tuʼu fualoa* tou huafa pea ke fakakololiaʼi+ ʼo talu ai, ke ui ai e te hahaʼi: ‘Ko Sehova ʼo te ʼatu kautau, te ʼAtua ʼo Iselaele, ʼe ko he ʼAtua moʼoni ia ki Iselaele.’ ʼOfa pe ke tuʼu malohi toku famili* ʼi ʼou muʼa.+ 25 Koteʼuhi ko koe, siʼoku ʼAtua, neʼe ke fakaha mai tau fakatuʼutuʼu ʼae ke ke fakaliliu toku famili ko he hologa hau. Koia ʼe au lotofalala ai ʼi taku fai atu ia te faikole ʼaeni. 26 Sehova e, ko koe te ʼAtua moʼoni, neʼe ke fakapapau te ʼu meʼa lelei ʼaia ka hoko kia au ʼaeni ko tau tagata faifekau. 27 Koia, ʼofa pe ke ke lotolelei ʼo tapuakiʼi toku famili* pea ke tuʼu ʼi ʼou muʼa ʼo talu ai. Koteʼuhi ko koe, Sehova e, neʼe ke tapuakiʼi toku famili* pea ʼe maʼu tapuakina anai ʼo talu ai.”