Tuʼi Fakamau

16 ʼI te tahi ʼaho, neʼe alu ia Samisoni ki Kasa. Neʼe sio ki he fafine paomutu ʼi ai pea neʼe hu kio ia. 2 Neʼe fakaha ki te hahaʼi ʼo Kasa: “ ʼE ʼi heni ia Samisoni!” Neʼe natou ʼa takai ai ia te kolo pea mo fenonoʼi ʼi te po katoa ʼi te matapa ʼo te kolo. Neʼe mole natou fai he meʼa ʼi te po katoa ʼaia, he neʼe natou ui: “ ʼE tou matehi anai ia ia ʼi te hopo ake ʼo te laʼa.”

3 Kae neʼe takoto ia Samisoni ʼi te ʼapi ʼo te fafine ʼaia, ʼo kaku ki te maʼupo. Pea neʼe tuʼu ake leva ʼi te maʼupo ʼo alu ʼo taʼaki te matapa ʼo te kolo, mo ʼona kaumatapa ʼe lua pea mo tona ʼakau fakalava. Neʼe ina hili ki ʼona fuga ʼuma pea mo ina ʼamo ʼo kaku ki te tumutumu ʼo te moʼuga ʼae ʼe haga ki Hepelone.

4 Hili ʼaia, neʼe manako leva ʼi he fafine neʼe nofo ʼi te Vai Tafe* ʼo Soleki. Neʼe higoa ko Talila.+ 5 Pea neʼe olo te ʼu pule ʼo te kau Filisitini ki te fafine ʼaia, ʼo ui age ki ai: “Fakaoloolo* ia ia+ ke ina fakaha atu pe ʼe haʼu maifea tona malohi, pea ʼe feafeaʼi hamatou puke ia ia ʼo haʼi. Kapau ʼe ke fai te faʼahi ʼaia, ʼe matou tahi foaki atu anai he ʼu piesi siliva ʼe 1 100.”

6 Ki muli age, neʼe kole e Talila kia Samisoni: “Fakalelei siʼou loto, ke ke fakaha mai pe ʼe haʼu maifea tou malohi. Kotea ʼae ʼe tonu ke haʼi ʼaki ia koe ke ʼaua naʼa ke hola?” 7 Neʼe tali age e Samisoni ki ai: “Kapau ʼe haʼi au ʼaki he ʼu maea ʼe fitu ʼo he nahau neʼe heʼeki fakaʼaogaʼi pea heʼeki fakamoamoa, ʼe au liliu anai ʼo vaivai ohage pe ko te tagata fuli.” 8 Neʼe ʼaumai ai e te ʼu pule ʼo te kau Filisitini kia Talila he ʼu maea ʼe fitu ʼo he nahau neʼe heʼeki fakaʼaogaʼi pea heʼeki fakamoamoa. Pea neʼe ina haʼi ʼaki leva ia ia. 9 Neʼe ʼi ai ni tagata neʼe fenonoʼi ʼi he koga fale taupotu. Pea neʼe kalaga ia Talila: “Samisoni, koʼeni te kau Filisitini!” Kae neʼe faigafua pe tana motumotuhi te ʼu maea ʼo te nahau, ohage pe ko te mavete ʼo he filo lino moka lave ki te afi.+ Koia neʼe mole iloʼi ai e he tahi pe neʼe haʼu maifea tona malohi.

10 Pea neʼe ui e Talila kia Samisoni: “Neʼe ke kakaʼi* pea mo loiʼi au. Fakalelei siʼou loto, ke ke fakaha mai ʼi te temi nei pe kotea ʼae ʼe feala ke haʼi ʼaki koe.” 11 Neʼe ina tali age ki ai: “Kapau ʼe haʼi au ʼaki he ʼu maea foʼou neʼe heʼeki fakaʼaogaʼi, ʼe au liliu anai ʼo vaivai ohage pe ko te tagata fuli.” 12 Neʼe toʼo ai e Talila he ʼu maea foʼou ʼo haʼi ʼaki ia ia, pea neʼe kalaga: “Samisoni, koʼeni te kau Filisitini!” (ʼI te temi ʼaia, neʼe fenonoʼi ni tagata ʼi he koga fale taupotu.) Kae neʼe ina motumotuhi te ʼu maea ʼae neʼe haʼi ʼaki ʼona nima ohage pe ko he ʼu filo.+

13 Hili ʼaia, neʼe ui e Talila kia Samisoni: “Neʼe ke kakaʼi pea mo loiʼi au,+ ʼo kaku mai ki te temi nei. Ke ke fakaha mai pe kotea ʼae ʼe feala ke haʼi ʼaki koe.” Pea neʼe ina tali age ki ai: “ ʼE tonu ke ke fi fakatahi te ʼu kauʼi fi ʼe fitu ʼo toku lauʼulu mo he filo ʼe lalaga ʼaki he kie.” 14 Neʼe ina fakamaʼumaʼu leva te ʼu kauʼi fi ʼaki he moʼi ʼakau, pea neʼe kalaga: “Samisoni, koʼeni te kau Filisitini!” Neʼe ʼala ake leva ia Samisoni ʼo tohoʼi te moʼi ʼakau pea mo te filo ʼae ʼe lalaga ʼaki he kie.

15 Pea neʼe ui age e Talila ki ai: “ ʼE ke ui mai ʼe ke ʼofa ia au,+ kae ʼe mole ke fakaha mai pe la te meʼa ʼae ʼi tou loto. Ko te tuʼa tolu ʼaeni ʼo tau kakaʼi au pea mo tau mole fakaha mai pe ʼe haʼu maifea tou malohi.”+ 16 Neʼe ina fakakinauʼi ia ia ʼi te ʼaho fuli pe ke palalau. Koia neʼe fiu ʼosi ai ia Samisoni.+ 17 Neʼe ina fakaha age leva te meʼa ʼae ʼi tona loto, ʼo ina ui age ki ai: “Neʼe heʼeki kosi toku ʼulu koteʼuhi ko au ko he Nasilea ʼa te ʼAtua talu mai taku tupu.*+ Kapau ʼe kosi toku ʼulu, ʼe puli anai toku malohi pea ʼe au liliu anai ʼo vaivai ohage pe ko te tagata fuli.”

18 Neʼe sio ia Talila kua ina fakaha age te meʼa ʼae ʼi tona loto. Pea neʼe ina pauʼi atu aipe te ʼu pule ʼo te kau Filisitini,+ ʼo ina ui: “Kua feala hakotou ʼomai ʼi te temi nei, koteʼuhi kua ina fakaha mai te meʼa ʼae ʼi tona loto.” Neʼe ʼomai ai te ʼu pule ʼo te kau Filisitini kio ia mo te paʼaga ʼae neʼe natou fakapapauʼi age ki ai. 19 Neʼe ina fakamoe ia Samisoni ʼi ʼona fuga pea neʼe ina pauʼi he tagata ke haʼu ʼo tuʼusi te ʼu kauʼi fi ʼe fitu ʼo tona lauʼulu. Neʼe puli mamalie ai te malohi ʼo Samisoni pea neʼe lava puke ai ia ia e Talila. 20 Pea neʼe kalaga ia Talila: “Samisoni, koʼeni te kau Filisitini!” Neʼe ʼala ake pea neʼe ina ui: “ ʼE mole hoko anai he meʼa kia au he ʼe ohage pe ko te mahani ʼe au lava hola pe.”+ Kae neʼe mole ina iloʼi neʼe mole kei nofo ia Sehova mo ia. 21 Neʼe puke leva ia ia e te kau Filisitini, pea neʼe natou kapeʼi ʼona foʼi mata. Pea neʼe natou ʼave ia ia ki Kasa ʼo haʼi ʼaki he ʼu seini kapa ʼe lua. Pea neʼe ina mio te maka momosi fulumeto ʼi te fale pilisoni. 22 Kae neʼe toe loloa leva tona lauʼulu ʼi tona ʼosi kosi.+

23 ʼI te tahi ʼaho, neʼe fakatahitahi te ʼu pule ʼo te kau Filisitini ke natou momoli he sakilifisio lahi ki tonatou ʼatua ko Takone+ mo fakafiafia. Neʼe natou ui: “Kua tuku mai e totatou ʼatua ia Samisoni, totatou fili ki ʼotatou nima!” 24 ʼI te sisio ʼa te kau Filisitini ki te fakatata, neʼe natou vikiʼi ai tonatou ʼatua pea mo ui: “Kua tuku mai e totatou ʼatua ia totatou fili ki ʼotatou nima, ia ia ʼae neʼe ina maumauʼi totatou fenua+ mo matehi he kaugamalie.”+

25 ʼI tanatou fiafia ʼaia, neʼe natou ui: “Ke ʼaumai ia Samisoni ke tou kokolo muʼa.” Neʼe ʼaumai ai ia Samisoni mai te fale pilisoni. Neʼe natou fakatuʼu ia ia ʼi te vaha ʼo he ʼu pou. 26 Pea neʼe ui e Samisoni ki te tama ʼae neʼe ina puke tona nima: “Tokoni mai ke feala haku fāfā ki te ʼu pou tafito ʼe lua ʼo te fale lotu* pea ke au falanaki ki ai.” 27 (Pea neʼe fonu te fale lotu* ko te hahaʼi tagata mo fafine. Neʼe nonofo ʼi ai te ʼu pule fuli ʼo te kau Filisitini, pea ko te toko 3 000 tagata mo fafine ʼi te fuga fale, ʼo mamata mai ai ki tonatou fakafiafiaʼi e Samisoni.)

28 Neʼe tagi leva ia Samisoni+ kia Sehova: “Fakalelei siʼou loto, Tuʼi ʼAliki ko Sehova, ke ke manatuʼi au pea mo ke foaki mai te malohi+ ʼi te faiʼaga pe ʼaeni! Fakalelei siʼou loto, siʼoku ʼAtua, tokoni mai ke au fai he lagavaka ki te kau Filisitini ʼuhi ko hoku foʼi mata ʼe tahi.”+

29 Neʼe tuʼu malohi ia Samisoni ʼi te vaha ʼo te ʼu pou tafito ʼe lua ʼae ʼe tuʼu ʼi lotomalie ʼo te fale lotu. Neʼe fa leva tona nima mataʼu ki te tahi pou pea mo tona nima hema ki te tahi age pou, pea neʼe ina leʼei leva. 30 Neʼe kalaga ai ia Samisoni: “Ke au mate mo te kau Filisitini!” Neʼe ina leʼei leva te ʼu pou ʼi tona malohi katoa, ʼo holo ai te fale lotu* ki te ʼu pule mo te hahaʼi fuli ʼae neʼe nonofo ʼi ai.+ Koia neʼe kaugamalie age ia natou ʼae neʼe matehi e Samisoni ʼi te ʼaho ʼaia, ia natou ʼae neʼe ina tamateʼi ʼi tona temi maʼuli.+

31 Ki muli age, neʼe ʼomai ʼona tehina mo te famili katoa ʼo tana tamai ʼo toʼo tona sino. Neʼe natou ʼave ai ʼo ʼavaifo ʼi te fale maka ʼo Manoa,+ tana tamai, ʼi te vaha ʼo Solea+ pea mo Esetaoli. Neʼe fakamauʼi e Samisoni ia Iselaele lolotoga taʼu ʼe 20.+