Tuʼi Fakamau

8 Pea neʼe ui e te ʼu tagata ʼo Efalaimi kia Seteone: “Kotea te meʼa ʼaeni neʼe ke fai kia matou? He koʼe neʼe mole ke pauʼi mai ʼi tau alu ʼae ʼo tauʼi te kau Matiane?”+ Neʼe kovi ʼosi tanatou haga ʼo munaʼi ia ia.+ 2 Kae neʼe ina tali age kia natou: “ ʼE ko he meʼa noa ia te meʼa ʼae neʼe au fai moka fakatatau atu ki te meʼa ʼae neʼe kotou fai. ʼE mole lelei age koa la te tae vite ʼa Efalaimi+ ʼi te toli vite ʼa Apiesele?+ 3 Neʼe tuku atu e te ʼAtua ia Olepi pea mo Sepi,+ ia te ʼu pule ʼo Matiane ki ʼokotou nima. Koia ʼe ko he meʼa noa ia te meʼa ʼae neʼe au fai.” ʼI tana ʼosi fai te ʼu palalau ʼaia, neʼe malū ifo ai tonatou ita.

4 Neʼe tau leva ia Seteone ki te Solotane pea neʼe fakalaka ai. Neʼe kua gaʼegaʼe ia Seteone pea mo te ʼu tagata ʼe toko 300 ʼae neʼe fakatahi mo ia, kae neʼe hoko atu pe tanatou tuli ʼonatou fili. 5 Pea neʼe ina ui ki te ʼu tagata ʼo Sukoti: “Fakalelei siʼokotou loto, kotou foaki ni foʼi pane ki te kau solia ʼae ʼe fakatahi mo au, koteʼuhi kua natou gaʼegagaʼe pea ʼe matou tuli ia Sepaki pea mo Salamuna, te ʼu hau ʼo Matiane.” 6 Kae neʼe tali age e te ʼu pule ʼo Sukoti ki ai: “He koʼe ʼe tonu ke matou foaki ni foʼi pane ki ʼau tagata solia? Kua ke puke koa ia Sepaki pea mo Salamuna?” 7 Pea neʼe ui e Seteone: “Ka tuku mai anai e Sehova ia Sepaki pea mo Salamuna ki ʼoku nima, ʼe au haha anai koutou ʼaki ni ʼakau talatala ʼo te toafa.+ ʼE au fai anai te faʼahi ʼaia ʼuhi ko takotou fai te ʼu palalau ʼaena.” 8 Neʼe mavae leva mai ai ʼo hake ki Penuele. Neʼe ina toe fai te kole ʼaia ki te ʼu tagata ʼo Penuele, kae neʼe toe hage pe tanatou tali ko te tali ʼae neʼe fai age e te ʼu tagata ʼo Sukoti. 9 Koia neʼe ina ui ki te ʼu tagata ʼo Penuele: “Ka au toe liliu mai anai ʼi te tokalelei, ʼe au maumauʼi anai te tule ʼo tokotou kolo.”+

10 Neʼe nonofo ia Sepaki pea mo Salamuna ʼi Kalekoli mo ʼanā solia, neʼe ko tagata ʼe teitei toko 15 000. Neʼe ko natou pe ʼae neʼe kei toe ʼi te foʼi kautau katoa ʼo te Hahaʼi ʼo Te Potu Esite,+ he neʼe matehi ni tagata ʼe toko 120 000 ʼae neʼe toʼo heleta. 11 Neʼe hake ai ia Seteone ʼi te ala ʼae ʼe olo ai te hahaʼi ʼae ʼe nonofo ʼi te ʼu fale la, ʼi te potu esite ʼo Nopaki pea mo Sokepea,+ pea neʼe ina ʼohofi te nofoʼaga ʼo te kau solia. Neʼe manatu ia te kau solia ʼe natou maʼuli fimalie ʼi te nofoʼaga ʼaia. 12 Pea neʼe feholaki te ʼu hau ʼe lua ʼo Matiane, ʼae ko Sepaki pea mo Salamuna, kae neʼe tuli leva naua e Seteone ʼo ina puke ai naua. Pea neʼe maveuveu ia te nofoʼaga katoa.

13 Neʼe toe liliu leva ia Seteone, te foha ʼo Soasi mai te tau, ʼo alu ʼi te kiʼi ala ʼae ʼe hake ki Helesi. 14 ʼI tana alu ʼaia, neʼe ina puke he tama tupulaga mai Sukoti pea mo ina fakafehuʼi ia ia. Neʼe tohi age e te tama tupulaga ʼaia te ʼu higoa ʼo te kau pule pea mo te kau takitaki ʼo Sukoti, neʼe ko tagata ʼe toko 77. 15 Pea neʼe alu ia Seteone ki te ʼu tagata ʼo Sukoti, ʼo ui age kia natou: “Koʼeni ia Sepaki pea mo Salamuna, ʼae neʼe kotou manukiʼi ai ia au ʼo ui: ‘Kua ke puke koa ia Sepaki pea mo Salamuna ke tupu ai hamatou foaki he ʼu foʼi pane ki ʼau tagata ʼae kua gaʼegagaʼe?’ ”+ 16 Neʼe ina ʼave leva te kau takitaki ʼo te kolo, pea neʼe ina tauteaʼi te ʼu tagata ʼaia ʼo Sukoti ʼo ina haha ai natou ʼaki he ʼu ʼakau talatala ʼo te toafa.+ 17 Hili ʼaia, neʼe ina maumauʼi te tule ʼo te kolo ko Penuele+ mo ina matehi te ʼu tagata ʼo te kolo ʼaia.

18 Pea neʼe ina fehuʼi kia Sepaki pea mo Salamuna: “Neʼe feafeaʼi te ʼu tagata ʼae neʼe kolua matehi ʼi te Moʼuga ʼo Tapole?” Neʼe nā tali age: “Neʼe natou hage pe ko koe, neʼe natou hage fuli pe ko he ʼu foha ʼo ni hau.” 19 Pea neʼe ina ui leva: “Neʼe ko ʼoku tehina ʼaia, te ʼu tama ʼo taku faʼe. ʼE au tala moʼoni atu ia muʼa ʼo Sehova, te ʼAtua maʼuli, ka na neʼe kolua tuku la ke natou maʼuʼuli, ka na ʼaua la ʼe mole au matehi anai ia koulua.” 20 Pea neʼe ina ui kia Setele, tona foha lahi: “Haʼu ʼo matehi ia naua.” Kae neʼe mole tohoʼi ake e te tama tupulaga ʼaia tana heleta. Neʼe mataku koteʼuhi neʼe kei tupulaga ia. 21 Pea neʼe ui e Sepaki pea mo Salamuna: “Haʼu ia koe totonu ʼo matehi ia maua, koteʼuhi ʼe iloga pe te maʼuhiga ʼo he tagata ʼi tona malohi.” Neʼe alu ai ia Seteone ʼo matehi ia Sepaki pea mo Salamuna.+ Hili ʼaia, neʼe ina toʼo te ʼu meʼa matalelei* ʼae neʼe tautau ʼi te ʼu kia ʼo ʼanā kamelo.

22 Ki muli age, neʼe ui e te ʼu tagata ʼo Iselaele kia Seteone: “Ke ke pule kia matou, ʼo feia mo tou foha pea mo tou mokopuna koteʼuhi neʼe ke haofaki matou mai te ʼu nima ʼo te kau Matiane.”+ 23 Kae neʼe tali age e Seteone kia natou: “ ʼE mole au pule anai kia koutou, pea ʼe mole pule anai toku foha kia koutou. ʼE ko Sehova ʼae ka pule anai kia koutou.”+ 24 Neʼe hoko atu e Seteone: “ ʼE ko te meʼa pe ʼe tahi ʼe au fia kole atu: Ke kotou tahi foaki mai he mama ʼe ʼai ki te ihu, neʼe kotou toʼo mai ʼokotou koloa.” (Koteʼuhi neʼe maʼu e ʼonatou fili he ʼu mama aulo ʼe ʼai ki te ihu he neʼe ko he kau Isemaele.)+ 25 Neʼe natou ui age: “ ʼIo, ʼe matou foaki atu anai te ʼu meʼa ʼaia.” Pea neʼe natou folahi leva he pulupulu lahi ki te kele, ʼo li ki ai he ʼu mama ʼe ʼai ki te ihu neʼe natou tahi toʼo mai tona koloa. 26 Ko te mamafa ʼo te ʼu mama aulo ʼaia neʼe ina kole, neʼe ko sikele* ʼe 1 700. Neʼe toe hilifaki ki ai mo te ʼu meʼa fakateuteu,* mo te ʼu hoaʼi hau, mo te ʼu teu ʼae neʼe tui e te ʼu hau ʼo Matiane neʼe fai ʼaki te fuluʼi ovi huʼa lotuma fakapoʼuli, pea mo te ʼu kahoa ʼo te ʼu kamelo.+

27 Pea neʼe fai ʼaki e Seteone ia he efote,*+ pea neʼe ina fakatuʼu ʼi tona kolo, ʼae ko Ofala.+ Pea neʼe kamata tauhi ai te kau Iselaele fuli ki te efote ʼaia ohage ko he taula ʼatua,*+ pea neʼe liliu ko he hele kia Seteone mo tona famili.+

28 Neʼe malo ai te kau Iselaele ʼi te kau Matiane,+ pea neʼe mole toe faiga ia te kau Matiane ke natou ʼohofi te kau Iselaele.* Pea neʼe maʼuli te fenua ʼi te tokalelei lolotoga taʼu ʼe 40 ʼi te temi ʼo Seteone.+

29 Neʼe toe liliu leva ia Selupaale,+ te foha ʼo Soasi kio ia, pea neʼe hoko atu pe tana maʼuli ʼi ai.

30 Neʼe maʼu leva e* Seteone ʼona foha ʼe 70 he neʼe lahi ʼona ʼohoana. 31 Neʼe toe fanauʼi foki e tana fafine, ʼae neʼe nofo ʼi Sekemi hona foha, pea neʼe fakahigoaʼi e Seteone ko Apimeleke.+ 32 Neʼe mate leva ia Seteone ʼi tona temi matuʼa, pea neʼe ʼavaifo ʼi te fale maka ʼo tana tamai ko Soasi, ʼi Ofala ʼo te kau Apiesele.+

33 ʼI te ʼosi mate ʼa Seteone, neʼe toe tauhi te kau Iselaele ki* te ʼu Paale,+ pea neʼe natou filifili ia Paale-pelite ko tonatou ʼatua.+ 34 Neʼe galoʼi leva e te kau Iselaele ia Sehova tonatou ʼAtua,+ ʼae neʼe ina haofaki ia natou mai ʼonatou fili fuli ʼae ʼi ʼonatou tafaʼaki.+ 35 Pea neʼe mole natou fakaha tonatou ʼofa agatonu ki te famili ʼo Selupaale, ʼae ʼe toe higoa ko Seteone, logo la te ʼu meʼa lelei fuli neʼe ina fai ki Iselaele.+