Senesi
45 Pea neʼe mole kei lava lolomi e Sosefo te ʼu meʼa ʼae ʼi tona loto ia muʼa ʼo ʼana hahaʼi faifekau fuli.+ Koia neʼe kalaga ai: “Kotou olo fuli ki tuʼa!” ʼI tana kua nofo tokotahi leva mo ʼona tehina, neʼe ina fakaha age kia natou pe ko ai ia ia.+
2 Neʼe tagi leʼo lahi ai leva, ʼo logo ki ai te kau Esipito ʼo feia mo te loto fale ʼo Falaone. 3 Neʼe ui leva e Sosefo ki ʼona tehina: “Ko au ia Sosefo. ʼE kei maʼuli koa taku tamai?” Kae neʼe mole feala ke tali age e ʼona tehina he neʼe natou punamaʼuli. 4 Koia neʼe ui ai e Sosefo ki ʼona tehina: “Fakalelei siʼokotou loto, kae kotou fakaovi mai.” Neʼe natou fakaovi ai ki ai.
Neʼe ina ui: “Ko au ia Sosefo, tokotou tehina ʼae neʼe kotou fakatau pea neʼe ʼaumai ki Esipito.+ 5 Kae ʼi te temi leva ʼaeni, ʼaua naʼa kotou tuʼania pea mo fetukugakoviʼiʼaki ia koutou ʼi takotou fakatau ia au. Koteʼuhi neʼe fekauʼi au e te ʼAtua ke au muʼa mai ki heni ia koutou, ke haofaki ai ʼokotou maʼuli.+ 6 Koʼeni kua taʼu lua te hoge ʼi te fenua,+ pea ʼe kei toe taʼu ʼe nima ʼe mole toe fuli ai anai te kele peʼe tanaki ai he taʼukai. 7 Kae neʼe fekauʼi au e te ʼAtua ke au muʼa mai ia koutou, ke mole mamate ai ʼokotou famili+ ʼi te fenua pea ke haofaki ai koutou ʼi hona aluʼaga fakaofoofo. 8 Koia, neʼe mole ko koutou ʼae neʼe kotou fekauʼi mai au ki heni, kae neʼe ko te ʼAtua moʼoni. Neʼe ina fakanofo au ko te tagata faitokoni lahi* ʼa Falaone, pea ke au tokaga ki tona loto fale katoa mo pule ki te fenua katoa ʼo Esipito.+
9 “Kotou toe liliu fakavilivili ki taku tamai pea kotou ui age ki ai: ‘Koʼeni te meʼa ʼae ʼe ui e tou foha ko Sosefo: “Neʼe fakanofo au e te ʼAtua ke au pule ki Esipito katoa.+ Haʼu pea ʼaua naʼa ke fakatuatuai.+ 10 ʼE ke nofo anai ʼi te fenua ʼo Koseni,+ ke ke ovi mai kia au, ʼo feia mo ʼou foha, mo ʼou mokopuna, mo tau faga ovi, mo tau faga pipi, pea mo te ʼu meʼa fuli ʼae ʼe ke maʼu. 11 ʼE au foaki atu anai he meʼa kai ʼi ai, he ʼe kei toe te ʼu taʼu hoge ʼe nima,+ ke mole ke liliu ai mo tou loto fale ʼo masiva pea mo puli ai ʼau meʼa fuli.” ’ 12 ʼE kua kotou sio mata ʼo feia mo toku tehina ko Pesamino ʼe ko au moʼoni ʼaeni ʼe palalau atu.+ 13 Koia kotou fakamatala ki taku tamai te kololia katoa ʼae kua au maʼu ʼi Esipito pea mo te ʼu meʼa fuli ʼae neʼe kotou sisio ki ai. Pea kotou ʼaumai fakavilivili taku tamai ki heni.”
14 Neʼe faʼufua leva ki tona tehina ko Pesamino mo tagi, pea neʼe toe faʼufua mo Pesamino ki ai mo tagi.+ 15 Neʼe faʼufua mo ʼuma ki ʼona tehina fuli pea mo tagi. Hili ʼaia, neʼe palalau leva ʼona tehina mo ia.
16 Neʼe kaku leva te logo ki te loto fale ʼo Falaone kua ʼomai te ʼu tehina ʼo Sosefo. Pea neʼe fiafia ai ia Falaone mo ʼana hahaʼi faifekau. 17 Neʼe ui leva e Falaone kia Sosefo: “Ui age ki ʼou tehina ke natou hili ki ʼanatou manu he ʼu taga meʼa kai ʼe lahi pea ke natou olo ki te fenua ʼo Kanaane. 18 Ke natou ʼaumai takotou tamai mo ʼonatou famili pea ke natou ʼomai kia au ʼi heni. ʼE au foaki age anai te ʼu meʼa ʼae ʼe lelei ʼo te fenua ʼo Esipito, pea ʼe natou kai anai* te ʼu fua ʼae ʼe lelei ʼo te kele.+ 19 ʼE au fakatotonu atu ke ke ui age kia natou+ ke natou toʼo he ʼu saliote+ ʼi te fenua ʼo Esipito, ke ʼaumai ai ʼanatou fanau pea mo ʼonatou ʼohoana. Ke natou fakaheka takotou tamai ki he saliote pea ke natou ʼomai ki heni.+ 20 ʼAua naʼa natou tuʼania ki ʼonatou koloa,+ he ʼe natou maʼu anai te ʼu meʼa ʼae ʼe lelei ʼo te fenua katoa ʼo Esipito.”
21 Pea neʼe mulimuli pe ki ai te ʼu foha ʼo Iselaele. Neʼe foaki e Sosefo kia natou he ʼu saliote ohage pe ko tona fakatotonu age e Falaone, pea mo hanatou meʼa kai ki tonatou fagona. 22 Neʼe ina foaki kia natou takitahi he teu foʼou, kae neʼe ina foaki kia Pesamino he ʼu piesi siliva ʼe 300 pea mo he ʼu teu foʼou ʼe nima.+ 23 Pea neʼe ina foaki maʼa tana tamai te ʼu meʼa lelei ʼo Esipito ʼae neʼe ʼave ʼi he ʼu asino ʼe hogofulu. Neʼe ina toe foaki mo he fulumeto,* mo he pane pea mo he meʼa kai ki tana tamai neʼe ʼave ʼi he ʼu asino fafine ʼe hogofulu he ʼe ʼaoga anai ki tana faifagona. 24 Neʼe ina tuku leva ʼona tehina ke olo. Pea ʼi tanatou mavae, neʼe ina ui age kia natou: “ ʼAua naʼa kotou fekēʼaki ʼi te ala.”+
25 Neʼe natou mavae ai leva mai Esipito pea neʼe natou tau ki te fenua ʼo Kanaane, ki te fale ʼo tanatou tamai ko Sakopo. 26 Pea neʼe natou fakaha age ki ai: “ ʼE kei maʼuli ia Sosefo pea ko ia ʼae ʼe pule ʼi te fenua katoa ʼo Esipito!”+ Kae neʼe mole malave ki tona loto te logo ʼaia he neʼe mole tui ia kia natou.+ 27 Neʼe natou fakamatala age leva te ʼu palalau fuli ʼae neʼe fai e Sosefo kia natou. Pea ʼi tana sio ki te ʼu saliote ʼae neʼe foaki age e Sosefo ki tona fagona, neʼe toe logoʼi ai e tanatou tamai ko Sakopo hona malohi. 28 Pea neʼe ui leva e Iselaele: “Kua au tui atu leva ʼi te temi nei! ʼE kei maʼuli toku foha ko Sosefo! ʼE tonu ke au alu ʼo sio ki ai ʼi muʼa ʼo toku mate!”+