Senesi

32 Neʼe alu leva ia Sakopo, pea neʼe ʼomai he ʼu ʼaselo ʼa te ʼAtua ʼo fakafelaveʼi ki ai. 2 ʼI te sio ʼa Sakopo kia natou, neʼe ina ui atu aipe: “ ʼE ko te nofoʼaga ʼaeni ʼo te ʼAtua!” Koia, neʼe ina fakahigoaʼi ai te koga meʼa ʼaia ko Mahanaimi.*

3 Neʼe fekauʼi leva e Sakopo he ʼu tagata ʼave logo ke natou muʼamuʼa ki tona tehina ko Esau, ʼi te fenua ʼo Seili,+ ʼae ʼe toe higoa ko Etome.+ 4 Neʼe ina fakatotonu age kia natou: “Ke kotou ui ki siʼoku ʼaliki ko Esau: ‘Koʼeni te meʼa ʼae ʼe ui e tau tagata faifekau ko Sakopo: “Neʼe kua fualoa taku nofo* io Lapane.+ 5 Pea kua au maʼu he ʼu vitulo, mo he ʼu asino, mo he ʼu ovi pea mo he ʼu tagata mo he ʼu fafine faifekau.+ Pea ʼe au fekauʼi ʼaku tagata ʼave logo ke natou fakaha atu te faʼahi ʼaia, siʼoku ʼaliki, ke tupu ai hau ʼofa ia au.” ’ ”

6 Neʼe toe liliu mai leva te ʼu tagata ʼave logo ʼo ui kia Sakopo: “Neʼe matou felaveʼi mo tou tehina ko Esau, pea koʼeni ʼe haʼu ʼo fakafelaveʼi mai kia koe, pea ʼe ko ia mo ʼana tagata ʼe toko 400.”+ 7 Pea neʼe mataku mo tuʼania leva ia Sakopo.+ Koia, neʼe ina vaeluaʼi ai te hahaʼi ʼae neʼe nonofo mo ia, ʼo feia mo te faga manu, mo te ʼu pipi pea mo te ʼu kamelo ke ina maʼu he ʼu nofoʼaga ʼe lua. 8 Neʼe ina ui: “Kapau ʼe ʼohofi e Esau he nofoʼaga ʼe tahi, ʼe feala anai ki te tahi nofoʼaga ke natou feholaki.”

9 Hili ʼaia, neʼe faikole ia Sakopo: “Sehova e, te ʼAtua ʼo taku kui ko Apalahamo pea mo te ʼAtua ʼo taku tamai ko Isaake, ʼae ʼe ke ui mai: ‘Toe liliu ki tou fenua pea mo ʼou kaiga, pea ʼe au tapuakiʼi anai ia koe,’+ 10 ʼe mole au tuha mo tau agalelei* pea mo tau agatonu ʼae neʼe ke fakaha mai kia au ʼaeni ko tau tagata faifekau,+ he neʼe au fakalaka ʼi te Solotane ʼaki pe toku toko pea ʼi te temi nei, kua au maʼu he ʼu nofoʼaga ʼe lua.+ 11 ʼE au kole atu, ke ke haofaki au+ mai te ʼu nima ʼo toku tehina ko Esau, he ʼe au mataku naʼa haʼu ʼo ʼohofi ia au,+ ʼo feia mo te ʼu faʼe pea mo ʼanatou fanau. 12 Pea neʼe ke ui: ‘ ʼE au tapuakiʼi moʼoni anai ia koe pea ʼe au fakaliliu anai tou hakoga ke kaugamalie ohage ko te ʼu fisiʼi ʼone ʼo te tai, ʼae ʼe mole feala hona lau.’ ”+

13 Pea neʼe nofo ʼi ai ʼi te po ʼaia. Neʼe ina toʼo leva he ʼu manu ke ina foaki ohage ko he meʼa ʼofa ki tona tehina ko Esau:+ 14 ko he ʼu tao fafine ʼe 200, mo he ʼu tao tagata ʼe 20, mo he ʼu ovi fafine ʼe 200, mo he ʼu ovi tagata ʼe 20, 15 mo he ʼu kamelo ʼe 30 ʼe natou fafaga ʼonatou ʼuhi, mo he ʼu pipi fafine ʼe 40, mo he ʼu vitulo ʼe 10, mo he ʼu asino fafine ʼe 20 pea mo he ʼu asino tagata ʼe 10.+

16 Pea neʼe ina vaevae te faga manu ki ʼana hahaʼi faifekau, ʼo ina ui age kia natou: “Kotou muʼamuʼa atu, pea kotou tuku he vaha ʼi ʼae faga manu mo ʼae faga manu.” 17 Pea neʼe ina toe fakatotonu ki te tagata faifekau ʼae neʼe ʼuluaki alu: “Kapau ʼe haʼu toku tehina ko Esau ʼo fakafelaveʼi kia koe pea mo ina fehuʼi atu: ‘Ko ai tou pule? ʼE ke alu kifea? Pea ʼe ʼa ai te ʼu manu ʼaeni ʼe haʼele ʼi ʼou muʼa?’ 18 ʼE tonu anai ke ke tali age: ‘Ko au ko he kaugana ʼo tau tagata faifekau ko Sakopo. Pea ko te meʼa ʼofa ʼaeni ʼe ina ʼaumai kia koe, siʼoku ʼaliki ko Esau,+ kae kei muli mai.’ ” 19 Pea neʼe ina toe fakatotonu ki te lua, mo te tolu pea mo natou fuli ʼae neʼe natou muliʼi te faga manu: “ ʼE kotou fai anai te ʼu palalau ʼaia kia Esau moka kotou felaveʼi anai mo ia. 20 Pea ʼe kotou toe ui age anai: ‘Koʼeni tau tagata faifekau ko Sakopo ʼe muli mai.’ ” He neʼe manatu: ‘ ʼE au ʼuluaki ʼave muʼa he meʼa ʼofa kia ia moʼo fakafimalieʼi tona loto,+ ke feala hana tali leleiʼi au moka au sio ki ai.’ 21 Koia, neʼe ʼuluaki olo ai ʼana tagata faifekau mo te ʼu meʼa ʼofa. Pea neʼe natou fakalaka ʼi te vai tafe. Kae neʼe nofo ia Sakopo ʼi te nofoʼaga ʼi te po ʼaia.

22 Ki muli age ʼi te po pe ʼaia, neʼe tuʼu ake ʼo toʼo ʼona ʼohoana ʼe lua,+ mo ʼana fafine faifekau ʼe lua+ pea mo ʼona foha ʼe toko 11 ʼae ʼe kei liliki, ʼo natou fakalaka ʼi te vai tafe ʼo Sapoke.+ 23 Koia neʼe ina ʼave ai ia natou ke natou fakalaka ʼi te vai tafe,* pea neʼe ina ʼave mo ʼana meʼa fuli.

24 Pea neʼe nofo tokotahi leva ia Sakopo. Neʼe fagatua leva mo he tagata ʼo kaku ki te mafoa ʼo te ʼaho.+ 25 ʼI te sio ʼa te tagata neʼe mole malo, neʼe lave ki te hokoga hui ʼo te alaga ʼo Sakopo, pea neʼe mahuʼi ai tona alaga ʼi tana lolotoga fagatua mo ia.+ 26 Hili ʼaia, neʼe ui age e te tagata ki ai: “Tuku au ke au alu, he ʼe kua kamata mafoa te ʼaho.” Neʼe ina tali age: “ ʼE mole au tuku anai ia koe ke ke alu kae heʼeki ke tapuakiʼi au.”+ 27 Neʼe ina fehuʼi age: “Ko ai tou higoa?” pea neʼe ina tali age: “Ko Sakopo.” 28 Neʼe ina ui age leva: “ ʼE mole ke toe higoa anai ko Sakopo kae ko Iselaele,*+ koteʼuhi neʼe ke fagatua mo te ʼAtua+ pea mo te tagata, pea kua ke malo.” 29 Pea neʼe ui age e Sakopo: “Fakalelei siʼou loto, kae ke ke fakaha mai tou higoa.” Kae neʼe ina tali age: “He koʼe ʼe ke fia iloʼi toku higoa?”+ Pea neʼe ina tapuakiʼi leva ia ia ʼi te koga meʼa ʼaia. 30 Koia, neʼe fakahigoaʼi ai e Sakopo te koga meʼa ʼaia ko Peniele,*+ he neʼe ina ui: “Neʼe au sio ki te fofoga ʼo te ʼAtua, kae ʼe kei au* maʼuli pe.”+

31 Neʼe hopo ake te laʼa ʼi te temi pe ʼae neʼe fakalaka ai ʼo ovi ki Penuele.* Kae neʼe ketu ʼuhi ko tona alaga.+ 32 Ko te tupuʼaga la ʼaia ʼo te mole kai e te kau Iselaele te foʼi ivi lahi, ʼae ʼi te hokoga hui ʼo te alaga ʼo he manu ʼo kaku mai ki te ʼaho nei, he neʼe ko te koga ʼaia ʼo Sakopo ʼae neʼe lave ki ai te tagata.