Senesi

46 Neʼe toʼo ai e Iselaele tona famili mo ʼona koloa fuli pea neʼe alu leva. ʼI tana tau atu ki Pele-sepa,+ neʼe ina momoli ai he ʼu sakilifisio ki te ʼAtua ʼo tana tamai ko Isaake.+ 2 Pea neʼe palalau te ʼAtua kia Iselaele ʼi he meʼa neʼe ha kia ia ʼi te poʼuli, ʼo ina ui age: “Sakopo, Sakopo!” Neʼe ina tali age: “Koʼeni au!” 3 Neʼe ina hoko atu: “Ko au te ʼAtua moʼoni, te ʼAtua ʼo tau tamai.+ ʼAua naʼa ke mataku ʼi te alu ki Esipito, he ʼe au fakaliliu anai koe ko he puleʼaga lahi ʼi te fenua ʼaia.+ 4 ʼE au alu anai mo koe ki Esipito, pea ʼe au toe fakaliliu mai anai koe mai ai,+ ʼe moeʼi anai e Sosefo ʼou mata ʼi tou ʼaho mate.”*+

5 Hili ʼaia, neʼe mavae leva ia Sakopo mai Pele-sepa. Neʼe fakaheka e te ʼu foha ʼo Iselaele tanatou tamai ko Sakopo, mo ʼanatou fanau pea mo ʼonatou ʼohoana ki te ʼu saliote ʼae neʼe foaki age e Falaone. 6 Neʼe natou ʼave mo tanatou faga manu pea mo ʼonatou koloa ʼae neʼe natou maʼu ʼi te fenua ʼo Kanaane. Pea neʼe tau leva ia Sakopo mo tona hakoga katoa ki Esipito. 7 Neʼe ina ʼave ai ki Esipito ʼona foha fuli, mo ʼona ʼofafine fuli pea mo ʼona mokopuna fuli, ʼei, tona hakoga katoa.

8 Koʼeni te ʼu higoa ʼo te ʼu foha ʼo Iselaele, ia te ʼu foha ʼo Sakopo ʼae neʼe ʼomai ki Esipito:+ Ko te ʼuluaki foha ʼo Sakopo neʼe ko Lupeni.+

9 Ko te ʼu foha ʼo Lupeni neʼe ko Anoke, mo Palu, mo Eselone pea mo Kalemi.+

10 Ko te ʼu foha ʼo Simeone+ neʼe ko Semuele, mo Samine, mo Oate, mo Sakine, mo Tesokale pea mo Saule,+ te tama ʼa he fafine Kanaane.

11 Ko te ʼu foha ʼo Levi+ neʼe ko Kelesoni, mo Keate pea mo Melali.+

12 Ko te ʼu foha ʼo Suta+ neʼe ko Ele, mo Onane, mo Sila,+ mo Pelesi+ pea mo Sela.+ Kae neʼe mamate leva ia Ele mo Onane ʼi te fenua ʼo Kanaane.+

Ko te ʼu foha ʼo Pelesi neʼe ko Eselone pea mo Amule.+

13 Ko te ʼu foha ʼo Isakale neʼe ko Tola, mo Puva, mo Iopo pea mo Similone.+

14 Ko te ʼu foha ʼo Sepulone+ neʼe ko Seleta, mo Eloni pea mo Saleli.+

15 Neʼe ko te ʼu tama ʼaia ʼa Lea mo Sakopo. Neʼe tutupu ʼona foha ʼi Patane-alame, ʼo feia mo tona ʼofafine ko Tina.+ Neʼe fakatahiʼi tona hakoga katoa ko te toko 33.

16 Ko te ʼu foha ʼo Kate+ neʼe ko Sifesoni, mo Aki, mo Suni, mo Eseponi, mo Eti, mo Aloti pea mo Aleli.+

17 Ko te ʼu foha ʼo Asele+ neʼe ko Imina, mo Siseva, mo Sisevi mo Pelia pea ko tonatou tokolua neʼe ko Selate.

Ko te ʼu foha ʼo Pelia neʼe ko Hepele mo Malikiele.+

18 Neʼe ko te ʼu tama ʼaia ʼa Silipa,+ te fafine faifekau ʼae neʼe foaki e Lapane ki tona ʼofafine ko Lea. Neʼe fakatahiʼi te hakoga katoa ʼo Sakopo mo Silipa ko te toko 16.

19 Ko te ʼu tama ʼa Lasele, te ʼohoana ʼo Sakopo neʼe ko Sosefo+ pea mo Pesamino.+

20 ʼI te fenua ʼo Esipito, neʼe maʼu e Sosefo mo Asenate,+ te ʼofafine ʼo Potifela, te pelepitelo ʼo Oni* ʼanā tama ko Manase+ pea mo Efalaimi.+

21 Ko te ʼu foha ʼo Pesamino+ neʼe ko Pela, mo Pekeli, mo Asipeli, mo Kela,+ mo Naamane, mo Esi, mo Losi, mo Mupimi, mo Upime+ pea mo Alete.+

22 Neʼe fakatahiʼi te hakoga katoa ʼo Sakopo mo Lasele ko te toko 14.

23 Ko te* foha ʼo Tane+ neʼe ko Usime.+

24 Ko te ʼu foha ʼo Nefetali+ neʼe ko Sateseele, mo Kuni, mo Setesele pea mo Silemi.+

25 Ko te ʼu tama ʼaia ʼa Pila, te fafine faifekau ʼae neʼe foaki e Lapane ki tona ʼofafine ko Lasele. Neʼe fakatahiʼi te hakoga katoa ʼo Sakopo mo Pila ko te toko fitu.

26 Ko natou* fuli ʼae neʼe hifo mai ia Sakopo pea neʼe olo mo ia ki Esipito neʼe ko te toko 66,+ kae neʼe mole lau ai te ʼu ʼohoana ʼo te ʼu foha ʼo Sakopo. 27 Neʼe maʼu e Sosefo ʼona foha ʼe lua neʼe tutupu ʼi Esipito. Neʼe ʼomai te famili katoa ʼo Sakopo ki Esipito, pea neʼe natou toko 70.+

28 Neʼe fekauʼi leva e Sakopo ia Suta+ ke muʼamuʼa ʼo fakaha kia Sosefo kua vave kaku pe ki Koseni. ʼI tanatou tau atu leva ki te fenua ʼo Koseni,+ 29 neʼe fakatotonu e Sosefo ke teuteuʼi tana saliote, pea neʼe alu ʼo fakafelaveʼi ki tana tamai ko Iselaele ʼi Koseni. ʼI tana sio ki ai, neʼe alu atu aipe ʼo faʼufua ki ai pea mo tagi fualoa. 30 Neʼe ui leva e Iselaele kia Sosefo: “Kua feala leva haku mate ʼi te temi nei, he ʼe kua au sio ki ʼou fofoga pea kua au iloʼi ʼe kei ke maʼuli.”

31 Neʼe ui leva e Sosefo ki ʼona tehina pea mo te loto fale ʼo tana tamai: “ ʼE au alu anai ʼo fakaha kia Falaone:+ ‘Kua tau mai ʼoku tehina mo te loto fale ʼo taku tamai ʼae neʼe nonofo ʼi te fenua ʼo Kanaane.+ 32 Pea ko te ʼu tagata ʼaia ko ni tagata tauhi ovi+ mo taupau he faga manu,+ pea neʼe natou ʼomai mo tanatou faga ovi mo faga pipi pea mo ʼanatou meʼa fuli.’+ 33 Ka pauʼi koutou e Falaone pea mo ina fehuʼi atu pe kotea takotou gaue, 34 ʼe tonu ke kotou tali age: ‘Siʼoku ʼaliki, ʼe matou taupau te faga manu talu mai tamatou kei liliki ʼo kaku mai ki te ʼaho nei, ohage pe ko ʼamatou kui.’+ ʼE feala ai anai hakotou nonofo ʼi te fenua ʼo Koseni,+ koteʼuhi ʼe fakalialia te kau Esipito ki te kau tauhi ovi.”+