Senesi
9 Neʼe tapuakiʼi leva e te ʼAtua ia Noe pea mo ʼona foha, ʼo ina ui kia natou: “Kotou fanaunau pea mo liliu ʼo hahaʼi, pea kotou fakahahaʼi te kele.+ 2 ʼE matataku tuʼumaʼu anai te ʼu meʼa maʼuli fuli ʼo te kele kia koutou, ʼo feia mo te ʼu manulele fuli, mo te ʼu manu fuli ʼae ʼe maʼuʼuli ʼi te kele, pea mo te ʼu ika fuli ʼo te tai. ʼE kotou puleʼi anai ia natou.+ 3 ʼE feala ke kotou kai te ʼu manu fuli ʼae ʼe maʼuli ʼi te kele.+ ʼE au foaki atu te ʼu manu fuli ʼaia, ohage pe ko taku foaki atu te ʼu vao ʼakau fuli.+ 4 Kae ʼe mole tonu ke kotou kai ia te kanoʼi manu mo tona maʼuli,* ʼae ʼe ko te toto.+ 5 Pea ʼe au fakamauʼi anai moka fai he ligi toto, koteʼuhi ko te toto ʼe ko te maʼuli. Kapau ʼe matehi koutou e he manu pea ʼe tonu ke matehi. Pea kapau ʼe matehi e he tagata he tahi tagata, ʼe tonu ke matehi, koteʼuhi neʼe ina toʼo te maʼuli ʼo tona tehina.+ 6 Kapau ʼe matehi e he tahi ia he tagata,* pea ʼe toe matehi anai mo ia,+ he neʼe fakatupu e te ʼAtua te tagata ki tona pāki.+ 7 Pea ke kotou fanaunau pea mo liliu ʼo hahaʼi, mo nonofo ʼi te kele katoa.”+
8 Pea neʼe ui leva e te ʼAtua kia Noe pea mo ʼona foha: 9 “ ʼE au fai nei haku fuakava mo koutou+ pea mo tokotou hakoga, 10 pea mo te ʼu meʼa maʼuli* fuli ʼae ʼe nonofo mo koutou: te ʼu manulele, mo te ʼu manu lalata, mo te ʼu manu ʼo te vao, pea mo te ʼu meʼa maʼuli fuli ʼo te kele, ia natou fuli ʼae neʼe ʼomai ki tuʼa mai te aleka mo koutou, ʼei, ia te ʼu meʼa maʼuli fuli ʼo te kele.+ 11 ʼEi, ʼe au fai taku fuakava ʼaeni mo koutou: ʼE mole au toe fakaʼauha anai te ʼu meʼa maʼuli fuli ʼaki te vai ʼo te tulivio, pea ʼe mole au toe maumauʼi anai te kele ʼaki he tulivio.”+
12 Pea neʼe toe ui e te ʼAtua: “Koʼeni te fakailoga ʼo te fuakava ʼae ʼe au fai mo koutou pea mo te ʼu meʼa maʼuli* fuli ʼae ʼe nonofo mo koutou, pea maʼa te ʼu taʼi tupu fuli ʼae ʼe muli mai. 13 ʼE au fakatuʼu taku nuanua ʼi te ʼao, pea ʼe liliu anai ko he fakailoga ʼo te fuakava ʼae neʼe au fai mo te kele. 14 Ko te temi pe ʼae ʼe au ʼaumai ai he ʼao ʼi te lagi, ʼe ha moʼoni anai te nuanua ʼi te ʼao. 15 Pea ʼe au manatuʼi anai taku fuakava ʼae neʼe au fai mo koutou pea mo te ʼu faʼahiga meʼa maʼuli fuli. ʼE mole toe fakaʼauha anai te ʼu meʼa maʼuli fuli ʼaki he tulivio.+ 16 Pea ka ha te nuanua ʼi te ʼao, ʼe au sio moʼoni anai ki ai pea ʼe au manatuʼi anai te fuakava heʼe gata ʼae neʼe au fai mo te ʼu faʼahiga meʼa maʼuli fuli ʼo te kele.”
17 Pea neʼe toe ui age e te ʼAtua kia Noe: “Ko te fakailoga ʼaia ʼo te fuakava ʼae ʼe au fai mo te ʼu meʼa maʼuli fuli ʼae ʼi te kele.”+
18 Ko te ʼu foha ʼo Noe ʼae neʼe hu mai ki tuʼa mai te aleka neʼe ko Semi, mo Kami, pea mo Safeti.+ Ki muli age, neʼe maʼu leva e Kami hona foha ko Kanaane.+ 19 Neʼe ko te ʼu foha ʼaia ʼe toko tolu ʼo Noe. ʼE hifo mai ia natou ʼaia te hahaʼi fuli ʼae ʼe nonofo ʼi te kele.+
20 Neʼe kamata gaue kele leva ia Noe, pea neʼe ina to tana gaueʼaga vite. 21 ʼI tana inu te vino, neʼe konahia ai pea mo ina huʼi ʼona mutuʼi meʼa ʼi tona fale la. 22 Neʼe sio ia Kami, te tamai ʼa Kanaane, ki te telefua ʼo tana tamai, pea neʼe ina fakamatala ki ʼona tehina ʼe lua ʼae neʼe nonofo ʼi tuʼa. 23 Koia neʼe toʼo e Semi mo Safeti he pulupulu ʼo ʼai ki ʼonā fuga ʼuma pea mo haʼele holomuli ki te fale la. Pea neʼe nā ʼuʼufi ai te telefua ʼo tanā tamai kae neʼe nā situʼa. Koia neʼe mole nā sisio ai ki te telefua ʼo tanā tamai.
24 ʼI te ʼala ake ʼa Noe ʼi tona konahia, pea ʼi tana iloʼi te meʼa ʼae neʼe fai e tona foha veliveli kia ia, 25 neʼe ina ui ai:
“Ke malaʼia ia Kanaane.+
Ke liliu ko te sinifu ʼo ʼona tehina.”+
26 Pea neʼe ina toe ui:
“Ke vikiʼi ia Sehova, te ʼAtua ʼo Semi,
Pea ke liliu ia Kanaane ko hana sinifu.+
27 Pea ke foaki e te ʼAtua kia Safeti hona fenua ʼe lahi,
Pea ke nofo ia ia ʼi te ʼu fale la ʼo Semi.
Pea ke toe liliu ia Kanaane ko hana sinifu.”
28 Pea neʼe hoko atu pe te maʼuli ʼo Noe ia taʼu ʼe 350 ʼi te ʼosi ʼo te Tulivio.+ 29 Koia neʼe maʼuli ia Noe lolotoga taʼu ʼe 950, pea neʼe mate leva.