Lua Samuele

19 Neʼe fakaha leva kia Soape: “ ʼE tagi te hau mo putu ʼi te mate ʼo Apesalone.”+ 2 Koia, ko te malo ʼae neʼe hoko ʼi te ʼaho ʼaia, neʼe liliu ia ko he ʼaho putu ki te hahaʼi fuli, he neʼe natou logo ʼe lotomamahi te hau ʼo ʼuhiga mo tona foha. 3 ʼI te ʼaho ʼaia, neʼe toe liliu fakalogologo ai te hahaʼi ki te kolo,+ ohage ko he hahaʼi neʼe ufiufi he neʼe feholaki ʼi te tau. 4 Neʼe ʼuʼufi e te hau ʼona fofoga pea neʼe tagi leʼo lahi, ʼo ina ui: “Siʼoku foha ko Apesalone! Apesalone, siʼoku foha, siʼoku foha!”+

5 Neʼe alu leva ia Soape ki te fale ʼae neʼe nofo ai te hau, ʼo ina ui age ki ai: “ ʼI te ʼaho nei, kua ufiufi ʼau hahaʼi faifekau fuli ʼuhi ko koe, kae neʼe natou haofaki ʼi te ʼaho ʼaeni tou maʼuli,* mo te maʼuli* ʼo ʼou foha,+ mo ʼou ʼofafine,+ mo ʼou ʼohoana pea mo ʼau fafine.+ 6 ʼE ke ʼofa ia natou ʼae ʼe fehihiʼa kia koe, pea ʼe ke fehiʼa ia natou ʼae ʼe ʼoʼofa ia koe, he neʼe ke fakaha lelei ʼi te ʼaho nei ʼe mole maʼuhiga kia koe ʼau tagata takitaki pea mo ʼau hahaʼi faifekau, koteʼuhi ʼe au tui papau, ka na pau la neʼe maʼuli ia Apesalone ʼi te ʼaho nei kae matou mamate fuli, ʼe lagi ke leleiʼia age anai koe. 7 ʼI te temi leva ʼaeni, tuʼu ake ʼo alu ʼo fakafimalieʼi* ʼau hahaʼi faifekau, he ʼe au fakapapau atu ʼi te huafa ʼo Sehova, kapau ʼe mole ke alu, ʼe mole toe nofo anai he tagata mo koe ʼi te po ʼaeni. ʼE kovi age anai te faʼahi ʼaia ʼi te ʼu malaʼia fuli ʼae neʼe hoko kia koe talu mai tou temi tupulaga ʼo kaku mai ki te ʼaho nei.” 8 Neʼe tuʼu ake ai leva te hau ʼo alu ʼo heka ʼi te matapa ʼo te kolo, pea neʼe fakaha ki te hahaʼi fuli: “ ʼE heka te hau ʼi te matapa.” Neʼe ʼomai leva te hahaʼi fuli kia muʼa ʼo te hau.

Kae neʼe feholaki te kau Iselaele, ʼo natou tahi olo ki tona ʼapi.+ 9 Neʼe fefihiʼaki te hahaʼi fuli ʼo te ʼu telepi fuli ʼo Iselaele, ʼo natou ui: “Neʼe haofaki tatou e te hau mai ʼotatou fili,+ pea neʼe ina fakaʼateainaʼi tatou mai te kau Filisitini. Kae ʼi te temi leva ʼaeni, kua hola ia mai te fenua ʼuhi ko Apesalone.+ 10 Pea kua mate ia Apesalone ʼi te tau,+ ia ia ʼae neʼe tou fakanofo ke pule kia tatou.+ Koia, he koʼe ʼe mole kotou fai he puleʼaki ke toe liliu mai te hau?”

11 Neʼe fakaha e te Hau ko Tavite te logo ʼaeni kia Satoke+ mo Apiata,+ te ʼu pelepitelo: “Kolua palalau ki te kau takitaki ʼo Suta,+ ʼo ui: ‘ ʼE kotou fia liliu koa la ko te telepi fakamuli ʼae ka ina fakaliliu mai te hau ki tona fale hau, kae kua logo te hau ʼi te faʼahi ʼae ʼe nofo ai ki te ʼu palalau ʼae ʼe fai e Iselaele katoa? 12 Ko koutou ko ʼoku tehina, ʼe tou kaiga totonu.* Koia ʼe kotou fia liliu koa la ko te telepi fakamuli ʼae ka ina fakaliliu mai te hau?’ 13 Pea kolua ui kia Amasa:+ ‘ ʼE mole koa la ta kaiga totonu?* Ke tauteaʼi lahi au e te ʼAtua, mo kapau ʼe mole ke liliu ʼi te ʼaho nei ko te pule ʼo taku foʼi kautau, ʼo ke fetogi ia Soape.’ ”+

14 Neʼe ina fakamaliu* te loto ʼo te hahaʼi tagata fuli ʼo Suta, pea neʼe natou fakaha leva ki te hau: “Toe liliu mai, ia koe mo ʼau tagata faifekau fuli.”

15 Neʼe toe liliu ai te hau pea neʼe kaku ki te Solotane. Neʼe ʼomai te hahaʼi ʼo Suta ki Kilekale+ ʼo fakafelaveʼi ki te hau pea mo fakalaka fakatahi mo ia ʼi te Solotane. 16 Neʼe haʼu fakavilivili leva ia Simei,+ te foha ʼo Kela, te tagata Pesamino ʼae mai Pasulimi, fakatahi mo te hahaʼi tagata ʼo Suta ʼo fakafelaveʼi ki te Hau ko Tavite. 17 Pea neʼe kaugā ʼomai mo ia te ʼu tagata mai Pesamino ʼe toko 1 000. Neʼe toe alu fakavilivili foki ia Tesipa,+ te tagata gaue ʼo te famili ʼo Saulo, mo ʼona foha ʼe toko 15 pea mo ʼana hahaʼi faifekau ʼe toko 20 ki te Solotane, ʼi muʼa ʼo te tau age ʼa te hau. 18 Neʼe* fakalaka leva ʼi te vai tafe fakatahi mo te loto fale ʼo te hau pea neʼe ina fia fai te ʼu meʼa fuli ʼae neʼe loto ki ai te hau. Kae ʼi te ʼamanaki fakalaka ʼa te hau ʼi te Solotane, neʼe haʼu ia Simei, te foha ʼo Kela ʼo tulolo ʼi ʼona muʼa. 19 Neʼe ina ui age ki te hau: “Siʼoku ʼaliki, ʼaua naʼa ke tukugakoviʼi au, pea ʼaua naʼa ke manatuʼi te aga ʼae ʼe kovi neʼe au fai+ ʼi te ʼaho ʼae neʼe ke mavae ai mai Selusalemi. Ke ʼaua naʼa ke toʼo fakamalotoloto te faʼahi ʼaia, 20 he ʼe au iloʼi lelei pe neʼe au agahala. Koia siʼoku ʼaliki te hau, ʼi te ʼaho nei, ʼi te fale katoa ʼo Sosefo, ko au ʼae neʼe ʼuluaki haʼu ʼo fakafelaveʼi kia koe.”

21 ʼI te moʼi temi pe ʼaia, neʼe ui e Apisai,+ te tama ʼa Teselusa:+ “ ʼE mole tonu koa la ke matehi ia Simei ʼuhi ko te faʼahi ʼaia, he neʼe laukovi ki te tagata fakanofo ʼa Sehova?”+ 22 Kae neʼe ui e Tavite: “ ʼU tama ʼa Teselusa,+ kotea tona ʼuhiga kia koulua pea mo au, ke kolua fakafeagai mai kia au ʼi te ʼaho nei? ʼE tonu koa ke matehi he tahi ʼi te ʼaho nei ʼi Iselaele? Koteʼuhi ʼe mole au iloʼi koa la ʼe ko au te hau ʼo Iselaele ʼi te ʼaho nei?” 23 Pea neʼe ui leva e te hau kia Simei: “ ʼE mole ke mate anai.” Pea neʼe fakapapau age e te hau ki ai.+

24 Neʼe toe haʼu foki mo Mefiposete,+ te mokopuna ʼo Saulo, ʼo fakafelaveʼi ki te hau. Neʼe mole kei tokaga ia ki ʼona vaʼe, mo tona kaukava pea neʼe mole fo ʼona mutuʼi meʼa talu mai te ʼaho ʼae neʼe mavae ai te hau ʼo kaku ki te ʼaho ʼae neʼe toe liliu age ai ʼi te fimalie. 25 ʼI te temi ʼae neʼe alu ai ki* Selusalemi ʼo fakafelaveʼi ki te hau, neʼe ui age e te hau: “Mefiposete, he koʼe neʼe mole ke haʼu mo au?” 26 Neʼe ina tali age: “Siʼoku ʼaliki te hau, neʼe kakaʼi au e taku tagata faifekau.+ Koteʼuhi neʼe au ui: ‘Ke teuteuʼi taku asino ke au heka ai ʼo alu ki te hau,’ he ʼe au maʼimoa.+ 27 Kae siʼoku ʼaliki te hau, neʼe fasituʼu taku tagata faifekau kia koe ʼo ʼuhiga mo au.+ Kae ʼe ke hage ko he ʼaselo ʼa te ʼAtua moʼoni, koia fai te meʼa ʼae ʼe ke sio ʼe lelei. 28 Siʼoku ʼaliki hau, neʼe feala pe ke ke matehi te loto fale katoa ʼo taku tamai, kae neʼe ke tuku ke au kai mo natou ʼae ʼe kakai ʼi tou laupapa.+ Koia, ʼe tonu anai koa ke au meo kia koe?”

29 Kae neʼe ui age e te hau ki ai: “He koʼe ʼe ke toe palalau mai ki te faʼahi ʼaia? Kua au ʼosi fai te tonu ʼae ke ke vaevae mo Tesipa te ʼu kele.”+ 30 Pea neʼe ui e Mefiposete ki te hau: “Ke ina toʼo fuli, he ʼe kua ke toe liliu mai ki tou fale ʼi te fimalie.”

31 Neʼe haʼu leva ia Palesilai,+ te tagata Kileate mai Lokelime ki te Solotane, ke kaugā olo fakatahi mo te hau ki te Solotane. 32 Neʼe kua matuʼa ia Palesilai, he neʼe kua taʼu 80. Neʼe ina foaki he meʼa kai ki te hau ʼi te temi ʼae neʼe nofo ai ʼi Mahanaimi,+ he neʼe koloaʼia ʼaupito. 33 Koia neʼe ui e te hau kia Palesilai: “Fakalaka mo au, pea ʼe au foaki atu anai hau meʼa kai ʼi Selusalemi.”+ 34 Kae neʼe ui age e Palesilai ki te hau: “ ʼE kei toe koa ʼaho ʼe fia ki toku maʼuli ke au alu ai mo koe ki Selusalemi? 35 Kua au taʼu 80 ʼi te ʼaho nei.+ ʼE feala koa ke au iloʼi te kehekehe ʼo te meʼa ʼae ʼe lelei mo te meʼa ʼae ʼe kovi? ʼE feala koa ke au leleiʼia te meʼa ʼae ka au kai mo inu? ʼE kei feala koa ke au logo ki te ʼu leʼo ʼo te ʼu tagata mo te ʼu fafine hiva?+ Pea siʼoku ʼaliki te hau, he koʼe ʼe au liliu anai ko he kavega kia koe? 36 He koʼe ʼe ke foaki mai anai te fakapale ʼaia? ʼE kua feʼauga pe mo taku alu fakatahi mo koe ki te Solotane. 37 Fakalelei siʼou loto, kae ke ke tuku ke au toe liliu, pea ke au alu ʼo mate ʼi toku kolo, ʼo ovi ki te fale maka ʼo taku tamai mo taku faʼe.+ Kae koʼeni tau tagata faifekau ko Kimame.+ Tuku ke fakalaka mo koe pea ke fai kia ia te meʼa ʼae ʼe ke sio ʼe lelei.”

38 Pea neʼe ui age e te hau: “ ʼE fakalaka anai ia Kimame mo au, pea ʼe au fai anai kia ia te meʼa ʼae ʼe ke sio ʼe lelei. Ko he meʼa pe ʼe ke kole mai, ʼe au fai anai maʼa koe.” 39 Neʼe kamata fakalaka leva te hahaʼi fuli ʼi te Solotane, pea ʼi te temi ʼae neʼe fakalaka ai te hau, neʼe ʼuma leva kia Palesilai+ pea mo tapuakiʼi ia ia. Pea neʼe toe liliu ai ia Palesilai ki tona ʼapi. 40 Neʼe alu fakatahi ia Kimame mo te hau ʼi tana fakalaka ʼae ʼo alu ki Kilekale.+ Neʼe olo fakatahi te hahaʼi fuli ʼo Suta mo te vaelua ʼo te hahaʼi ʼo Iselaele mo te hau ʼi tana fakalaka ʼaia.+

41 Neʼe fakaovi leva te ʼu tagata fuli ʼo Iselaele ki te hau ʼo natou ui ki ai: “He koʼe koa neʼe ʼave fakafufu koe e ʼomatou tehina, te ʼu tagata ʼo Suta pea neʼe natou ʼaumai te hau, mo tona loto fale pea mo te ʼu tagata fuli ʼa Tavite ki te tahi faʼahi ʼo te Solotane?”+ 42 Pea neʼe tali e te ʼu tagata fuli ʼo Suta ki te ʼu tagata ʼo Iselaele: “Koteʼuhi ʼe kaiga totonu te hau mo matou.+ He koʼe ʼe kotou iita ki te faʼahi ʼaia? Neʼe fafaga koa matou e te hau, pe neʼe ina foaki mai koa he meʼa ʼofa?”

43 Kae neʼe tali e te ʼu tagata ʼo Iselaele ki te ʼu tagata ʼo Suta: “Ko ʼomatou telepi ʼe hogofulu, koia neʼe ko tomatou maʼua ke matou fai te faʼahi ʼaia kia Tavite, kae mole ko koutou. Pea he koʼe neʼe kotou fehihiʼa kia matou ʼi te meʼa ʼae neʼe kotou fai? Neʼe mole tonu koa la ko matou ʼae ʼe matou ʼuluaki fakaliliu mai tomatou hau?” Kae neʼe malohi* age te ʼu palalau ʼae neʼe fai e te ʼu tagata ʼo Suta ʼi ʼae ʼa te ʼu tagata ʼo Iselaele.