Pesalemo
Ki te pule ʼo te kau faimaholo. Mikitame* ʼa Tavite, ʼo mulimuli ki te fasi ʼo te hiva “Te Lilio ʼo Te Fakamanatu.” Ke fakaʼaogaʼi ki te faiakonaki. ʼI te temi ʼae neʼe ina tauʼi ai ia Alame-nahalaime mo Alame-tesopa, pea ʼi te toe liliu mai ʼa Soape ʼo matehi te toko 12 000 Etome ʼi te Potu Fenua ʼo Te Masima.+
60 ʼAtua e, neʼe ke liʼaki matou pea neʼe ke fakamavetevete matou.+
Neʼe ke ita kia matou, kae ʼi te lakaga nei toe vahe mai tou ʼofa.
2 Neʼe ke fakagalulu te kele, pea neʼe makafaʼafaʼa ai.
Pupunu te ʼu ava he ʼe lolotoga holo.
3 Neʼe ke ʼahiʼahiʼi tau hahaʼi.
ʼE matou siʼia ʼuhi ko te vino ʼae neʼe ke fakainu ʼaki matou.+
4 Foaki* he fakailoga kia natou ʼae ʼe manavasiʼi kia te koe,
Ke natou feholaki mo hao ʼi te ʼu kauʼi nahau.* (Sela)
5 Haofaki matou ʼaki tou nima mataʼu pea ke tali mai kia matou,
Ke haofaki ai ʼou ʼofaina.+
6 Neʼe ui e te ʼAtua ʼi tona ʼuhiga maʼoniʼoni:*
“ ʼE au fakafiafia anai, ʼe au foaki anai ia Sekemi ko he tofiʼa,+
ʼE au fuafua anai te Potu Fenua Laulelei ʼo Sukoti.+
7 ʼE ʼaʼaku ia Kileate ʼo feia pe mo Manase,+
Pea ko Efalaimi ʼe ko he puloga ki toku ʼulu.
Ko Suta ko toku toko fakaʼaliki.+
8 Ko Moape ʼe ko te topu ʼae ʼe au maʼanu ai.+
ʼE au li anai toku sulie ki Etome.+
Pea ʼe au kalaga fakafiafia anai ʼo ʼuhiga mo Filisitini.”+
9 Ko ai ʼae ka ina ʼave au ki te kolo ʼae ʼe ʼa takai e te ʼu fili?*
Ko ai ʼae ka ina taki au ki Etome?+
10 ʼAtua e, ʼe mole koa la ko koe ʼae neʼe ke siʼaki matou?
Siʼomatou ʼAtua, ʼe mole kei ke kau koa mo ʼamatou kautau?+
11 Haofaki matou ʼi ʼomatou mamahi,
Koteʼuhi ko te haofaki ʼa te tagata ʼe vaʼiganoa.+