ʼUluaki Hau

17 Neʼe ui e Elia,*+ te tagata Tisipe ʼae neʼe nofo ʼi Kileate+ kia Akapo: “ ʼE au fakapapau atu ia muʼa ʼo Sehova, te ʼAtua maʼuli ʼo Iselaele ʼae ʼe au tauhi ki ai,* ʼe mole ʼi ai anai he hahau pea ʼe mole to anai he ʼua lolotoga ni taʼu, gata pe moka ʼe au fakatotonu!”+

2 Neʼe ui leva e Sehova kia ia: 3 “Mavae ʼi heni, pea ke alu ki te potu esite ʼo nono ʼi te Vai Tafe* ʼo Kelite, ʼi te potu esite ʼo te Solotane. 4 ʼE ke inu anai ki te vai tafe, pea ʼe au fakatotonu anai ki te ʼu kolopo* ke natou ʼavatu hau meʼa kai ʼi ai.”+ 5 Neʼe alu atu aipe, pea neʼe ina fai ʼo mulimuli ki te folafola ʼa Sehova. Neʼe alu ʼo nofo ʼi te Vai Tafe* ʼo Kelite, ʼi te potu esite ʼo te Solotane. 6 Neʼe ʼaumai e te ʼu kolopo kia ia he moʼi pane mo he kanoʼi manu ʼi te uhu pea mo he moʼi pane mo he kanoʼi manu ʼi te afiafi, pea neʼe inu ki te vai tafe.+ 7 Kae hili ni ʼaho, neʼe mamaha leva te vai tafe+ he neʼe mole ʼua ʼi te fenua.

8 Neʼe ui leva e Sehova kia ia: 9 “Tuʼu ake pea ke alu ki Salepate, ʼae ʼe ʼi Sitoni, ʼo nofo ai. ʼE au fakatotonu anai ki he fafine vitua ʼi ai ke ina foaki atu hau meʼa kai.”+ 10 Neʼe tuʼu ake ai ʼo alu ki Salepate. ʼI tana tau atu ki te huʼaga ʼo te kolo, neʼe ʼi ai te fafine vitua neʼe tae fafie. Neʼe ina pauʼi ia ia ʼo ina ui age: “Fakalelei siʼou loto, kae ke ke foaki mai he moʼi vai ke au inu.”+ 11 ʼI tana alu ʼaia, neʼe toe pauʼi e Elia ia ia ʼo ina ui age: “Fakalelei siʼou loto, kae ke ke toe ʼaumai mo haku moʼi pane.” 12 Neʼe ina tali age: “ ʼE au tala moʼoni atu ia muʼa ʼo Sehova, tou ʼAtua maʼuli, ʼe mole ʼi ai haku moʼi pane, gata pe ki he kiʼi moʼi falena ʼi te ʼaiʼaga falena lahi pea mo he kiʼi moʼi lolo ʼi te ʼaiʼaga lolo veliveli.+ Ko taku tae ʼaeni te ʼu fafie pea ʼe au toe liliu anai ki toku ʼapi ʼo teuteuʼi he meʼa kai maʼaku mo taku kiʼi tama. ʼE ma kakai anai, hili ʼaia, pea ʼe ma mamate anai.”

13 Kae neʼe ui age e Elia kia ia: “ ʼAua naʼa ke mataku. Alu ki tou ʼapi pea ke fai te meʼa ʼae neʼe ke ui. Kae ʼaki te ʼu meʼa ʼae ʼe kei toe, ke ke ʼuluaki fai muʼa maʼaku he kiʼi foʼi pane takafuafua, pea ke ʼaumai kia au. Pea hili ʼaia, ʼe feala leva hau teuteuʼi he meʼa maʼa koe mo tau kiʼi tama. 14 Koteʼuhi, koʼeni te folafola ʼa Sehova, te ʼAtua ʼo Iselaele: ‘ ʼE mole toe ʼosi anai te ʼaiʼaga falena lahi pea ʼe mole toe ʼago anai te ʼaiʼaga lolo veliveli ʼo kaku ki te ʼaho ʼae ka fakato ai e Sehova te ʼua ki te fuga kele.’ ”+ 15 Neʼe alu ai ʼo fai te meʼa ʼae neʼe ui age e Elia. Pea neʼe maʼu leva tanatou meʼa kai, ia ia mo tona loto fale ʼo feia mo Elia lolotoga ni tuʼuga ʼaho.+ 16 Neʼe mole toe ʼosi te ʼaiʼaga falena lahi pea neʼe mole toe ʼago te ʼaiʼaga lolo veliveli, ohage pe ko tona fakaha e Sehova ʼaki ia Elia.

17 Hili te ʼu meʼa ʼaia, neʼe mahaki leva te kiʼi tama ʼa te fafine ʼae ʼoʼona te ʼapi, pea neʼe kovi ʼosi tona mahaki, ʼo mate ai.+ 18 Pea neʼe ui e te fafine kia Elia: “Tagata ʼa te ʼAtua moʼoni, kotea te meʼa kovi ʼae neʼe au fai atu kia koe? Neʼe ke haʼu koa ʼo fakamanatuʼi mai taku agahala pea mo matehi taku kiʼi tama?”+ 19 Kae neʼe ina ui age: “Tuku mai tau kiʼi tama.” Neʼe toʼo leva e Elia mai ʼona nima te kiʼi tama ʼo hake mo ia ki te koga fale fata, ʼae neʼe nofo ai, pea neʼe ina fakatakoto ki tona palepale.+ 20 Neʼe pauʼi leva kia Sehova: “Sehova e siʼoku ʼAtua,+ ʼe ke toe fakamamahiʼi koa mo te fafine vitua ʼaeni ʼe ina fakaʼapi au, ʼo ke matehi tana kiʼi tama?” 21 Pea neʼe takoto tuʼa tolu leva ki te tamasiʼi mo pauʼi kia Sehova: “Sehova e siʼoku ʼAtua, fakalelei siʼou loto, kae ke toe maʼuli* te tamasiʼi ʼaeni.” 22 Neʼe fakalogo leva ia Sehova ki te kole ʼa Elia,+ pea neʼe toe maʼuli* ai te tamasiʼi.+ 23 Neʼe toʼo leva e Elia te tamasiʼi ʼo hifo mo ia mai te koga fale fata pea neʼe ina foaki age ki tana faʼe. Pea neʼe ui e Elia: “Sio, kua toe maʼuli tau kiʼi tama.”+ 24 Neʼe ui e te fafine kia Elia: “ ʼI te temi nei, kua au iloʼi leva ko koe ko he tagata ʼa te ʼAtua+ pea ko te folafola ʼa Sehova ʼae neʼe ke fakaha ʼe moʼoni.”