Te ʼu Gaue ʼa Te Kau Apositolo

12 ʼI te temi ʼaia, neʼe kamata fakatagaʼi e te hau ko Helote ʼihi ʼo te kokelekasio.+ 2 Neʼe ina fakatotonu ke matehi ia Sakopo te tehina ʼo Soane+ ʼaki te heleta.+ 3 ʼI tana sio ʼae neʼe leleiʼia e te kau Sutea te faʼahi ʼaia, neʼe ina fakatotonu ke puke mo Petelo. (Neʼe hoko lolotoga te ʼaho lahi ʼo Te ʼu Pane Hala Fakatupu.)+ 4 Neʼe ina fakatotonu ke pilisoniʼi+ pea ke leʼo e ni kutuga ʼe fa ʼe natou fetofetogiʼaki. Neʼe taki toko fa te tagata solia ʼi te kutuga. Neʼe ko tana manatu ke ʼaumai ia ia kia* muʼa ʼo te hahaʼi ʼi te hili ʼo te Pasikate. 5 Koia neʼe tuku ia Petelo ʼi te fale pilisoni, kae neʼe lahi tona hufakiʼi e te kokelekasio.+

6 ʼI te po ʼi muʼa ʼo tona ʼaumai e Helote kia muʼa ʼo te hahaʼi, neʼe moe ia Petelo ʼi te vaha ʼo te ʼu tagata solia ʼe toko lua pea neʼe haʼi ʼaki ni seini ʼe lua. Neʼe toe tutuʼu te ʼu tagata leʼo ʼi te muʼa matapa ʼo leʼo te fale pilisoni. 7 Kae fokifa pe neʼe tuʼu te ʼaselo ʼa Sehova,*+ pea neʼe malama te koga fale ʼae neʼe pilisoni ai. Neʼe ina ueueʼi ia Petelo, ʼo ina fafagu pea ina ui age: “Tuʼu fakavilivili ake!” Pea neʼe mavete te ʼu seini ʼi ʼona nima.+ 8 Neʼe ui e te ʼaselo ki ai: “Tui tou kofu mo ʼou sulie.” Neʼe fai ia ki ai. Pea neʼe ina toe ui ki ai: “Tui mo tou kofu tuʼa pea ke mulimuli mai.” 9 Pea neʼe hu ia Petelo ki tuʼa ʼo mulimuli ai, kae neʼe mole ina iloʼi neʼe moʼoni te meʼa ʼae neʼe lolotoga hoko mo te ʼaselo. Neʼe manatu ia neʼe sio ki he meʼa neʼe ha age. 10 Neʼe nā fakalaka ʼi te ʼuluaki kau leʼo pea mo te lua, ʼo nā kaku leva ki te matapa ukamea ʼae neʼe haga ki te kolo pea neʼe ava tokotahi ʼi ʼonā muʼa. ʼI tanā ʼosi to atu ki tuʼa, neʼe nā olo ʼi te ala pea neʼe mavae atu aipe te ʼaselo. 11 ʼI te mahino leva ʼa Petelo ki te meʼa ʼae neʼe hoko, neʼe ina ui: “Kua au iloʼi papau ʼi te temi nei neʼe fekauʼi mai e Sehova* tana ʼaselo ke ina haofaki au mai te nima ʼo Helote pea mo te ʼu meʼa fuli ʼae neʼe fakaʼamu e te kau Sutea ke hoko.”+

12 ʼI tana ʼosi fakakaukau neʼe alu leva ki te ʼapi ʼo Malia, te faʼe ʼa Soane ʼae ʼe toe higoa ko Maleko.+ Neʼe fakatahitahi ai ni tisipulo pea neʼe natou faikole. 13 ʼI tana tukituki te matapa lahi, neʼe haʼu ia te taʼahine faifekau ʼe higoa ko Lota ʼo vakaʼi pe ko ai. 14 Neʼe ina iloʼi ko te leʼo ʼo Petelo pea ʼi te lahi ʼo tona fiafia, neʼe mole ina avahi te matapa, kae neʼe lele ia ʼo fakaha ko Petelo ʼae ʼe tuʼu ʼi te muʼa matapa lahi. 15 Neʼe natou ui ki ai: “ ʼE ke vale.” Kae neʼe hoko atu pe tana ui ʼae ʼe ko Petelo. Neʼe natou ui: “ ʼE ko tona ʼaselo.” 16 Kae neʼe haga tukituki aipe e Petelo te matapa. ʼI tanatou avahi te matapa, neʼe natou sisio ki ai pea neʼe natou punamaʼuli ai. 17 Kae neʼe kalo age kia natou ke fakalogologo pea neʼe ina fakamatalatala age tona fakamavae e Sehova* mai te fale pilisoni, pea neʼe ina ui: “Kotou fakaha te ʼu meʼa ʼaeni kia Sakopo+ mo te ʼu tehina.” Neʼe mavae leva ʼo alu ki te tahi koga meʼa.

18 ʼI te ʼaho ake, neʼe feʼohoʼaki te kau solia ʼo kumi pe kotea ʼae kua hoko kia Petelo. 19 Neʼe fakatotonu e Helote ke kumi fakalelei ia ia kae neʼe mole natou maʼu. Neʼe ina fakafehuʼi te kau tagata leʼo pea ina fakatotonu ke tauteaʼi natou.+ Neʼe mavae leva ia Helote ʼi Sutea ʼo alu ki Sesalea, ʼo nofo ai ʼi he kiʼi temi.

20 Pea neʼe ita ki te hahaʼi ʼo Tile mo Sitoni. Koia ʼaki he lototahi neʼe natou ʼomai ki ai, pea hili tanatou fakalotoʼi ia Palasetusi, te tagata ʼae ʼe tokaga ki te ʼapi ʼo te hau,* neʼe natou kumi te tokalelei, koteʼuhi neʼe maʼu e ʼonatou fenua ia te meʼa kai mai te fenua ʼo te hau. 21 ʼI te ʼaho makehe, neʼe tui e Helote ʼona teu fakahau, ʼo heka ʼi te fakamauʼaga pea mo palalau leva ki te hahaʼi. 22 Ko te hahaʼi ʼae neʼe fakatahitahi neʼe natou kalaga: “ ʼE ko te leʼo ʼo he ʼatua, kae mole ko te leʼo ʼo he tagata!” 23 ʼI te temi pe ʼaia, neʼe fakato e te ʼaselo ʼa Sehova* kia ia he mahaki, koteʼuhi neʼe mole ina fakakololiaʼi te ʼAtua. Neʼe kai ia e ʼugaga pea neʼe mate leva.

24 Kae neʼe mafola te folafola ʼa Sehova* pea neʼe tuputupu ʼo kaugamalie ʼaupito te kau tisipulo.+

25 Ko Palenapa+ mo Saulo, ʼi tanā ʼosi foaki ia te tokoni ki te ʼu tehina ʼi Selusalemi,+ neʼe nā toe liliu ʼo nā ʼave mo naua ia Soane,+ ʼae ʼe toe higoa ko Maleko.