ʼUluaki Hau

11 Kae neʼe lahi leva te ʼu fafine matapule ʼae neʼe manako ai te Hau ko Salomone,+ ʼo mole gata pe ki te ʼofafine ʼo Falaone.+ Neʼe ko he ʼu fafine Moape,+ mo Amone,+ mo Etome, mo Sitoni+ pea mo Heti.+ 2 Neʼe natou kau ʼi te ʼu puleʼaga ʼae neʼe talanoa ki ai ia Sehova, ʼi tana ui age ki te kau Iselaele: “ ʼE mole tonu ke kotou fakatahi mo natou,* pea ʼe mole tonu ke natou fakatahi mo koutou, koteʼuhi ʼe natou uga moʼoni anai ʼokotou loto ke kotou tauhi ki ʼonatou ʼatua.”+ Kae neʼe pipiki ia Salomone kia natou pea mo ina leleiʼia ia natou. 3 Pea neʼe ko ʼona ʼohoana ʼe toko 700 ʼae neʼe ko ni fineʼaliki, pea mo ʼana fafine ʼe toko 300. Neʼe uga mamalie e ʼona ʼohoana ia tona loto* ke fakamamaʼo mai te ʼAtua. 4 ʼI te kua matuʼa ʼo Salomone,+ neʼe uga* e ʼona ʼohoana ia tona loto ke tauhi ki te tahi ʼu ʼatua,+ pea neʼe mole kei* katoa tona loto kia Sehova, tona ʼAtua, ʼo mole hage ko te loto ʼo Tavite, tana tamai. 5 Pea neʼe tauhi ia Salomone kia Asetolete,+ te ʼatua fafine ʼo te kau Sitoni pea mo Milikome,+ te ʼatua fakalialia ʼo te kau Amone. 6 Pea neʼe fai e Salomone te meʼa ʼae ʼe kovi kia mata ʼo Sehova, pea neʼe mole fakalogo katoa kia Sehova, ʼo mole hage ko Tavite, tana tamai.+

7 ʼI te temi ʼaia, neʼe laga e Salomone he faʼahi maʼoluga+ kia Kemosi, te ʼatua fakalialia ʼo Moape, ʼi te moʼuga ʼae neʼe haga ki Selusalemi, pea mo te tahi age faʼahi maʼoluga kia Moleke,+ te ʼatua fakalialia ʼo te kau Amone.+ 8 Neʼe ina fai te faʼahi ʼaia maʼa ʼona ʼohoana matapule fuli ʼae neʼe natou fai he ʼu sakilifisio pea mo tutu ke kohu ki ʼonatou ʼatua.

9 Neʼe kovi ʼosi te ita ʼo Sehova kia Salomone, he neʼe kua mamaʼo tona loto mai ia Sehova, te ʼAtua ʼo Iselaele,+ ʼae neʼe ha tuʼa lua age ki ai+ 10 pea mo ina fakatokaga ki ai ke ʼaua naʼa tauhi ki he tahi age ʼu ʼatua.+ Kae neʼe mole fakalogo ia ki te meʼa ʼae neʼe fakatotonu age e Sehova. 11 Koia, neʼe ui e Sehova kia Salomone: “ ʼE au toʼo fakamalohi anai mai ia koe te puleʼaga pea mo au foaki ki he tahi ʼo ʼau hahaʼi faifekau koteʼuhi neʼe ke fai te faʼahi ʼaia pea neʼe mole ke taupau taku fuakava pea mo ʼaku lao ʼae neʼe au fakatotonu atu.+ 12 Kae ʼe mole au fai anai te faʼahi ʼaia ʼi tou temi maʼuli, ʼuhi ko Tavite, tau tamai. ʼE au toʼo fakamalohi anai te puleʼaga mai te ʼu nima ʼo tou foha,+ 13 kae ʼe mole au toʼo fakamalohi anai te puleʼaga katoa.+ ʼE au foaki anai ki tou foha he telepi ʼe tahi,+ ʼuhi ko Tavite, taku tagata faifekau pea ʼuhi ko Selusalemi, te kolo ʼae neʼe au filifili.”+

14 Neʼe uga leva e Sehova ia Atati, te tagata Etome, mai te famili hau ʼo Etome,+ ke ina tauʼi ia Salomone.+ 15 ʼI te temi ʼae neʼe malo ai ia Tavite ʼi te kau Etome,+ neʼe haʼu ia Soape, te pule ʼo te foʼi kautau, ʼo tanu te kau mate, pea neʼe faiga ke ina matehi te ʼu tagata fuli ʼae ʼi Etome. 16 (Koteʼuhi neʼe nonofo ia Soape pea mo te kau Iselaele fuli ʼi ai lolotoga mahina ʼe ono ʼo kaku ki tana pulihi katoa te hahaʼi tagata ʼi Etome.) 17 Kae neʼe feholaki ia Atati mo ʼihi tagata faifekau Etome ʼo tana tamai, ʼo natou olo ki Esipito. ʼI te temi ʼaia, neʼe kei tupulaga ia Atati. 18 Neʼe natou mavae ai mai Matiane ʼo olo ki Palani. Neʼe natou toʼo he ʼu tagata mai Palani,+ ʼo natou olo ki Esipito kia Falaone te hau ʼo Esipito. Neʼe foaki age e Falaone kia ia tona ʼapi, mo hana meʼa kai pea mo hona moʼi kele. 19 Neʼe leleiʼia e Falaone ia Atati, ʼo ina foaki kia ia te tehina ʼo Takepanese tona ʼohoana, ia te fineʼaliki,* ke ʼohoana mo ia. 20 ʼAki te temi, neʼe fanauʼi leva e te tehina ʼo Takepanese he tamasiʼi tagata, neʼe higoa ko Kenupate, pea neʼe taupau* ia ia e Takepanese ʼi te fale ʼo Falaone. Neʼe maʼuli ia Kenupate ʼi te fale ʼo Falaone fakatahi mo te ʼu foha ʼo Falaone.

21 Neʼe logo leva ia Atati ʼi Esipito ki te kua mate ʼa Tavite* pea mo Soape, te pule ʼo te foʼi kautau.+ Koia neʼe ui e Atati kia Falaone: “Tuku ke au toe liliu ki toku fenua.” 22 Kae neʼe ui e Falaone ki ai: “ ʼE ʼi ai koa he meʼa ʼe mole ke maʼu ʼi heni, ʼae ʼe ke toe fia liliu ai ki tou fenua?” Neʼe ina tali age: “Kailoa ia, kae fakalelei siʼou loto, tuku ke au alu.”

23 Pea neʼe toe uga e te ʼAtua ia Lesone, te foha ʼo Eliata ke ina tauʼi ia Salomone.+ Neʼe hola ia Lesone mai tona ʼaliki, ia Atatesele+ te hau ʼo Tesopa. 24 Neʼe ina fakatahitahiʼi mai kia ia he ʼu tagata pea neʼe liliu ko te pule ʼo he kau solia, ʼi te temi ʼae neʼe malo ai* Tavite ia natou.+ Neʼe natou olo ai ki Tamaso+ ʼo nonofo ai, pea neʼe natou kamata pule ʼi Tamaso. 25 Neʼe ina tauʼi ia Iselaele ʼi te maʼuli katoa ʼo Salomone, ʼo hilifaki atu ki ai te agakovi ʼae neʼe fai e Atati, pea neʼe fehiʼa ki Iselaele ʼi te temi ʼae neʼe pule ai ʼi Silia.

26 Pea neʼe ʼi ai mo Selopoamo,+ te foha ʼo Nepate. Neʼe ko he tagata Efalaimi mai Teseleta, mo he tagata faifekau ʼa Salomone,+ pea neʼe higoa tana faʼe ko Teselua, ko he fafine vitua. Neʼe toe agatuʼu foki ia Selopoamo* ki te hau.+ 27 Koʼeni te tupuʼaga ʼo tana agatuʼu ki te hau: Neʼe laga e Salomone ia Milo*+ pea neʼe ina pupunu te ava ʼae ʼi te kaupa ʼo te Kolo ʼo Tavite, tana tamai.+ 28 Ko Selopoamo neʼe ko he tagata malohi. ʼI te sio ʼa Salomone ki tana faʼa gaue, neʼe ina fakanofo ke pule+ ki te hahaʼi fuli ʼo te telepi ʼo Sosefo ʼae neʼe ina fakamaʼua ke natou gaue maʼa ia. 29 ʼI te temi ʼaia, neʼe mavae ia Selopoamo mai Selusalemi, pea neʼe felaveʼi mo te polofeta ko Akisa,+ te tagata Silo ʼi te ala. Neʼe tui e Akisa he teu foʼou, pea neʼe ko naua toko lua pe ʼi te gaueʼaga. 30 Neʼe huʼi e Akisa tona teu foʼou, pea neʼe ina hae ia koga kie ʼe 12. 31 Neʼe ina ui leva kia Selopoamo:

“Toʼo maʼa koe he ʼu koga kie ʼe hogofulu, he ʼe koʼeni te folafola ʼa Sehova, te ʼAtua ʼo Iselaele: ‘ ʼE au toʼo te puleʼaga mai te ʼu nima ʼo Salomone, pea ʼe au foaki anai kia koe he ʼu telepi ʼe hogofulu.+ 32 Kae ʼe ina maʼu pe anai he telepi ʼe tahi+ ʼuhi ko Tavite, taku tagata faifekau+ pea ʼuhi ko Selusalemi, te kolo ʼae neʼe au filifili mai te ʼu telepi fuli ʼo Iselaele.+ 33 ʼE au fai anai te faʼahi ʼaia he neʼe natou liʼaki au+ kae natou tulolo ia muʼa ʼo Asetolete, te ʼatua fafine ʼo te kau Sitoni, mo Kemosi, te ʼatua ʼo Moape pea mo Milikome, te ʼatua ʼo te kau Amone. Pea neʼe mole natou fakalogo ʼo fai te meʼa ʼae ʼe lelei ki ʼoku mata mo mulimuli ki ʼaku lao pea mo ʼaku fakamau, ohage ko Tavite, te tamai ʼa Salomone. 34 Kae ʼe mole au toʼo anai te puleʼaga katoa mai ʼona nima, pea ʼe au tuku pe anai ke pule lolotoga tona maʼuli katoa, ʼuhi ko Tavite, taku tagata faifekau ʼae neʼe au filifili,+ he neʼe fakalogo ki ʼaku fakatotonu pea mo ʼaku lao. 35 Kae ʼe au toʼo anai te pule fakahau mai te ʼu nima ʼo tona foha, pea ʼe au foaki atu anai ia telepi ʼe hogofulu.+ 36 ʼE au foaki anai ki tona foha he telepi ʼe tahi, ke maʼu tuʼumaʼu pe e Tavite, taku tagata faifekau, he malama* ʼi ʼoku muʼa ʼi Selusalemi,+ te kolo ʼae neʼe au filifili maʼaku ke fakamaʼuhigaʼi ai toku huafa. 37 ʼE au fakanofo anai koe, pea ʼe ke pule anai kia meʼa fuli ʼe ke loto ki ai, pea ʼe ke liliu anai ko te hau ʼo Iselaele. 38 Pea kapau ʼe ke fakalogo ki te ʼu meʼa fuli ʼae ʼe au fakatotonu atu mo fai te meʼa ʼae ʼe lelei ki ʼoku mata, mo ke fakalogo ki ʼaku lao pea mo ʼaku fakatotonu, ohage ko Tavite, taku tagata faifekau,+ ʼe au toe nofo anai mo koe. ʼE au fakatuʼu anai hou hologa hau ʼo talu ai, ohage ko taku fai kia Tavite,+ pea ʼe au foaki atu anai ia Iselaele. 39 Pea ʼe au fakalainoaʼi anai te hakoga ʼo Tavite ʼuhi ko te ʼu aga ʼe kovi neʼe natou fai,+ kae ʼe mole au fai anai te faʼahi ʼaia ʼo talu ai.’ ”+

40 Koia neʼe faigaʼi ai e Salomone ke ina matehi ia Selopoamo, kae neʼe hola ia Selopoamo ki Esipito, kia Sisake+ te hau ʼo Esipito,+ pea neʼe nofo ʼi Esipito ʼo kaku ki te mate ʼa Salomone.

41 Ko te toe ʼo te hisitolia ʼo Salomone, te ʼu meʼa fuli ʼae neʼe ina fai pea mo tona poto, ʼe mole tuʼu koa la ʼi te tohi ʼo te hisitolia ʼo Salomone?+ 42 Ko te temi* ʼae neʼe pule ai ia Salomone ʼi Selusalemi ki Iselaele katoa neʼe ko taʼu ʼe 40. 43 Neʼe mate leva ia Salomone* pea neʼe ʼavaifo ʼi te Kolo ʼo Tavite, tana tamai. Neʼe hau leva ia Lopoame, tona foha,+ ʼo fetogi ia ia.