Selemia
38 Neʼe logo leva ia Sefatia foha ʼo Matani, mo Ketalia foha ʼo Pasule, mo Sukale+ foha ʼo Selemi pea mo Pasule+ foha ʼo Malekisa ki te ʼu palalau ʼaeni ʼa Selemia ki te hahaʼi fuli: 2 “Koʼeni te folafola ʼa Sehova: ‘Ko ia ʼae ka nofo ʼi te kolo ʼaeni ʼe mate anai ia ʼi te tau, mo te hoge peʼe ko te taʼi mahaki.*+ Kae ko ia ʼae ka alu ki te kau Kaletea ʼe hao anai ia, ʼe ina maʼu anai tona fakapale ʼae ko te maʼuli.’+ 3 Koʼeni te folafola ʼa Sehova: ‘ ʼE mole tuʼu malohi anai ia te kolo ʼaeni ia muʼa ʼo te foʼi kautau ʼo te hau ʼo Papiloni. ʼE ina maʼu anai ia.’ ”+
4 Neʼe ui leva e te ʼu tama ʼaliki ki te hau: “Ke matehi te tagata ʼaeni+ koteʼuhi ʼaki ʼana palalau ʼe ina fakalotovaivaiʼi* te kau solia ʼae ʼe kei toe ʼi te kolo ʼaeni pea mo te hahaʼi katoa. ʼE mole loto e te tagata ʼaeni ke tokalelei te hahaʼi kae ke natou malaʼia.” 5 Neʼe tali leva e te Hau ko Setesiasi: “ ʼIo. Kotou fai kia ia te meʼa ʼae ʼe kotou loto ki ai koteʼuhi ʼe mole feala ke taʼofi koutou e te hau.”
6 Koia neʼe natou toʼo ai ia Selemia ʼo ʼai ki te foʼi tane vai ʼo Malekisa, te foha ʼo te hau,* ʼae neʼe tuʼu ʼi te Malaʼe ʼo Te Kau Leʼo.+ Neʼe natou fakahifo ai ia Selemia ʼaki ni maea. Neʼe mole ʼi ai he vai ʼi te foʼi tane kae neʼe ko te pela ʼatea pea neʼe kamata mou leva ia Selemia ʼi te pela.
7 Neʼe iloʼi leva e Epeti-meleke,+ te Etiopea, ko he tagata enuke* ʼo te fale hau, neʼe natou ʼai ia Selemia ki te foʼi tane vai. Neʼe heka te hau ʼi te Matapa ʼo Pesamino.+ 8 Pea neʼe hu mai ki tuʼa ia Epeti-meleke ʼi te fale hau ʼo alu ʼo ui ki te hau: 9 “Siʼoku ʼaliki hau, ʼe kovi te meʼa ʼae neʼe fai e te ʼu tagata ʼaia ki te polofeta ko Selemia. Neʼe natou li ki te foʼi tane vai pea ʼe mate pakupaku anai ’i ai he ʼe mole kei ʼi ai he foʼi pane ʼi te kolo.”+
10 Neʼe fakatotonu ai leva e te hau kia Epeti-meleke, te tagata Etiopea: “Toʼo ʼi heni he ʼu tagata ʼe toko 30 pea kotou olo ʼo toho ake te polofeta ko Selemia mai te foʼi tane vai naʼa mate.” 11 Neʼe ʼave leva e Epeti-meleke ia te ʼu tagata ʼo natou fehufi ki te fale hau, ki he koga meʼa ʼe tuʼu ʼi te lalo tanakiʼaga koloa.+ Neʼe natou toʼo ai ni moʼi penuʼi kie pea neʼe natou fakahifo kia Selemia ʼaki ni maea ʼi te foʼi tane vai. 12 Neʼe ui e Epeti-meleke, te tagata Etiopea kia Selemia: “Fakalelei siʼou loto, ʼai te ʼu moʼi penuʼi kie ki ʼou lalo ʼafiga naʼa lavea ʼi te ʼu maea.” Neʼe fai leva ki ai ia Selemia. 13 Pea ʼi te toho ake ʼo te ʼu maea, neʼe natou fakahake ake ai ia ia mai te foʼi tane vai. Pea neʼe nofo aipe ia Selemia ʼi te Malaʼe ʼo Te Kau Leʼo.+
14 Neʼe fekauʼi e te Hau ko Setesiasi ke ʼaumai te polofeta ko Selemia ki te tolu huʼaga ʼo te fale lotu ʼo Sehova. Neʼe ui e te hau kia Selemia: “ ʼE au fai atu taku fehuʼi. Pea ke tali mai, ʼaua naʼa ke fufu he meʼa.” 15 Neʼe ui age e Selemia kia Setesiasi: “Kapau ʼe au tali atu, ʼe mahino ia ʼe ke matehi anai au. Pea kapau ʼe au fai atu he tokoni, ʼe mole ke fakalogo mai anai.” 16 Neʼe fai leva te fakapapau fakafufu e te Hau ko Setesiasi kia Selemia: “ ʼE au fakapapau atu ʼi te huafa ʼo Sehova, te ʼAtua maʼuli ʼae ʼe ina foaki mai te maʼuli ʼaeni, ʼe mole au matehi anai koe. Pea ʼe mole au tuku anai koe ki te ʼu nima ʼo natou ʼae ʼe natou fia matehi ia koe.”
17 Neʼe ui leva e Selemia kia Setesiasi: “Koʼeni te folafola ʼa Sehova, te ʼAtua ʼo te ʼatu kautau, te ʼAtua ʼo Iselaele: ‘Kapau ʼe ke alu ki te ʼu tama ʼaliki ʼa te hau ʼo Papiloni, ʼe haofaki anai koe. ʼE mole tutu anai te kolo ʼaeni, pea ʼe ke maʼuli anai mo tou famili.+ 18 Kae kapau ʼe mole ke alu ki te ʼu tama ʼaliki ʼa te hau ʼo Papiloni, ʼe maʼu anai te kolo ʼaeni e te kau Kaletea ʼo natou tutu.+ Pea ʼe natou puke anai ia koe.’ ”+
19 Neʼe ui e te Hau ko Setesiasi kia Selemia: “ ʼE au mataku ʼi te kau Sutea ʼae neʼe feholaki ki te kau Kaletea. Kapau ʼe ʼave ia au kia natou, ʼe lagi natou gaohi koviʼi anai au.” 20 Kae neʼe tali age e Selemia: “ ʼE mole ʼave anai ia koe kia natou. Fakalelei siʼou loto kae ke fakalogo kia Sehova. Fai te meʼa ʼae ʼe au ui atu. ʼE fua lelei anai kia koe pea ʼe ke maʼuli anai. 21 Kae kapau ʼe ke fakafisi koe ʼo mole ke alu, ʼe hoko anai kia koe te meʼa ʼae neʼe fakaha mai e Sehova: 22 Koʼeni ko te ʼu fafine fuli ʼae ʼe kei nonofo ʼi te fale ʼo te hau ʼo Suta ʼe ʼave ki te ʼu tama ʼaliki ʼa te hau ʼo Papiloni,+ pea ʼe natou ui:
‘Neʼe kakaʼi mo malo ia koe te ʼu tagata ʼae neʼe ke falala ki ai.+
Neʼe natou fakaulu tou vaʼe ki te pela.
Pea neinei kua natou feholaki.’
23 ʼE ʼave anai ʼou ʼohoana fuli mo ʼou foha ki te kau Kaletea. ʼE mole ke hao anai ʼi te kau Kaletea. ʼE puke anai koe e te hau ʼo Papiloni+ pea ʼuhi ko koe ʼe tutu anai te kolo ʼaeni.”+
24 Neʼe ui leva e Setesiasi kia Selemia: “Kapau ʼe ke fia maʼuli, ʼaua naʼa ke fakaha te ʼu meʼa ʼaia ki he tahi. 25 Pea kapau ʼe iloʼi e te ʼu tama ʼaliki neʼe au palalau mo koe pea kapau ʼe natou ʼomai ʼo fehuʼi atu: ‘Fakamatala mai te ʼu meʼa ʼae neʼe ke ui ki te hau. Fakamatala fuli mai kia matou, pea ʼe mole matou matehi anai ia koe.+ Kotea ʼae neʼe ui atu e te hau?’ 26 ʼe tonu anai ke ke tali age kia natou: ‘Neʼe au kole ki te hau ke tuku toku ʼave ki te fale ʼo Seonatane naʼa au mate ai.’ ”+
27 Neʼe ʼomai leva te ʼu tama ʼaliki fuli ʼo vakaʼi ia Selemia pea mo fakafehuʼi. Neʼe tali age e Selemia te ʼu meʼa pe ʼae neʼe fakatotonu age e te hau. Neʼe mole natou toe fakafehuʼi he neʼe mole logoʼi e he tahi tanā faipalalau. 28 Neʼe nofo ai ia Selemia ʼi te Malaʼe ʼo Te Kau Leʼo ʼo kaku ki te ʼaho ʼae neʼe maʼu ai ia Selusalemi e te kau Kaletea.+ Neʼe kei nofo ai pe ʼi te temi ʼae neʼe to ai ia Selusalemi.+