ʼUluaki Kolonito
1 Ko au Paulo, ʼae neʼe pauʼi ke liliu ko he apositolo+ ʼa Kilisito* Sesu ʼo mulimuli ki te finegalo ʼo te ʼAtua, pea mo totatou tehina ko Sositene. 2 ʼE ma momoli atu te tohi ʼaeni kia koutou ʼo te kokelekasio ʼa te ʼAtua ʼae ʼi Kolonito,+ ʼae neʼe fakamaʼoniʼoniʼi ʼi takotou fakatahi mo Kilisito Sesu,+ pea neʼe pauʼi koutou ke kotou maʼoniʼoni, ʼo feia mo natou fuli ʼae ʼe natou fetapa ʼi te ʼu potu fuli pe ki te huafa ʼo totatou ʼAliki ʼa tatou fuli, ia Sesu Kilisito:+
3 Ke foaki atu e te ʼAtua tatatou Tamai pea mo te ʼAliki ko Sesu Kilisito ia te ʼofa makehe pea mo te tokalelei.
4 ʼE au fakafetaʼi tuʼumaʼu ki toku ʼAtua ʼo ʼuhiga mo koutou ʼuhi ko te ʼofa makehe ʼae neʼe fakaha atu e te ʼAtua ʼaki ia Kilisito Sesu. 5 Koteʼuhi ʼe lahi te ʼu koloa kua kotou maʼu ʼi takotou fakatahi mo Kilisito, ʼo kotou popoto ʼi te palalau pea mo kotou maʼu he ʼatamai malama ʼe katoa,+ 6 pea ʼe ha lelei ai kua tuʼu malohi ia koutou te fakamoʼoni ʼo ʼuhiga mo Kilisito.+ 7 ʼUhi ko te faʼahi ʼaia, ʼe kotou maʼu te ʼu meʼa fuli ʼae ʼe ʼaoga kia koutou ʼi takotou fakaatalitali ki te fakaha ʼo totatou ʼAliki ko Sesu Kilisito.+ 8 ʼE toe fakamalohiʼi anai koutou ʼo kaku ki te fakaʼosi, ke mole tukugakoviʼi koutou e he tahi ʼi te ʼaho ʼo totatou ʼAliki ko Sesu Kilisito.+ 9 ʼE agatonu te ʼAtua,+ ia ia ʼae neʼe ina pauʼi koutou ke kotou fakatahi mo tona ʼAlo, ia Sesu Kilisito totatou ʼAliki.
10 ʼE au fakalotomalohiʼi koutou, ʼu tehina, ʼi te huafa ʼo totatou ʼAliki ko Sesu Kilisito, ke tatau te ʼu meʼa ʼae ʼe kotou palalau ki ai. Ke mole hoko he maveuveu ia koutou,+ kae ke kotou logo tahi ʼi he manatu ʼe tahi pea mo he faʼahiga fakakaukau ʼe tahi.+ 11 Koteʼuhi, ʼoku tehina, neʼe fakaha mai e ʼihi ʼo te loto fale ʼo Koloe, ʼe hoko ni maveuveu ia koutou. 12 ʼE au talanoa ki takotou tahi ui: “ ʼE au kau mo Paulo,” “ ʼE au kau au mo Apolose,”+ “ ʼE au kau au mo Sefasi,”* “ ʼE au kau au mo Kilisito.” 13 Kae ʼe mavetevete koa ia Kilisito? Neʼe tutuki koa ia Paulo ki he pou maʼa koutou? Pe neʼe papitemaʼi koa koutou ʼi te higoa ʼo Paulo? 14 ʼE au lotofakafetaʼi ki te ʼAtua ʼi taku mole papitemaʼi he tahi ia koutou, gata pe kia Kilisipusi+ pea mo Kaiusi,+ 15 ke mole ui ai e he tahi neʼe au papitemaʼi koutou ʼi toku higoa. 16 ʼE moʼoni foki, neʼe au toe papitemaʼi mo te loto fale ʼo Setefanasi.+ Kae ʼe mole au iloʼi pe neʼe au papitemaʼi he tahi age. 17 Neʼe mole fekauʼi mai au e Kilisito ke au faipapitema kae ke au tala te logo lelei.+ Pea ʼe mole au fai ʼaki he poto palalau, naʼa mole he ʼaoga ʼo te pou fakamamahi* ʼo Kilisito.
18 ʼE moʼoni, ko te akonaki ʼo ʼuhiga mo te pou fakamamahi* ʼe ko he meʼa vale ia kia natou ʼae ka fakaʼauha,+ kae kia tatou ʼae ʼe haofaki, ʼe ko te malohi ia ʼo te ʼAtua.+ 19 Koteʼuhi neʼe tohi: “ ʼE au pulihi anai te poto ʼo te kau popoto, pea mo au liʼaki* anai te ʼu manatu ʼa te kau ʼatamai.”+ 20 ʼI te malama* ʼaeni, ʼe ʼifea koa te tagata poto? ʼE ʼifea koa te sekelipa?* ʼE ʼifea koa te tagata faifilosofia? Neʼe mole koa la fakaliliu e te ʼAtua ʼo vale ia te poto ʼo te malamanei? 21 Koteʼuhi ʼi te poto ʼo te ʼAtua, neʼe mole feala ke iloʼi e te malamanei ia te ʼAtua+ ʼaki tona poto,+ kae neʼe fiafia ia te ʼAtua ʼi tana haofaki ia natou ʼae neʼe tui ʼaki te logo ʼae ʼe tou fakamafola pea ʼe hage ko he meʼa vale+ ki ʼihi.
22 Koteʼuhi ʼe kole e te kau Sutea he ʼu milakulo+ pea ʼe kumi e te kau Keleka te poto. 23 Kae ʼe tou fakamafola ia Kilisito ʼae neʼe tutuki ki te pou, pea ʼe tukia ai te kau Sutea kae ʼe ko he meʼa vale ia maʼa te ʼu puleʼaga.+ 24 Kae ki te kau Sutea mo te kau Keleka ʼae neʼe pauʼi, ko Kilisito ʼe ko te malohi ʼo te ʼAtua pea mo te poto ʼo te ʼAtua.+ 25 Ko he meʼa vale ʼe haʼu mai te ʼAtua ʼe poto age ia ʼi te tagata pea ko he meʼa vaivai ʼe haʼu mai te ʼAtua ʼe malohi age ia ʼi te tagata.+
26 Koteʼuhi ʼe kotou tokagaʼi, ʼu tehina, mai ia koutou ʼae neʼe pauʼi ʼe mole kaugamalie ia natou ʼae ʼe popoto ʼo mulimuli ki te manatu fakatagata,+ ʼe mole kaugamalie te kau malolohi, ʼe mole kaugamalie te kau ʼaliki,*+ 27 kae neʼe filifili e te ʼAtua ia natou ʼae ʼe vavale kia mata ʼo te malamanei, ke ufiufi ai te kau popoto. Pea neʼe filifili e te ʼAtua ia natou ʼae ʼe vaivai kia mata ʼo te malamanei, ke ufiufi ai ia natou ʼe malolohi.+ 28 Pea neʼe filifili e te ʼAtua te ʼu meʼa ʼae ʼe malalo ki te hahaʼi pea mo te ʼu meʼa ʼae ʼe fehiʼaʼinaʼi, mo te ʼu meʼa ʼae ʼe meʼa noaʼi, ke molehi ai te ʼu meʼa ʼae ʼe maʼuhiga.+ 29 ʼE mole feala ai ke fiameʼameʼa he tahi* ia muʼa ʼo te ʼAtua. 30 Kae ʼe kotou fakatahi mo Kilisito Sesu ʼuhi ko te ʼAtua. ʼE fakaha mai e Sesu te poto pea mo te faitotonu ʼa te ʼAtua.+ ʼAki ia ia, ʼe feala ai ke tou maʼoniʼoni+ pea ʼaki te totogi* ʼe feala ai ke fakaʼateainaʼi tatou.+ 31 Koia ohage ko tona tohi: “Ko ia ʼae ʼe laupisi, ke laupisi ʼo ʼuhiga mo Sehova.”*+