ʼUluaki Koloniko
29 Pea neʼe ui leva e te Hau ko Tavite ki te hahaʼi katoa: “Ko toku foha ko Salomone, ʼae neʼe filifili e te ʼAtua,+ ʼe kei tamasiʼi pea ʼe heʼeki ina iloʼi he meʼa.*+ Pea ʼe lahi te gaue, he ʼe mole ko he fale lotu* maʼa he tagata kae ko he fale lotu ia maʼa Sehova ʼAtua.+ 2 Neʼe au kinakina ʼi te teuteuʼi te ʼu meʼa kehekehe maʼa te fale ʼo toku ʼAtua: te aulo, mo te siliva, mo te kapa, mo te ukamea+ mo te ʼu ʼakau,+ mo te ʼu maka ʼae ko te onise, mo te tahi age ʼu faʼahiga maka, mo te ʼu kiʼi maka fakateuteu, mo te ʼu faʼahiga maka maʼuhiga kehekehe, pea mo te ʼu maka ʼae ko te alapate ʼe lahi ʼaupito. 3 Tahi ʼae meʼa, ʼe au fiafia ʼo ʼuhiga mo te fale ʼo toku ʼAtua,+ koia ʼe au toe toʼo foki mai ʼoku koloa+ te aulo mo te siliva ʼo foaki maʼa te fale ʼo toku ʼAtua, ʼo hilifaki ki te ʼu meʼa fuli ʼae neʼe au teuteuʼi maʼa te fale taputapu. 4 Koʼeni te ʼu meʼa ʼae ʼe au foaki: ko te ʼu taleta* aulo ʼe 3 000 mai Ofile,+ mo te ʼu taleta siliva ʼe 7 000 neʼe fakamaʼa moʼo ʼaofi ʼaki te ʼu kaupa ʼo te ʼu koga fale, 5 pea mo fai ʼaki te ʼu meʼa ʼae ʼe tonu ke fai ʼaki te aulo mo te siliva, pea mo te ʼu gaue fuli ʼa te kau tufuga. Pea ʼi te lakaga nei, ko ai ʼae ʼe lotolelei ke haʼu ʼo foaki hana meʼa ʼofa kia Sehova?”+
6 Pea neʼe lotolelei ki ai ia te kau ʼaliki ʼo te ʼu famili, mo te kau ʼaliki ʼo te ʼu telepi ʼo Iselaele, mo te kau pule ʼo he toko afe mo te kau pule ʼo he toko teau,+ pea mo te kau pule ʼae ʼe tokakaga ki te ʼu gaue ʼa te hau.+ 7 Neʼe natou foaki ki te ʼu gaue ʼae ka fai ʼi te fale ʼo te ʼAtua moʼoni ia taleta aulo ʼe 5 000, mo taleke* ʼe 10 000, mo taleta siliva ʼe 10 000, mo taleta kapa ʼe 18 000 pea mo taleta ukamea ʼe 100 000. 8 Ko he tahi pe neʼe ina maʼu he ʼu maka maʼuhiga, neʼe ina foaki ki te fale tanakiʼaga koloa ʼo te fale ʼo Sehova, ʼae neʼe tokaga ki ai ia Sehiele+ te tagata Kelesoni.+ 9 Neʼe fiafia te hahaʼi ʼi tanatou foaki ʼaki he lotolelei te ʼu meʼa ʼofa ʼaia kia Sehova mo tonatou loto katoa,+ pea neʼe toe fiafia lahi mo te hau ko Tavite.
10 Neʼe vikiʼi leva e Tavite ia Sehova ia muʼa ʼo te hahaʼi katoa. Neʼe ui e Tavite. “Sehova e, te ʼAtua ʼo Iselaele tamatou tamai, ke vikiʼi koe ʼo heʼe gata.* 11 Sehova e, ʼe ʼa koe te maʼoluga,+ mo te mafimafi,+ mo te matalelei, mo te taulekaleka pea mo te ʼalikisia,+ koteʼuhi ko te ʼu meʼa fuli ʼae ʼi te lagi mo te kele ʼe ʼa koe.+ Sehova e, ʼe ʼa koe te puleʼaga.+ ʼE ke hikihiki ia koe totonu ʼo ke maʼoluga ai ia meʼa fuli. 12 ʼE haʼu mai ia koe te ʼu koloa mo te kololia,+ pea ʼe ke pule kia meʼa fuli.+ ʼE maʼu ʼi tou nima te malohi+ mo te mafimafi,+ pea ʼe feala ke ke hiki te tuʼulaga ʼo he tahi+ pea ke ke foaki te malohi ki te hahaʼi fuli.+ 13 ʼI te lakaga leva ʼaeni, siʼomatou ʼAtua, ʼe matou fakafetaʼi kia te koe pea mo fakavikiviki ki tou huafa taulekaleka.
14 “Kae ko ai koa ia au pea mo siʼaku hahaʼi ke matou foaki atu ai ʼaki he lotolelei te ʼu meʼa ʼofa ʼaeni? Koteʼuhi ko meʼa fuli pe ʼe haʼu mai ia te koe, pea neʼe matou foaki atu te ʼu meʼa ʼae ʼe haʼu mai tou nima. 15 Koteʼuhi ko matou ko ni matapule ʼi ʼou muʼa pea mo ni hahaʼi mai he tahi age fenua, ohage pe ko ʼamatou kui fuli.+ Koteʼuhi ʼe hage pe ʼomatou ʼaho ʼi te kele ko he malumalu,+ pea ʼe mole ʼi ai he ʼamanaki. 16 Sehova e, siʼomatou ʼAtua, ko te ʼu koloa fuli ʼaeni neʼe matou teuteuʼi ke laga ai maʼa koe he fale ke fakakololiaʼi ai tou huafa maʼoniʼoni, ʼe haʼu ia mai tou nima, pea ko meʼa fuli ʼe ʼa koe. 17 Siʼoku ʼAtua, ʼe au iloʼi lelei ʼe ke sivisivi te ʼu loto+ pea ʼe ke fiafia moka agatonu* he tahi.+ Neʼe au foaki atu te ʼu meʼa fuli ʼaeni ʼaki he lotolelei pea mo he loto ʼe faitotonu,* pea ʼe au fiafia ʼaupito ʼi taku sio ki te foaki atu e tau hahaʼi ʼaeni te ʼu meʼa ʼofa ʼaki he lotolelei. 18 Sehova e, te ʼAtua ʼo Apalahamo, mo Isaake pea mo Iselaele ʼamatou kui, tokoni mai ki te hahaʼi ʼaeni ke natou taupau ʼo talu ai ʼi ʼonatou loto te ʼu manatu ʼaia, pea ke natou tauhi kia te koe ʼaki ʼonatou loto katoa.+ 19 Foaki ki siʼoku foha ko Salomone he loto ʼe katoa,+ ke feala hana mulimuli ki ʼau fakatotonu,+ mo ʼau fakamanatu, mo ʼau lekula pea ke ina fai te ʼu meʼa fuli ʼaeni mo laga te fale lotu* ʼae neʼe au fai ki ai ni teuteu.”+
20 Neʼe ui leva e Tavite ki te hahaʼi katoa: “ ʼI te lakaga leva ʼaeni, kotou fakavikiviki kia Sehova tokotou ʼAtua.” Pea neʼe fakavikiviki ia te hahaʼi katoa kia Sehova te ʼAtua ʼo ʼanatou kui. Neʼe natou tuʼutuli ifo pea mo tulolo ia muʼa ʼo Sehova pea mo te hau. 21 Pea ʼi te ʼaho ake, neʼe hoko atu pe tanatou fai ni sakilifisio kia Sehova pea mo momoli ni holokoseta+ kia Sehova: neʼe ko vitulo kei mui ʼe 1 000, mo ovi tagata ʼe 1 000, mo akeno tagata ʼe 1 000, pea mo ʼanatou molaga vino.+ Neʼe lahi ʼaupito te ʼu sakilifisio ʼae neʼe natou fai maʼa Iselaele katoa.+ 22 ʼI te ʼaho ʼaia, neʼe hoko atu pe tanatou kakai mo iinu ia muʼa ʼo Sehova mo he toe fiafia lahi.+ Pea neʼe natou fakanofo hau ia Salomone te foha ʼo Tavite ia muʼa ʼo Sehova ke liliu ko honatou takitaki, ko tona tuʼa lua ʼaia.+ Neʼe natou toe fakanofo foki mo Satoke ko he pelepitelo.+ 23 Neʼe heka leva ia Salomone ʼi te hekaʼaga fakahau ʼo Sehova+ ke hau ʼo fetogi ia Tavite tana tamai. Neʼe fua manuʼia tana pule fakahau pea neʼe fakalogo te kau Iselaele fuli kia ia. 24 Ko te kau ʼaliki fuli+ mo te kau tagata tau malolohi fuli,+ ʼo feia mo te ʼu foha fuli ʼo te Hau ko Tavite+ neʼe natou fakalogo ki te hau ko Salomone. 25 Pea neʼe hikihiki e Sehova ia Salomone ke liliu ko he tahi ʼe maʼuhiga ʼaupito kia mata ʼo Iselaele katoa, neʼe ina foaki age kia ia he faʼahiga pule neʼe heʼeki maʼu e he hau ʼo Iselaele ʼi muʼa atu.+
26 Neʼe pule ia Tavite te foha ʼo Sese ki Iselaele katoa, 27 pea ko te temi* ʼae neʼe pule ai ki Iselaele neʼe ko taʼu ʼe 40. ʼI Hepelone, neʼe pule lolotoga taʼu ʼe 7,+ pea ʼi Selusalemi neʼe pule lolotoga taʼu ʼe 33.+ 28 Neʼe mate leva ʼi tona temi matuʼa,+ neʼe fiafia ʼi te loaloaga ʼo tona maʼuli, mo tana maʼu koloa pea mo maʼu te kololia. Neʼe hau leva tona foha ko Salomone ʼo fetogi ia ia.+ 29 Ko te hisitolia ʼo te Hau ko Tavite, mai tona kamata ki tona fakaʼosi, ʼe kua tuʼu ʼi te ʼu tohi ʼa Samuele, te tagata ʼae ʼe ina iloʼi te ʼu meʼa ʼae neʼe ha,* mo Natane+ te polofeta pea mo Kate,+ te tagata ʼae ʼe ina iloʼi te ’u meʼa ʼae neʼe ha. 30 ʼE fakamatala ʼi te ʼu tohi ʼaia tana pule fakahau, mo tona malohi, pea mo te ʼu aluʼaga fuli ʼae neʼe hoko ʼi tona temi ʼo ʼuhiga mo ia, mo Iselaele pea mo te ʼu puleʼaga fuli ʼae ʼi ʼona tafaʼaki.