Lua Samuele

7 ʼI te temi ʼae neʼe kua nofo ai te hau ʼi tona fale*+ mo foaki e Sehova kia ia te tokalelei, ʼi tana haofaki ia ia mai ʼona fili fuli ʼae ʼi ʼona tafaʼaki, 2 neʼe ui e te hau ki te polofeta ko Natane:+ “Koʼeni ʼe au nofo ʼi he fale neʼe faʼu ʼaki te ʼakau ko te sete,+ kae tuku te Aleka ia ʼo te ʼAtua moʼoni ʼi he fale la.”+ 3 Neʼe tali e Natane ki te hau: “Alu pea ke fai te meʼa ʼae ʼe ke loto ki ai, he ʼe nofo ia Sehova mo koe.”+

4 ʼI te po pe ʼaia, neʼe ui e Sehova kia Natane: 5 “Alu pea ke ui ki taku tagata faifekau ko Tavite: ‘Koʼeni te folafola ʼa Sehova: “ ʼE ke laga anai koa he fale ke au nofo ʼi ai?+ 6 Neʼe mole au nofo ʼi he fale talu mai te ʼaho ʼae neʼe au fakamavae ai te hahaʼi ʼo Iselaele mai Esipito ʼo kaku mai ki te ʼaho nei,+ kae neʼe au fehikiʼaki,* ʼo au nofo ʼi he fale la pea ʼi he tapenakulo.+ 7 ʼI te temi fuli ʼae neʼe au nofo ai mo te kau Iselaele,* neʼe au palalau koa ʼo ʼuhiga mo te faʼahi ʼaia ki he tahi ʼo te ʼu pule telepi ʼo Iselaele ʼae neʼe au fakanofo ke tokaga ki taku hahaʼi ko Iselaele? Neʼe au fehuʼi age koa pe koʼe neʼe mole natou laga hoku fale ʼaki te ʼakau ʼae ko te sete?” ’ 8 Koia, ʼi te temi ʼaeni, ui age ki taku tagata faifekau ko Tavite: ‘Koʼeni te folafola ʼa Sehova ʼo te ʼatu kautau: “Neʼe au toʼo koe mai te ʼu koga meʼa ʼae neʼe ke taupau ai te faga ovi, ʼae neʼe ke muliʼi,+ ke ke liliu ko te tagata takitaki ʼo taku hahaʼi ko Iselaele.+ 9 ʼE au nofo anai mo koe ʼi te ʼu faʼahi fuli pe ʼae ʼe ke alu ki ai,+ pea ʼe au pulihi anai ʼou fili fuli ʼi ʼou muʼa.+ ʼE au fakaliliu anai tou higoa ke iloa,+ ohage ko te higoa ʼo te kau tagata iloa ʼo te kele. 10 ʼE au foaki anai ki taku hahaʼi ko Iselaele ia he koga meʼa ke natou nonofo ai, pea ʼe natou maʼuʼuli anai ʼi ai pea ʼe mole toe ʼi ai anai he maveuveu. ʼE mole gaohi koviʼi anai natou e he hahaʼi agakovi, ohage ko tanatou fai ʼi te temi muʼa,+ 11 talu mai te ʼaho ʼae neʼe au fakanofo ai he kau tuʼi fakamau+ ki taku hahaʼi ko Iselaele. ʼE au foaki atu anai te tokalelei, ʼo au fakaʼateainaʼi koe mai ʼou fili fuli.+

“ ‘ “Pea tahi ʼae meʼa, neʼe fakaha atu e Sehova ʼe fakaliliu anai e Sehova tou famili ko he hologa hau.*+ 12 Ka ke mate+ pea moka tanu koe mo ʼau kui, ʼe au fakanofo anai tou hakoga, ia tou foha totonu ko he hau, pea ʼe au fakatuʼu anai ke malohi tona puleʼaga.+ 13 ʼE ko ia ʼae ka ina laga he fale ke fakakololiaʼi ai toku huafa,+ pea ʼe au fakatuʼu anai te hekaʼaga fakahau ʼo tona puleʼaga ke malohi ʼo talu ai.+ 14 ʼE au liliu anai ko tana tamai, pea ʼe liliu anai ia ko toku foha.+ Ka ina fai he meʼa ʼe kovi, ʼe au fakatonutonuʼi anai ia ia ʼaki te kauʼi ʼakau ʼae ʼe fakaʼaogaʼi e te tagata, pea ʼe au tauteaʼi anai ia ia ʼo au ta ohage ko tona fai e te ʼu foha ʼo te tagata.*+ 15 ʼE mole mavae anai toku ʼofa agatonu mai ia ia, ohage ko taku toʼo mai ia Saulo,+ ia ia ʼae neʼe au toʼo kehe mai ʼou muʼa. 16 ʼE tuʼu anai tou hologa hau mo tou puleʼaga ʼo heʼe gata. ʼE fakatuʼu anai tou hekaʼaga fakahau ke malohi ʼo talu ai.” ’ ”+

17 Neʼe fakaha e Natane kia Tavite te ʼu folafola fuli ʼaia pea mo te ʼu meʼa fuli ʼae neʼe ha age kia ia.+

18 Neʼe haʼu leva te Hau ko Tavite ʼo nofo ia muʼa ʼo Sehova ʼo ina ui: “Tuʼi ʼAliki ko Sehova, ko ai koa ia au? Pea ko ai koa toku famili,* ke au tuha ai mo te ʼu meʼa ʼae neʼe ke fai maʼaku?+ 19 Pea ʼe mole gata ai, Tuʼi ʼAliki ko Sehova, he ʼe ke toe palalau foki ʼo ʼuhiga mo te ka haʼu ʼo toku famili.* Pea ʼe ko he fakatotonu* ʼaia ki te hahaʼi fuli, Tuʼi ʼAliki ko Sehova. 20 Kotea la he tahi age palalau ʼe feala ke au fai atu? Ko au ʼaeni ko tau tagata faifekau ko Tavite, kae kua ke iloʼi lelei pe ia au,+ Tuʼi ʼAliki ko Sehova. 21 Neʼe ke fai te ʼu meʼa lalahi ʼaia pea neʼe ke fakaha mai, he neʼe ko tau folafola ʼaia, ko te meʼa ʼaia neʼe ke loto ki ai.*+ 22 Koia, Tuʼi ʼAliki ko Sehova, ʼe ke maʼoluga moʼoni.+ ʼE mole he tahi ʼe hage ko koe,+ ʼe mole he tahi age ʼAtua.+ ʼE fakamoʼoni ki ai te ʼu meʼa fuli ʼae neʼe matou logo ki ai. 23 ʼE ʼi ai koa he tahi age puleʼaga ʼi te kele ʼe hage ko tau hahaʼi ko Iselaele?+ Neʼe alu te ʼAtua ʼo totogi mai natou ke natou liliu ko tana hahaʼi,+ pea neʼe iloa tona huafa+ ʼuhi ko te ʼu meʼa lalahi mo fakamanavahe ʼae neʼe ina fai maʼa natou.+ Neʼe ke kapu te ʼu puleʼaga mo ʼonatou ʼatua ʼuhi ko tau hahaʼi, ʼae neʼe ke totogi maʼa koe mai Esipito. 24 Neʼe ke fakaliliu ia Iselaele ko tau hahaʼi ʼo heʼe gata.+ Sehova e, neʼe ke liliu ko tonatou ʼAtua.+

25 “Pea ʼi te lakaga nei, Sehova ʼAtua, taupau ʼo talu ai te fakapapau ʼae neʼe ke fai ʼo ʼuhiga mo au mo toku famili.* Fakalelei siʼou loto, fakahoko tau fakapapau.+ 26 Ke fakakololiaʼi tou huafa ʼo talu ai,+ ke ui ai e te hahaʼi: ‘Ko Sehova ʼo te ʼatu kautau ʼe ko te ʼAtua ʼo Iselaele.’ ʼOfa pe ke tuʼu malohi toku famili* ʼi ʼou muʼa.+ 27 Koteʼuhi ko koe, Sehova ʼo te ʼatu kautau, te ʼAtua ʼo Iselaele, neʼe ke fakaha mai: ‘ ʼE au fakaliliu anai tou famili ko he hologa hau.’+ Koia neʼe au lotomalohi ai ke au fai atu te faikole ʼaeni. 28 Tuʼi ʼAliki ko Sehova, ko koe te ʼAtua moʼoni, ʼe moʼoni ʼau folafola,+ neʼe ke fakapapau te ʼu meʼa lelei ʼaia kia au ʼaeni ko tau tagata faifekau. 29 Koia, ʼofa pe ke ke lotolelei ʼo tapuakiʼi toku famili* pea ke tuʼu ʼi ʼou muʼa ʼo talu ai.+ Koteʼuhi ko koe, Tuʼi ʼAliki ko Sehova ʼae neʼe ke fai te fakapapau ʼaia, pea ʼofa pe ke ke tapuakiʼi toku famili* ʼo talu ai.”+