Pesalemo
71 Sehova e, ʼe au nono ia te koe.
Ke mole au ufiufi ʼi he temi.+
2 Haofaki au mo tokoni mai ʼuhi ko tau faitotonu.
Falele ʼo fagono mai pea mo haofaki au.+
3 Ke ke liliu ko hoku ʼutu mo hoku kolo tau,
ʼE feala ke au alu tuʼumaʼu ki ai.
Fakatotonu ke haofaki au,
He ko koe toku ʼutu mo toku kolo tau.+
4 Siʼoku ʼAtua, haofaki au mai te nima ʼo ia ʼae ʼe agakovi,+
Mai te nima ʼo te tagata heʼe faitotonu ʼae ʼe ina gaohi koviʼi au.
5 Tuʼi ʼAliki ko Sehova, ko koe toku falalaʼaga.
ʼE au falala kia te koe talu mai toku temi tupulaga.+
6 Ko koe toku falanakiʼaga talu mai taku tupu.
Pea ko koe ʼae neʼe ke toʼo au mai te fatu ʼo taku faʼe.+
ʼE au vikiʼi tuʼumaʼu ia koe.
7 Kua au hage ko he milakulo ki te tokolahi,
Kae ko koe toku puipuiʼaga malohi.
8 ʼE au fakavikiviki tuʼumaʼu kia te koe.+
ʼI te ʼaho katoa ʼe au palalau ʼo ʼuhiga mo tou taulekaleka.
9 ʼAua naʼa ke liʼaki au ʼi toku temi matuʼa.+
ʼAua naʼa ke siʼaki au ʼi te temi ʼae ʼe hifo ai toku vaivai.+
10 ʼE palalau kovi ʼoku fili ʼo ʼuhiga mo au,
ʼE fonofono ia natou ʼae ʼe natou fia matehi au.+
11 ʼE natou ui: “Kua liʼaki ia ia e te ʼAtua.
Kotou tuli pea mo puke ia ia, he ʼe mole he tahi moʼona haofaki.”+
12 ʼAtua e, ʼaua naʼa ke nofo mamaʼo ia au.
Siʼoku ʼAtua, haʼu fakavilivili ʼo haofaki au.+
13 Ke ufiufi mo mamate+
Ia natou ʼae ʼe fakafeagai mai kia au.
Ke ufiufi mo fakalainoaʼi+
Ia natou ʼae ʼe natou fia gaohi koviʼi au.
14 Kae ko au, ʼe au haga talitali anai.
ʼE toe lahi age anai taku fakavikiviki kia te koe.
15 ʼE au fakamatala anai tau faitotonu,+
Mo tau haofaki ʼi te ʼaho katoa,
Logope la ʼe mole malau ʼau gaue.+
16 Tuʼi ʼAliki ko Sehova,
ʼE au fakamatala anai ʼau gaue fakamanavahe.
Ko tau faitotonu pe ʼae ka au fakaha.
17 ʼAtua e, neʼe ke akoʼi au talu mai toku temi tupulaga,+
Pea ʼe au fakaha ʼau gaue fakaofoofo ʼo kaku mai ki te temi nei.+
18 ʼAtua e, ʼaua naʼa ke liʼaki au ʼi toku temi matuʼa mo ʼulu hina.+
Fakagafua mai ke au fakamatala tou mafimafi ki te taʼiake ʼae ka hoa mai,
Pea mo tou malohi kia natou fuli ʼae ka tutupu mai.+
19 ʼAtua e, ʼe kaku tau faitotonu ki te ʼu potu maʼoluga.+
Neʼe ke fai ni meʼa lalahi.
ʼAtua e, ko ai ʼae ʼe hage ko koe?+
20 Neʼe ke tuku ke hoko kia au ni mamahi mo ni malaʼia,+
Kae ke ke toe foaki mai toku malohi.
Toe fakahake ake au mai te ʼu potu loloto ʼo te kele.+
21 Toe foaki mai toku kololia,
Tokaga mai mo fakapelepeleʼi au.
22 Siʼoku ʼAtua, ʼuhi ko tau agatonu,+
ʼE au fakavikiviki anai kia te koe ʼaki he meʼa faimaholo kauʼi uka.
ʼAtua Maʼoniʼoni ʼo Iselaele,
ʼE au fia hiva fakavikiviki* kia te koe ʼo ta te alepa.