ʼUluaki Koloniko
12 Koʼeni te ʼu tagata ʼae neʼe olo kia Tavite ʼi Tesikelake,+ ʼi te temi ʼae neʼe mole feala ai ke fealuʼaki faʼifaʼitaliha ʼuhi ko Saulo,+ te foha ʼo Kisi. Neʼe kau te ʼu tagata ʼaia ʼi te ʼu tagata tau malolohi ʼae neʼe lagolago kia ia ʼi te tau.+ 2 Neʼe ʼi ai ʼanatou nahau. Pea neʼe feala ke natou li ni maka ʼaki ʼanatou makamaka+ mo fanahi ni kauʼi nahau ʼaki ʼanatou nahau. Neʼe feala ke natou fai te faʼahi ʼaia ʼaki tonatou nima mataʼu mo tonatou nima hema.+ Neʼe ko te ʼu tehina ʼo Saulo mai te telepi ʼo Pesamino.+ 3 Ko tonatou pule neʼe ko Ahiesele, fakatahi mo Soasi. Neʼe ko te ʼu foha ʼaia ʼo Semaa, te tagata Kipease.+ Neʼe toe ʼi ai foki mo Sesiele pea mo Pelete, te ʼu foha ʼo Asimaveti,+ mo Pelaka, mo Seu, te tagata Anatote, 4 mo Sisemaesa te tagata Kipeone+ ʼae neʼe ko te tagata tau malohi neʼe kau ʼi te toko tolugofulu+ pea neʼe pule ki te toko tolugofulu. Neʼe toe kau ai foki mo Selemia, mo Sakasiele, mo Seonane, mo Sosapate te tagata Ketela, 5 mo Elusai, mo Selimote, mo Pealia, mo Semalia, mo Sefatia te tagata Alife, 6 mo Elekana, mo Sisekia, mo Asaleele, mo Soesele, mo Sakopeame te ʼu tagata Kole,+ 7 pea mo Soela mo Sepatesa te ʼu foha ʼo Seloame ʼae mai Ketoli.
8 Neʼe olo ʼihi tagata Kate ʼo lagolago kia Tavite ʼi tana nofo ʼi tona nonoʼaga ʼi te toafa.+ Neʼe ko ni tagata tau malolohi, mo he kau solia neʼe akoako ki te tau pea mo popoto ʼi te fakaʼaogaʼi ʼo te ʼu meʼa tali tau lalahi mo te ʼu tao. Neʼe hage ʼonatou fofoga ko ni laione pea neʼe natou lele vave ohage ko ni tia ʼi te ʼu moʼuga. 9 Neʼe ko Esele te pule, mo Apetiasi te lua, mo Eliape te tolu, 10 mo Misemana te fa, mo Selemia te nima, 11 mo Atai te ono, mo Eliele te fitu, 12 mo Seonane te valu, mo Elesapate te hiva, 13 mo Selemia te hogofulu, pea mo Makepanai te hogofulu-ma-tahi. 14 Neʼe ko te ʼu tagata Kate ʼaia,+ neʼe ko te ʼu pule ʼo te foʼi kautau. Ko ia ʼae neʼe vaivai ʼosi, neʼe feala ke ina tauʼi te toko 100 pea ko ia ʼae neʼe malohi ʼosi, neʼe feala ke ina tauʼi te toko 1 000.+ 15 Neʼe ko te ʼu tagata ʼaia neʼe fakalaka ʼi te Solotane ʼi te ʼuluaki mahina, ʼi te temi ʼae ʼe hake ai te vai tafe. Neʼe natou kapu ia natou fuli ʼae neʼe maʼuʼuli ʼi te ʼu potu fenua laulelei, ki te potu esite pea mo te potu uesite.
16 Neʼe toe olo mo ʼihi tagata ʼi te ʼu telepi ʼo Pesamino pea mo Suta kia Tavite ʼi tana nofo ʼi tona nonoʼaga.+ 17 Pea neʼe haʼu ia Tavite ʼo ui kia natou: “Kapau ʼe kotou ʼomai ʼi te tokalelei ʼo tokoni mai, ʼe tou tau fakatahi anai. Kae kapau ʼe kotou ʼomai ke kotou tuku au ki ʼoku fili kae neʼe mole au fai he meʼa ʼe kovi, ʼe vakaʼi anai e te ʼAtua ʼo ʼatatou kui te faʼahi ʼaia pea ʼe ina fakamauʼi anai.”+ 18 Pea neʼe hifo te laumalie kia Amasai,+ te pule ʼo te toko tolugofulu, pea neʼe ina ui:
“Siʼi Tavite, ko matou ko ʼau tagata, pea ʼe matou kau mo koe, foha ʼo Sese.+
Tokalelei, tokalelei kia koe pea mo tokalelei kia ia ʼae ʼe tokoni atu,
Koteʼuhi ʼe tokoni atu tou ʼAtua.”+
Neʼe fakatalitali ai natou e Tavite pea neʼe ina fakanofo natou ke kau ki te ʼu pule ʼo te ʼu kutuga solia.
19 Neʼe toe mavae foki mo ʼihi tagata ʼo te telepi ʼo Manase ʼi te foʼi kautau ʼa Saulo, ʼo olo mo Tavite ʼi tana alu ʼae mo te kau Filisitini ʼo tauʼi ia Saulo. Kae neʼe mole tokoni ki te kau Filisitini, koteʼuhi ʼi te ʼosi talaga ʼa te kau ʼaliki ʼo te kau Filisitini,+ neʼe natou toe fakaliliu ia ia, he neʼe natou ui: “ ʼE mavae anai ia tatou ʼo alu kia Saulo tona ʼaliki pea ʼe tuʼutamakiʼia anai ʼotatou maʼuli.”+ 20 Koʼeni te ʼu tagata ʼo te telepi ʼo Manase ʼae neʼe olo kia ia ʼi tana alu ki Tesikelake:+ Ko Atana, mo Sosapate, mo Setiaele, mo Mikaele, mo Sosapate, mo Eliu, pea mo Tesiletai, neʼe ko he ʼu pule ʼo he toko afe ʼo te telepi ʼo Manase.+ 21 Neʼe natou tokoni kia Tavite ki te tauʼi ʼo te kutuga solia agamalohi, he neʼe ko ni tagata malolohi mo lototoʼa fuli,+ pea neʼe natou liliu ko ni pule ʼi te foʼi kautau. 22 ʼI te ʼaho fuli pe, neʼe olo te hahaʼi kia Tavite+ ʼo tokoni kia ia, ʼo liliu ai ko he kautau solia kaugamalie, ohage ko te foʼi kautau ʼa te ʼAtua.+
23 Koʼeni te kaugamalie ʼo te kau pule ʼo te ʼu tagata ʼae neʼe ʼi ai ʼanatou mahafu ki te tau pea neʼe olo kia Tavite ʼi Hepelone,+ ʼo foaki age kia ia te pule fakahau ʼa Saulo, ʼo mulimuli ki te fakatotonu ʼa Sehova.+ 24 Neʼe ko tagata ʼe toko 6 800 mai te telepi ʼo Suta, neʼe natou toʼo ʼanatou meʼa tali tau pea mo te ʼu tao. Neʼe ʼi ai ʼanatou mahafu ki te tau. 25 ʼI te telepi ʼo Simeone, neʼe ko te toko 7 100 tagata malolohi mo lototoʼa ʼi te foʼi kautau.
26 ʼI te kau Levite, neʼe ko te toko 4 600. 27 Neʼe ko Seosata+ te pule ʼo te ʼu foha ʼo Alone,+ pea neʼe fakatahi mo ia te toko 3 700, 28 ʼo feia mo Satoke,+ te tagata tupulaga malohi mo lototoʼa, pea mo te ʼu pule ʼe toko 22 ʼo tona famili.
29 ʼI te kau Pesamino, te ʼu tehina ʼo Saulo,+ neʼe ko te toko 3 000, kae ʼi muʼa atu, tokolahi ia natou neʼe agatonu kia Saulo pea mo tona famili. 30 ʼI te kau Efalaimi, neʼe ko tagata ʼe toko 20 800, neʼe malolohi mo lototoʼa pea neʼe natou iloa ʼi ʼonatou famili.
31 Neʼe ko te toko 18 000 neʼe filifili ʼi te vaelua ʼo te telepi ʼo Manase, ke olo ʼo fakanofo hau ia Tavite. 32 ʼI te telepi ʼo Isakale, neʼe ko te ʼu pule ʼe toko 200 neʼe natou iloʼi te meʼa ʼae neʼe tonu ke fai e Iselaele pea mo te temi ʼae ʼe tonu ke natou fai ai. Neʼe natou puleʼi ʼonatou tehina fuli. 33 ʼI te telepi ʼo Sepulone, neʼe ko tagata ʼe toko 50 000 neʼe teuteu ki te tau pea mo natou maʼu he ʼu faʼahiga mahafu tau kehekehe. Neʼe natou fakatahi fuli kia Tavite mo he loto ʼe tahi. 34 ʼI te telepi ʼo Nefetali, neʼe ko te ʼu pule ʼe toko 1 000, pea neʼe fakatahi mo natou te ʼu tagata ʼe toko 37 000 mo ʼanatou meʼa tali tau lalahi pea mo te ʼu tao. 35 ʼI te telepi ʼo Tane, neʼe ko te toko 28 600 tagata neʼe teuteu ki te tau. 36 ʼI te telepi ʼo Asele, neʼe ko te toko 40 000 tagata neʼe teuteu ki te tau.
37 ʼI te kau Lupeni, mo te kau Kate pea mo te ʼu tagata ʼo te vaelua ʼo te telepi ʼo Manase ʼae neʼe fakalaka ʼi te Solotane,+ neʼe ʼi ai te kau solia ʼe toko 120 000 mo ʼanatou faʼahiga mahafu tau kehekehe. 38 Ko natou fuli ʼaia neʼe ko ni tagata solia, neʼe teuteu ki te tau. Neʼe natou olo ki Hepelone he neʼe natou loto moʼoni ke fakanofo hau ia Tavite ki Iselaele katoa. Pea neʼe toe lototahi foki mo te toe ʼo Iselaele ke fakanofo hau ia Tavite.+ 39 Pea neʼe natou nonofo ʼi ai mo Tavite lolotoga ʼaho ʼe tolu, ʼo natou kai mo inu ia te ʼu meʼa ʼae neʼe teuteuʼi e ʼonatou tehina maʼa natou. 40 Pea ko natou ʼae neʼe nonofo ovi age kia natou, ʼo toe feia pe mo natou ʼae neʼe nonofo mamaʼo ʼi te ʼu fenua ʼo Isakale, mo Sepulone pea mo Nefetali, neʼe natou ʼaumai he meʼa kai ʼi te ʼu asino, mo te ʼu kamelo, mo te ʼu asino lalahi, pea mo te ʼu pipi. Neʼe lahi te falena, mo te ʼu foʼi keke fiku mo vite, mo te vino, mo te lolo, pea mo te faga pipi mo te faga ovi ʼae neʼe natou ʼaumai, koteʼuhi neʼe fakafiafia ia Iselaele.