Sosue

1 Hili te mate ʼa Moisese, te tagata faifekau ʼa Sehova, neʼe ui e Sehova kia Sosue,*+ te foha ʼo Nune, te tagata tokoni gaue+ ʼa Moisese: 2 “Kua mate taku tagata faifekau ko Moisese.+ Koia ʼi te lakaga nei, ke ke fakalaka ʼi te Solotane mo te hahaʼi fuli ʼaeni, pea ke ke hu ki te fenua ʼae ʼe au foaki kia natou ʼaeni, ko te hahaʼi ʼo Iselaele.+ 3 ʼE au foaki atu anai te ʼu koga meʼa fuli ʼae ʼe tuʼu ai ʼokotou vaʼe, ohage pe ko taku fakapapau kia Moisese.+ 4 ʼE kamata anai tokotou fenua ʼi te toafa ʼo kaku ki Lipane, pea mo te vai tafe lahi, ia te Efalate, ʼei ia te fenua katoa ʼo te kau Heti,+ pea ʼe kaku anai ki te Tai Lahi* ʼae ʼi te potu uesite.*+ 5 ʼI te temi ʼae ʼe kei ke maʼuli ai, ʼe ke malo pe anai ia ia ʼae ʼe ina tauʼi ia koe.+ ʼE au nofo anai mo koe, ohage pe ko taku nofo ʼae mo Moisese.+ ʼE mole au tuku anai ia koe pea ʼe mole au liʼaki anai ia koe.+ 6 Ke ke lotomalohi mo lototoʼa+ he ʼe ko koe ʼae ka ke tokoni ki te hahaʼi ʼaeni ke natou maʼu te fenua, ʼae neʼe au fakapapauʼi ki ʼanatou kui.+

7 “ ʼEi, ke ke lotomalohi mo lototoʼa, pea ke ke mulimuli fakalelei ki te Lao katoa ʼae neʼe foaki atu e Moisese, taku tagata faifekau, ke feala ai hau maʼu te poto ʼi te ʼu meʼa fuli ʼae ka ke fai.+ ʼAua naʼa ke alu ki te faʼahi mataʼu peʼe ki te faʼahi hema.+ 8 ʼE tonu anai ke ke palalau tuʼumaʼu ki te ʼu meʼa ʼae ʼe tuʼu ʼi te tohi ʼaia ʼo te Lao,+ pea ʼe tonu anai ke ke lau leʼo veliveli* ʼi te ʼaho mo te po, ke feala ai hau mulimuli fakalelei ki te ʼu meʼa fuli ʼae ʼe tuʼu ʼi ai.+ Kapau ʼe ke fai te faʼahi ʼaia, ʼe fua lelei anai ki tou maʼuli pea ʼe ke maʼu anai te poto ʼi te ʼu meʼa fuli ʼae ka ke fai.+ 9 Neʼe mole au fakatotonu atu koa la: ‘Ke ke lotomalohi mo lototoʼa’? Koia, ʼaua naʼa ke mataku, he ʼe nofo anai ia Sehova tou ʼAtua mo koe ʼi te ʼu faʼahi fuli ʼae ka ke alu ki ai.”+

10 Neʼe fakatotonu leva e Sosue ki te ʼu pule ʼo te hahaʼi: 11 “Kotou fakalaka ʼi te nofoʼaga pea kotou fakaha te fakatotonu ʼaeni ki te hahaʼi: ‘Kotou teuteuʼi ni meʼa kai, koteʼuhi ʼe kei toe ʼaho ʼe tolu, pea ʼe kotou fakalaka anai ʼi te Solotane ke kotou maʼu te fenua ʼae ʼe foaki atu e Sehova tokotou ʼAtua.’ ”+

12 Pea neʼe ui e Sosue ki te kau Lupeni, mo te kau Kate pea mo te vaelua ʼo te telepi ʼo Manase: 13 “Kotou manatuʼi te fakatotonu ʼaeni neʼe fai atu e Moisese, te tagata faifekau ʼa Sehova:+ ‘Kua foaki atu e Sehova tokotou ʼAtua, te fenua ʼaeni ke feala hakotou maʼuʼuli fimalie ʼi ai. 14 Koia ʼe nonofo anai ʼokotou ʼohoana, mo ʼakotou fanau, pea mo takotou faga manu ʼi te fenua ʼae neʼe foaki atu e Moisese, ʼi te faʼahi ʼaeni* ʼo te Solotane.+ Kae ko koutou fuli, ʼu tagata tau malolohi,+ ʼe tonu ke kotou teuteu ki te tau moka kotou fakalaka ʼi te Solotane. Pea ʼe kotou olo anai ʼi muʼa ʼo ʼokotou tehina.+ Pea ʼe tonu anai ke kotou tokoni ki ʼokotou tehina 15 ʼo aʼu ki te foaki age e Sehova kia natou te tokalelei, ohage ko tana kua foaki atu kia koutou. ʼEi, ʼe kotou tokoni anai kia natou ʼo aʼu ki tanatou maʼu te fenua ʼae ʼe foaki age e Sehova tokotou ʼAtua kia natou. Pea ʼe kotou toe liliu anai ki te fenua ʼae kua kotou maʼu, ʼei, te fenua ʼae neʼe foaki atu e Moisese, te tagata faifekau ʼa Sehova ʼae ʼi te potu esite ʼo te Solotane, ke kotou nonofo ai.’ ”+

16 Neʼe natou tali kia Sosue: “ ʼE matou fai anai te ʼu meʼa fuli ʼae neʼe ke fakatotonu mai, pea ʼe matou olo anai ki te ʼu faʼahi fuli ʼae ka ke fekauʼi matou ki ai.+ 17 ʼE matou fakalogo anai kia koe ohage pe ko tamatou fakalogo ki te ʼu meʼa fuli ʼae neʼe ui mai e Moisese. ʼOfa pe ke nofo ia Sehova tou ʼAtua mo koe ohage pe ko tana nofo mo Moisese.+ 18 ʼE matehi anai te tagata ʼae ʼe talagataʼa ki tau fakatotonu pea ʼe mole fakalogo ki ʼau fakatotonu fuli.+ ʼEi, ke ke lotomalohi mo lototoʼa.”+