Tuʼi Fakamau

19 ʼI te temi ʼaia, neʼe mole he hau ʼi Iselaele.+ Neʼe ʼi ai he tagata Levi neʼe nofo ʼi he koga meʼa neʼe tuʼu mamaʼo, ʼi te potu moʼugaʼia ʼo Efalaimi.+ Neʼe ʼohoana leva mo he fafine* mai Petelehemi+ ʼi Suta. 2 Kae neʼe mole agatonu te fafine kia ia. Neʼe alu leva te fafine pea neʼe toe liliu ki tana tamai ʼi Petelehemi ʼi Suta. Pea neʼe nofo ai ia mahina ʼe fa. 3 Neʼe alu leva tona ʼohoana ki ai ʼo kole ke nā toe liliu kio naua. Neʼe alu mo tana tagata faifekau pea mo te ʼu asino ʼe lua. Neʼe fakahu ia ia e te fafine ki te ʼapi ʼo tana tamai. ʼI te sio ʼa tana tamai ki te tagata, neʼe ina tali fakafiafia ia ia. 4 Pea neʼe fakalotoʼi ia ia e te tamai ʼa te fafine ke nofo ʼi tona ʼapi ia ʼaho ʼe tolu. Neʼe nā kakai mo iinu pea neʼe moe leva te tagata ʼi ai.

5 ʼI te fa ʼaho, neʼe natou ʼala uhuuhu ke natou mavae. Kae neʼe ui age e te tamai ʼa te fafine ki te tagata: “ ʼAi muʼa he meʼa ki tou fatu ke ke malohi ai, pea hoki kotou olo leva.” 6 Neʼe nā heheka ai ʼo kakai pea mo iinu. Pea neʼe ui e te tamai ʼa te fafine ki te tagata: “Fakalelei siʼou loto, ke ke toe nofo ʼi heni ʼi te po ʼaeni, pea ke ke fakafiafia.” 7 Neʼe tuʼu ake leva te tagata ke alu, kae neʼe faiga malohi te tamai ʼa te fafine ke nofo. Neʼe toe nofo ai leva te tagata ʼi te po ʼaia.

8 ʼI te nima ʼaho, neʼe ʼala uhuuhu te tagata Levi ke mavae. Kae neʼe ui age e te tamai ʼa te fafine ki ai: “Fakalelei siʼou loto, ke ke ʼai muʼa he meʼa ki tou fatu ke ke malohi ai.” Neʼe nā nonofo aipe ʼo kaku ki te afiafi pea neʼe hoko atu pe tanā kakai. 9 Neʼe tuʼu ake leva te tagata ke alu mo tona ʼohoana pea mo tana tagata faifekau. Kae neʼe ui age e te tamai ʼa te fafine ki ai: “Sio, kua afiafi pea kua vave poʼuli. Koia fakalelei siʼokotou loto, kae kotou toe nonofo pe la ʼi te po ʼaeni. Ke ke toe moe ʼi heni pea mo ke fakafiafia. ʼE hoki kotou ʼala uhuuhu anai apogipogi ʼo olo pea ke toe liliu leva kio koe.”* 10 Kae neʼe mole loto e te tagata ke toe nofo ai ʼi te po ʼaia. Koia neʼe alu ai pea neʼe kaku leva ki Sepusi, ʼae ʼe toe higoa ko Selusalemi.+ Neʼe alu mo tona ʼohoana, mo tana tagata faifekau pea mo ʼana asino ʼe lua, ʼae neʼe hili ki ai ni kavega.

11 ʼI tanatou fakaovi ki Sepusi, neʼe kua kamata poʼuli. Neʼe ui leva e te tagata faifekau ki tona pule: “ ʼE mole lelei age koa la hatatou tutuʼu ʼi te kolo ʼaeni ʼo te kau Sepusi, ke tou nonofo ai ʼi te poʼuli?” 12 Kae neʼe tali e tona pule ki ai: “ ʼE mole tonu ke tou tutuʼu ʼi he kolo ʼo ni hahaʼi matapule, ʼae ʼe mole nonofo ai he kau Iselaele. Tou hoko atu ʼo kaku ki Kipease.”+ 13 Neʼe ina toe ui ki tana tagata faifekau: “Tou faiga ke tou kaku ki Kipease peʼe ko Lama.+ Pea ʼe tou nonofo anai ʼi te po ʼaeni ʼi he kolo ʼo te ʼu kolo ʼaia ʼe lua.” 14 Neʼe hoko atu leva tonatou fagona. Neʼe natou fakaovi ki Kipease, ʼi te fenua ʼo Pesamino kae kamata to te laʼa.

15 Neʼe natou tau leva ki Kipease ke natou nonofo ai ʼi te poʼuli. Pea neʼe olo ai ʼo heheka ʼi te malaʼe lahi ʼo te kolo ʼaia. Kae neʼe mole he tahi neʼe ina fia fakaʼapi ia natou ʼi te po ʼaia.+ 16 Ki muli age, neʼe liliu mai he matuʼa ʼi te afiafi ʼaia mai tana gaueʼaga. Neʼe ko he tagata mai te potu moʼugaʼia ʼo Efalaimi+ kae neʼe kua nofo ia ʼi Kipease. Ko te hahaʼi ʼo te kolo ʼaia neʼe ko he kau Pesamino.+ 17 Neʼe sio leva te matuʼa ʼaia ki te nofo ʼa te tagata ʼi te malaʼe lahi ʼo te kolo. Pea neʼe ina fehuʼi age ki ai: “ ʼE ke haʼu maifea? Pea ʼe ke alu kifea?” 18 Neʼe tali age e te tagata: “Neʼe matou ʼi Petelehemi ʼi Suta. Pea ʼe matou olo ki he koga meʼa ʼe tuʼu mamaʼo ʼi te potu moʼugaʼia ʼo Efalaimi, ʼae ʼe au nofo ai. Neʼe au alu ki Petelehemi ʼi Suta.+ Ko taku toe liliu ʼaeni mai ai pea ʼe au alu ki te fale ʼo Sehova.* Kae ʼe heʼeki he tahi kua ina fia fakaʼapi ia matou. 19 ʼE feʼauga pe te meʼa kai ʼo ʼamatou asino.+ Pea ʼe au maʼu he pane+ mo he vino maʼaku, mo toku ʼohoana pea mo tamā tagata faifekau. ʼE mole toe ʼaoga mai he meʼa kia matou.” 20 Neʼe ui age leva e te matuʼa ki ai: “Ke nofo mo koe te tokalelei! ʼE au foaki atu anai te meʼa pe ʼae ʼe ʼaoga kia koe. Kae ʼe mole tonu ke ke moe ʼi te malaʼe lahi ʼaeni.” 21 Neʼe ina fakahu leva ia ia ki tona ʼapi pea neʼe ina fafaga te ʼu asino. Hili ʼaia, neʼe natou fufulu ʼonatou vaʼe pea neʼe natou kakai leva mo iinu.

22 ʼI tanatou fakafiafia ʼaia, neʼe ʼomai he ʼu tagata agakovi ʼo te kolo ʼo ʼa takai te ʼapi. Pea neʼe natou tuki malohi te matapa. Neʼe natou ui ki te matuʼa ʼae ʼoʼona te ʼapi: “ ʼAumai ki tuʼa te tagata ʼae neʼe hu ki tou ʼapi ke matou momoe mo ia.”+ 23 Pea neʼe haʼu ki tuʼa te matuʼa ʼae ʼoʼona te ʼapi, ʼo ui age kia natou: “Siʼoku ʼu tehina, fakalelei ʼokotou loto, kae ʼaua naʼa kotou fai te meʼa ʼaia ʼe kovi. Neʼe au fakaafe te tagata ʼaeni. ʼAua naʼa kotou fai te aga fakaufiufi ʼaia. 24 ʼE ʼi heni toku ʼofafine ʼae ʼe kei nofo taupoʼou pea mo te ʼohoana ʼo te tagata ʼaeni. ʼE au ʼaumai anai naua ki tuʼa. Pea ʼe kotou fakalainoaʼi anai naua mo kapau ʼe kotou loto moʼoni ki ai.*+ Kae ʼaua naʼa kotou fai te aga fakaufiufi ʼaia ki te tagata ʼaeni.”

25 Kae neʼe mole fia fakalogo te ʼu tagata ʼaia. Neʼe puke leva e te tagata Levi tona ʼohoana+ ʼo ʼave kia natou. Pea neʼe natou fakaʼalikiʼi mo gaohi koviʼi ia ia ʼi te po katoa ʼo kaku ki te uhu. Pea neʼe natou tuku leva ia ia ke alu ʼi te mafoata. 26 Neʼe kaku leva te fafine ki te huʼaga ʼo te ʼapi ʼae neʼe nofo ai tona pule, kae kei hegihegi. Pea neʼe toka ifo ʼo takoto ai ʼo kaku ki te ʼaho. 27 ʼI te uhu ʼaia, neʼe ʼala ake leva tona pule ʼo avahi te ʼu matapa ʼo te ʼapi. Pea neʼe hu ki tuʼa ke hoko atu tona fagona. Neʼe sio ai leva ki te takoto ʼo tona ʼohoana ʼi te huʼaga ʼo te ʼapi kae tuku ʼona nima ʼi te muʼa matapa. 28 Pea neʼe ui e te tagata ki ai: “Tuʼu ki ʼoluga kae tou olo.” Kae neʼe mole tali age e tona ʼohoana. Pea neʼe hili leva e te tagata te sino ʼo tona ʼohoana ki te asino pea neʼe alu ai kio ia.

29 ʼI tana tau atu ki tona ʼapi, neʼe ina toʼo he hele ʼo taʼataʼaga tona ʼohoana, ko koga ʼe 12. Pea neʼe ina tufa leva te ʼu koga ʼaia ki te ʼu telepi takitahi ʼo Iselaele. 30 Neʼe ui e natou fuli ʼae neʼe sisio ki te meʼa ʼaia: “Neʼe heʼeki hoko he meʼa feia talu mai te temi ʼae neʼe mavae ai te kau Iselaele mai Esipito. Pea ko tatatou hoki sisio ʼae ki he meʼa feia. Koia kotou fakakaukauʼi ia te meʼa ʼaeni neʼe hoko, pea kotou fefakahaʼaki ʼakotou manatu.+ Pea kotou ui mai leva te meʼa ʼe tonu ke matou fai.”