Sosue

14 Koʼeni te ʼu koga meʼa ʼae neʼe foaki ki te kau Iselaele ko honatou tofiʼa ʼi te fenua ʼo Kanaane. Neʼe foaki e te pelepitelo ko Eleasale, mo Sosue, te foha ʼo Nune pea mo te ʼu pule famili ʼo te ʼu telepi ʼo Iselaele tonatou tofiʼa ʼaia.+ 2 Neʼe fai ni toho ke vaevae ai tonatou tofiʼa+ ʼi te ʼu telepi ʼe hiva vaelua, ohage pe ko tona fakatotonu e Sehova ʼaki ia Moisese.+ 3 Neʼe kua foaki e Moisese ki te tahi ʼu telepi ʼe lua vaelua tonatou tofiʼa ʼi te tahi faʼahi* ʼo te Solotane,+ pea neʼe mole ina foaki he tofiʼa ʼo te kau Levite ʼi te ʼu telepi ʼae.+ 4 Neʼe liliu te hologa ʼo Sosefo ko telepi ʼe lua:+ ia Manase mo Efalaimi.+ Neʼe mole foaki ki te kau Levite honatou kele ʼi te fenua, gata pe ki te ʼu kolo+ ʼae neʼe foaki age ke natou nonofo ai, mo te ʼu koga meʼa lunaʼia ʼae ʼi te ʼu tafaʼaki ʼo te ʼu kolo ʼaia ke tuku ai tanatou faga manu pea mo ʼonatou koloa.+ 5 Koia, neʼe vaevae e te kau Iselaele ia te fenua, ohage pe ko tona fakatotonu age e Sehova kia Moisese.

6 Neʼe olo leva te ʼu tagata ʼo Suta kia Sosue ʼi Kilekale.+ Pea neʼe ui age e Kalepo,+ te foha ʼo Sefune, te tagata Kenase kia Sosue: “ ʼE ke iloʼi lelei te meʼa ʼae neʼe ui e Sehova+ kia Moisese, te tagata ʼa te ʼAtua moʼoni,+ ʼo ʼuhiga mo koe pea mo au ʼi Katesi-palenea.+ 7 Neʼe au taʼu 40 ʼi te temi ʼae neʼe fekauʼi ai au mai Katesi-palenea e Moisese, te tagata faifekau ʼa Sehova, ke au alu ʼo vakaʼi fakafufu ia te fenua.+ Pea ʼi taku toe liliu mai, neʼe au fakaha age ia te moʼoni ʼo ʼuhiga mo te ʼu meʼa fuli ʼae neʼe au sio ki ai.+ 8 Neʼe fakalotovaivaiʼi e ʼoku tehina ʼae neʼe matou olo fakatahi ia te hahaʼi, kae ko au, neʼe au fakalogo kia Sehova, toku ʼAtua ʼaki toku loto katoa.+ 9 ʼI te ʼaho ʼaia, neʼe fakapapauʼi mai e Moisese: ‘ ʼE ke maʼu anai ʼo feia mo ʼou foha te kele ʼae neʼe ke haʼele ai, ko tou tofiʼa ʼo talu ai, he neʼe ke fakalogo kia Sehova toku ʼAtua, ʼaki tou loto katoa.’+ 10 Kua hili taʼu ʼe 45 ki te fakapapau ʼaia+ neʼe fai e Sehova kia Moisese, kae lolotoga haʼele ia Iselaele ʼi te toafa,+ pea neʼe tuku e Sehova ke au maʼuli,+ ohage pe ko tana fakapapau mai. ʼE ko toku taʼu 85 ʼaeni, pea ʼe kei au maʼuli pe. 11 ʼE kei au malohi pe ʼi te temi nei ohage pe ko te ʼaho ʼae neʼe fekauʼi ai au e Moisese. ʼE kei hage pe toku malohi ʼi te temi nei ko te temi ʼaia, tatau pe taku alu ʼo tau mo taku fai he tahi age ʼu gaue. 12 Koia, ke ke foaki mai te potu moʼugaʼia ʼae neʼe fakapapauʼi mai e Sehova ʼi te ʼaho ʼaia. Neʼe ke mahino ʼi te ʼaho ʼaia, ʼe nonofo ai te kau Anake,+ ʼae ʼe natou maʼu he ʼu kolo tau ʼe lalahi ʼaupito.+ Kae ʼe nofo anai* ia Sehova mo au,+ pea ʼe au kapu anai natou mai ai, ohage pe ko tona fakapapau e Sehova.”+

13 Neʼe tapuakiʼi e Sosue ia Kalepo, te foha ʼo Sefune pea neʼe ina foaki age ia te kolo ko Hepelone ko hona tofiʼa.+ 14 Koia, ʼe kei maʼu pe e Kalepo, te foha ʼo Sefune, te tagata Kenase ia te kolo ko Hepelone ko hona tofiʼa ia ʼaho nei, he neʼe fakalogo kia Sehova, te ʼAtua ʼo Iselaele ʼaki tona loto katoa.+ 15 ʼI muʼa atu, neʼe higoa ia te kolo ko Hepelone ko Kiliate-alepa+ (ko Alepa neʼe ko te tagata maʼuhiga ʼi te kau Anake). Neʼe maʼuli leva te fenua ʼi te tokalelei, pea neʼe mole toe hoko ai he tau.+