ʼUluaki Kolonito

14 Kotou haga kumi te ʼofa pea mo faiga malohi ke kotou maʼu* ia te ʼu fealagia fakalaumalie, kae tafito te fealagia ʼae ke kotou faifakakikite.+ 2 Koteʼuhi ko ʼae ʼe palalau ʼi he tahi lea, ʼe mole palalau ia ki te tagata kae ki te ʼAtua, he ʼe mole mahino he tahi,+ kae ʼe palalau ia ki te ʼu meʼa fakalilo tapu*+ ʼaki te tokoni ʼa te laumalie. 3 Kae ko ʼae ʼe faifakakikite, ʼe ina fakalotomalohiʼi, mo tokoni pea mo fakafimalieʼi te tagata ʼaki ʼana palalau. 4 Ko ʼae ʼe palalau ʼi he tahi lea, ʼe ina fakalotomalohiʼi ia ia totonu, kae ko ʼae ʼe faifakakikite ʼe ina fakalotomalohiʼi te kokelekasio katoa. 5 ʼE au fakaʼamu ke kotou palalau fuli ʼi te tahi ʼu lea,+ kae ʼe au leleiʼia age ke kotou faifakakikite.+ ʼE moʼoni, ko ʼae ʼe faifakakikite ʼe lahi age ia ʼi ʼae ʼe palalau ʼi te tahi ʼu lea, gata pe mo kapau ʼe fakahoko lea,* ke feala ai ke fakalotomalohiʼi te kokelekasio. 6 Kae ʼu tehina, kapau ʼe au alu atu kia koutou ʼi te temi nei ʼo palalau atu ʼi he tahi ʼu lea, ʼe au tokoni feafeaʼi atu anai kia koutou? Kapau ʼe au fia tokoni atu, ʼe tonu ke au palalau ʼo ʼuhiga mo he meʼa neʼe fakaha mai e te ʼAtua,+ peʼe ko he ʼatamai malama,+ peʼe ko he lea fakapolofeta peʼe ko he akonaki.

7 Pea ʼe hage ko he ʼu meʼa maholo, ohage la ko te fagufagu peʼe ko te alepa. Kapau ʼe mole pupuhi peʼe ta fakalelei ia te ʼu nota, ʼe iloʼi feafeaʼi anai te musika ʼae ʼe gaoʼi ʼaki te fagufagu peʼe ko te alepa? 8 Koteʼuhi kapau ʼe mole tagi lelei te fakatagi pupuhi, ko ai koa ʼae ka teuteu ki te tau? 9 ʼO toe feia aipe, kapau ʼe kotou fakaʼaogaʼi he ʼu kupu ʼe faigataʼa te mahino ki ai, ʼe feafeaʼi anai ki he tahi hana iloʼi te ʼu meʼa ʼae ʼe kotou ui? ʼE vaʼiganoa ʼakotou palalau. 10 ʼE lahi te ʼu lea ʼe palalauʼi ʼi te malamanei, pea ʼe feala ke mahino ki ai te hahaʼi. 11 Koteʼuhi kapau ʼe mole au mahino ki te ʼuhiga ʼo he palalau, ʼe au hage anai ko he matapule ki ʼae ʼe palalau mai, pea ko ʼae ʼe palalau mai ʼe hage anai ia ko he matapule kia au. 12 ʼO feia foki mo koutou, ʼe kotou loto moʼoni ke kotou maʼu te ʼu fealagia ʼae ʼe foaki mai ʼaki te laumalie maʼoniʼoni, koia kotou kumi ke kotou maʼu ʼo lahi age te ʼu fealagia ʼaia, moʼo fakalotomalohiʼi ia te kokelekasio.+

13 Koia ko ʼae ʼe palalau ʼi he tahi lea, ke faikole ke feala hana fakahoko lea.*+ 14 Koteʼuhi kapau ʼe au faikole ʼi he tahi lea, ʼe au faikole ʼaki te fealagia ʼae neʼe foaki mai ʼaki te laumalie, kae ʼe mole au mahino ki tona fakaʼuhiga. 15 Koia kotea ʼae ʼe tonu ke fai? ʼE au faikole anai ʼaki te fealagia ʼae neʼe foaki mai ʼaki te laumalie pea ʼe au toe faikole anai ke au mahino ki ʼaku palalau.* ʼE au hiva anai he ʼu fakavikiviki ʼaki te fealagia ʼae neʼe foaki mai ʼaki te laumalie pea ʼe au toe hiva anai he ʼu fakavikiviki ʼaki ni kupu ʼe au mahino ki ai.* 16 Koteʼuhi kapau ʼe ke fai he fakafetaʼi ʼaki te fealagia ʼae neʼe foaki atu ʼaki te laumalie, ʼe lava feafeaʼi ki he tagata neʼe mole ako ke ina ui “Ameni” ki tau fakafetaʼi, mo kapau ʼe mole mahino ia ki ʼau palalau? 17 ʼE moʼoni, ʼe ke fai ni fakafetaʼi ʼe lelei, kae ʼe mole ina fakalotomalohiʼi ia te tagata ʼaia. 18 ʼE au fakafetaʼi ki te ʼAtua ʼi taku palalau ʼi te ʼu lea kehekehe ʼo lahi age ia koutou fuli. 19 Kae ʼi te loto kokelekasio, ʼe au leleiʼia age haku ui he ʼu kupu ʼe nima ʼe au mahino ki ai, ke feala foki haku akoʼi* ʼihi, ʼi haku ui he ʼu kupu ʼe hogofulu afe ʼi he lea ʼe mole mahino ki ai te hahaʼi.+

20 ʼU tehina, ʼaua naʼa kotou fakakaukau ohage ko te kihiʼi tamaliki,+ kae ke kotou hage ko te kihiʼi tamaliki ʼo ʼuhiga mo te aga ʼae ʼe kovi,+ pea ke kotou fakakaukau ohage ko he ʼu hahaʼi kua fotufotuʼa.+ 21 ʼE tohi ʼi te Lao: “ ‘ ʼAki ni lea kehekehe pea mo te ʼu kupu ʼa te kau matapule ʼe au palalau anai ki te hahaʼi ʼaeni, kae ʼe mole natou fia fakalogo mai anai kia te au,’ ko te ui ʼaia ʼa Sehova.”*+ 22 Koia ko te fealagia ʼae ke palalau ʼi he tahi ʼu lea ʼe mole ko he fakailoga ki te hahaʼi ʼae ʼe tui kae ki te hahaʼi ʼae ʼe mole tui,+ kae ko te ʼu lea fakapolofeta ʼe mole ko he fakailoga ki te hahaʼi ʼae ʼe mole tui kae ki te hahaʼi ʼae ʼe tui. 23 Kapau ʼe fakatahitahi te kokelekasio katoa pea mo natou palalau fuli ʼi ni lea kehekehe, kae ʼomai ni hahaʼi neʼe mole ako peʼe mole tui, ʼe mole natou ui anai koa ʼe kotou vavale? 24 Kae kapau ʼe kotou faifakakikite fuli pea ʼe haʼu he tahi ʼe mole tui peʼe mole ako, ʼe kotou fakatonutonuʼi fuli anai mo vakavakaʼi lelei ia ia. 25 ʼE ha lelei anai te ʼu meʼa fakafufu ʼo tona loto, ʼo tuʼutuli ifo ai mo atolasio ki te ʼAtua, ʼo ina ui: “ ʼE nofo moʼoni te ʼAtua ia koutou.”+

26 Koia ʼu tehina, kotea ʼae ʼe tonu ke fai? Ka kotou fakatahitahi, ʼe hiva e he tahi he pesalemo, ʼe faiakonaki he tahi age, ʼe fakamatala e he tahi age he meʼa neʼe fakaha age e te ʼAtua, ʼe palalau he tahi age ʼi he tahi lea pea ʼe fakahoko lea he tahi age.+ Kotou fai ia meʼa fuli moʼo fakalotomalohiʼi te kokelekasio. 27 Pea kapau ʼe palalau ʼihi ʼi he tahi lea, ke palalau pe he toko lua peʼe ko he toko tolu, pea ke natou fefakahoahoaʼaki, pea ʼe tonu ke fakahoko lea* he tahi.+ 28 Kae kapau ʼe mole he tahi ke fakahoko lea,* ʼe tonu ke natou nonofo fakalogologo ʼi te kokelekasio pea ke natou palalau kia natou totonu pea mo te ʼAtua. 29 Ke palalau he ʼu polofeta ʼe toko lua peʼe toko tolu,+ pea ke mahino ia natou ʼae ʼe fakalogo ki tona fakaʼuhiga. 30 Kae kapau ʼe fakaha age e te ʼAtua he meʼa ki he tahi ʼe nofo ai, ke fakalogologo ia ia ʼae ʼe lolotoga palalau. 31 Koteʼuhi ʼe feala ke kotou faifakakikite fuli ʼo kotou fefakahoahoaʼaki, ke akoʼi pea mo fakalotomalohiʼi ai te hahaʼi fuli.+ 32 Pea ʼe tonu ki te kau polofeta ke natou maʼu te lotololomi ʼi tanatou fakaʼaogaʼi ia te fealagia ʼaia neʼe foaki age ʼaki te laumalie. 33 Koteʼuhi ko te ʼAtua ʼe mole ko he ʼAtua ʼo te maveuveu kae ʼo te tokalelei.+

Pea ohage ko tona fai ʼi te ʼu kokelekasio fuli ʼo te kau maʼoniʼoni, 34 ke fakalogologo te hahaʼi fafine ʼi te ʼu kokelekasio, koteʼuhi ʼe mole fakagafua age ke natou palalau.+ Kae ke natou fakalogo ki te tagata,+ ohage ko tona toe fakaha foki ʼi te Lao. 35 Kapau ʼe natou fia iloʼi he meʼa, ke natou fakalavelave ki ʼonatou ʼohoana ʼi ʼonatou ʼapi, koteʼuhi ʼe ko he meʼa fakaufiufi ki he fafine hana palalau ʼi te kokelekasio.

36 Neʼe haʼu koa te folafola ʼa te ʼAtua mai ia koutou, pe neʼe kaku atu pe koa ia kia koutou?

37 Kapau ʼe manatu ia he tahi ko ia ʼe ko he polofeta pe neʼe foaki age hona fealagia ʼaki te laumalie, pea ʼe tonu ke ina fakamoʼoni ko te ʼu meʼa ʼae ʼe au tohi atu ʼe ko te ʼu fakatotonu ʼa te ʼAliki. 38 Kae kapau ʼe meʼa noaʼi e he tahi te faʼahi ʼaia, ʼe meʼa noaʼi anai ia ia.* 39 Koia ʼoku tehina, kotou faiga malohi ke kotou faifakakikite+ kae ʼaua naʼa kotou tapuʼi te palalau ʼi te ʼu lea kehekehe.+ 40 Kae ke fai ia meʼa fuli ʼi te fakaʼapaʼapa pea mo te fakatokatoka.+