Te ʼu Gaue ʼa Te Kau Apositolo

22 “ ʼU tagata, ʼu tehina, ʼu tamai, ʼi te temi leva ʼaeni, kotou fagono mai ki taku fakamahino atu te ʼu meʼa ʼae neʼe hoko.”+ 2 ʼI tanatou logo ʼae neʼe palalau ia Paulo kia natou ʼi te Fakahepeleo, neʼe ʼaʼasili ai tanatou fakalologo. Pea neʼe ina ui: 3 “Ko au ko te tagata Sutea,+ neʼe tupu ʼi Talesi ʼi Silisia,+ kae neʼe akoʼi totonu au e Kamaliele+ ʼi te kolo ʼaeni, ke au mulimuli fakalelei ki te Lao ʼo ʼatatou kui,+ pea neʼe au faʼafai ʼi te gaue ʼa te ʼAtua ohage ko koutou fuli ia ʼaho nei.+ 4 Neʼe au fakatagaʼi te hahaʼi ʼo te Ala ʼaeni ʼo kaku ki te mate, ʼo au haʼi mo pilisoniʼi te hahaʼi tagata mo fafine.+ 5 ʼE feala ke fakamoʼoni ki ai te pelepitelo lahi pea mo te fono katoa ʼo te kau takitaki. Neʼe au toe maʼu foki mai ia natou te ʼu tohi ke au ʼave ki ʼotatou tehina Sutea ʼae ʼi Tamaso, pea neʼe au alu ai ke au ʼaumai haʼihaʼi ki Selusalemi ia natou ʼae neʼe ʼi ai, ke tauteaʼi natou.

6 “Kae ʼi taku fagona mo fakaovi ki Tamaso, neʼe ko te vaʼevaʼe fetapa ʼaia, pea fokifa pe neʼe ha mai kia au he malama mai te lagi,+ 7 pea neʼe au to ki te kele mo logo ki he leʼo ʼe ina ui mai: ‘Saulo, Saulo, he koʼe ʼe ke fakatagaʼi au?’ 8 Neʼe au fehuʼi age: ‘Ko ai ia koe ʼAliki?’ Neʼe ina tali mai: ‘Ko au ia Sesu, te tagata Nasaleti, ʼae ʼe ke fakatagaʼi.’ 9 Kae ko te ʼu tagata ʼae neʼe kaugā fagona mo au, neʼe natou sisio ki te malama kae neʼe mole natou logo ki te leʼo ʼo ia ʼae neʼe palalau mai. 10 Pea neʼe au fehuʼi: ‘Kotea ʼae ʼe tonu ke au fai, ʼAliki?’ Neʼe ui mai e te ʼAliki: ‘Tuʼu ake ʼo hu ki Tamaso, pea ʼe fakaha atu anai ʼi ai te ʼu meʼa fuli kua fakatuʼutuʼu ke ke fai.’+ 11 Kae neʼe mole au lava sio ki he meʼa he neʼe au pulagia ʼi te malama ʼaia. Koia neʼe taki au ki Tamaso e te ʼu tagata ʼae neʼe kaugā fagona mo au.

12 “Pea neʼe ʼi ai te tagata neʼe higoa ko Ananiasi. Neʼe ko te tagata tauhi lotu ʼo mulimuli ki te Lao pea neʼe palalau lelei te kau Sutea fuli ʼae neʼe maʼuʼuli ai ʼo ʼuhiga mo ia. 13 Neʼe haʼu leva kia au. Neʼe tuʼu ʼi ʼoku tafa ʼo ina ui mai: ‘Saulo, toku tehina, ke ke toe sio!’ ʼI te lakaga pe ʼaia, neʼe au hiki ake ʼoku mata ʼo au sio ai kia ia.+ 14 Neʼe ina ui mai: ‘Kua filifili koe e te ʼAtua ʼo ʼatatou kui ke ke iloʼi tona finegalo, mo sio ki te tagata faitotonu+ pea mo logo ki tona leʼo, 15 koteʼuhi ʼe tonu ke ke liliu ko tana tagata fakamoʼoni, ke ke tala ki te tagata fuli pe te ʼu meʼa ʼae neʼe ke sio mo logo ki ai.+ 16 Pea ʼi te temi leva ʼaeni, kotea ʼae ʼe ke fakatuatuai ai? Tuʼu ake, ʼo papitema mo fetapa ki te huafa ʼo Sesu, pea ʼe fakamolemole anai e te ʼAtua ʼau agahala.’+

17 “Kae ʼi taku toe liliu ki Selusalemi+ pea mo au lolotoga faikole ʼi te fale lotu, neʼe au sio ki te meʼa neʼe ha mai. 18 Pea neʼe au sio ai ki te ʼAliki neʼe ina ui mai: ‘Fakavilivili ʼo mavae vave ʼi Selusalemi, koteʼuhi ʼe mole natou tali anai te fakamoʼoni ʼae ʼe ke fai ʼo ʼuhiga mo au.’+ 19 Pea neʼe au ui: ‘ ʼAliki, ʼe natou iloʼi lelei neʼe au pilisoniʼi mo ta ʼi te ʼu sinakoka ia natou ʼae neʼe tui kia te koe.+ 20 Pea ʼi te temi ʼae neʼe natou liligi ai te toto ʼo Setefano tau fakamoʼoni, neʼe au tuʼu ai ʼo siosioʼi te ʼu kofu tuʼa ʼo natou ʼae neʼe natou matehi ia ia, pea neʼe au ʼio ki ai.’+ 21 Kae neʼe ina ui mai: ‘Alu, koteʼuhi ʼe au fekauʼi anai koe ki mamaʼo, ki te hahaʼi ʼae ʼe mole Sutea.’ ”+

22 Neʼe natou fagono ki ai ʼo kaku ki tana fai te ʼu palalau ʼaia. Neʼe natou kalaga leva: “Ke molehi te taʼi tagata ʼaia ʼi te kele, koteʼuhi ʼe mole tuha ke maʼuli!” 23 ʼUhi ko tanatou kalaga, mo laku ʼonatou kofu tuʼa pea mo te efu ki ʼoluga,+ 24 neʼe fakatotonu ai e te kamutoa ke ʼave ia Paulo ki te fale solia, pea ke huipiʼi lolotoga tona fakafehuʼi, ke feala hana iloʼi lelei te tupuʼaga ʼo tanatou kalaga feia ʼo ʼuhiga mo ia. 25 Kae ʼi te temi ʼae neʼe natou haʼi ai ia ia ke huipiʼi, neʼe ui age e Paulo ki te pule solia ʼae neʼe tuʼu ʼi ai: “ ʼE fakagafua koa e te lao ke kotou huipiʼi he tagata Loma* kae neʼe heʼeki fakamauʼi?”+ 26 ʼI te logo ʼa te pule solia ki ai, neʼe alu ki te kamutoa ʼo ina ui age: “Ko te tagata ʼaeni ʼe ko he tagata Loma. Kotea anai ka ke fai?” 27 Koia neʼe fakaovi te kamutoa kia Paulo ʼo ina fehuʼi age: “Fakaha mai, ko koe koa ko he tagata Loma?” Neʼe ina tali age: “ ʼEi.” 28 Pea neʼe ui e te kamutoa: “Neʼe au foaki he toe paʼaga lahi ke au totogi te ʼu fealagia ʼae ʼe maʼu e he tagata Loma.” Neʼe ui e Paulo: “Kae ko au, ʼe au Loma talu mai taku tupu.”+

29 Koia neʼe fakamamaʼo atu aipe te ʼu tagata ʼae neʼe tonu ke natou fakafehuʼi mo huipiʼi ia ia. ʼI te iloʼi e te kamutoa ko Paulo neʼe ko he tagata Loma, neʼe mataku leva he neʼe ina fakatotonu ke haʼi ia ia ʼaki ni seini.+

30 ʼI te ʼaho ake, ʼi tana fia iloʼi papau pe koʼe neʼe tukugakoviʼi ia Paulo e te kau Sutea, neʼe ina fakaʼateainaʼi mo fakatotonu ke fakatahitahi te kau pelepitelo pule pea mo te Sanetualio* katoa. Neʼe ina fakahifo leva ia Paulo ʼo fakatuʼu ʼi ʼonatou muʼa.+