Esekiele
19 “ ʼE tonu ke ke hiva he hiva mate ʼo ʼuhiga mo te ʼu pule ʼo Iselaele, 2 mo ke ui:
‘Neʼe ko ai tau faʼe? Ko he laione fafine ʼi te ʼu laione tagata.
Neʼe takoto ʼi te lotolotoiga ʼo te ʼu laione tagata kei mui mo malolohi, pea neʼe ina taupau ʼona ʼuhi.
3 Neʼe ina taupau he tahi ʼi ʼona ʼuhi pea neʼe liliu ko he laione mui mo malohi.+
Neʼe poto leva ʼi te kumi ʼo tana meʼa kai,
Pea neʼe ina toe kai foki mo ni hahaʼi.
4 Neʼe logo ni puleʼaga ki tona palalauʼi pea neʼe natou keli he luo ʼo to ki ai.
Neʼe ʼave leva ia ia ki Esipito ʼaki ni mātaʼu.+
5 Neʼe talitali tana faʼe, pea neʼe mahino leva neʼe mole he ʼuhiga ʼo tana fakaʼamu ʼae ke toe liliu mai.
Neʼe ina toʼo ai he tahi ʼi ʼona ʼuhi, pea neʼe ina fakaliliu ko he laione mui mo malohi.
6 Neʼe toe fealuʼaki mo ia ʼi te ʼu laione, pea neʼe liliu ko he laione mui mo malohi.
Neʼe poto leva ʼi te kumi ʼo tana meʼa kai pea neʼe ina toe kai foki mo ni hahaʼi.+
7 Neʼe taka ʼi ʼonatou tule malohi mo maumauʼi ʼonatou kolo,
ʼO logo ai tana gugulu ʼi te fenua tuʼu lavaki ʼaia.+
8 Neʼe ʼomai te ʼu puleʼaga ʼo te ʼu tafaʼaki ʼo li tanatou kupega kia ia,
Pea neʼe maʼua ai ʼi tanatou luo.
9 Neʼe natou ʼave ia ia ʼi te kesi ʼaki ni mātaʼu ki te hau ʼo Papiloni.
Neʼe fakamaʼu ai ia ia ke ʼaua naʼa toe logoʼi tana gugulu ʼi te ʼu moʼuga ʼo Iselaele.
10 Neʼe hage tau faʼe ko he fuʼu vite+ ʼi tou toto,* neʼe to ʼi he vaʼe vai.
Neʼe lahi ʼona fua mo ʼona vaʼa ʼuhi ko te lahi ʼo te vai.
11 Neʼe malolohi ʼona vaʼa pea neʼe feala ke toe fai ʼaki ni tokotoko ʼo ni pule.
Neʼe tuputupu ʼo maʼoluga age ʼi ʼihi fuʼu ʼakau.
Neʼe ha lelei leva ʼuhi ko tona maʼoluga pea mo tana failau.
12 Kae neʼe taʼaki fakaitaita+ ʼo li ki te kele.
Neʼe moamoa ʼona fua ʼi te matagi ʼo te potu esite.
Neʼe fasifasi mo moamoa ʼona vaʼa malohi+ pea neʼe vela ai.+
13 Kua to leva ʼi te toafa,
ʼI he fenua magemage.+
14 Neʼe kamata te vela ʼi ʼona vaʼa, ʼo vela ai ʼona vaʼa liliki pea mo ʼona fua.
Neʼe mole hao he vaʼa malohi mo he tokotoko moʼo takitaki.+
“ ‘Ko te hiva mate ʼaia, pea ʼe fakaʼaogaʼi anai.’ ”