ʼUluaki Kolonito

11 Kotou faʼifaʼitakiʼi au, ohage ko taku faʼifaʼitakiʼi ia Kilisito.*+

2 ʼE au vikiʼi koutou ʼuhi ko takotou manatuʼi au ia meʼa fuli pe pea mo takotou taupau maʼu te ʼu talatisio ʼo mulimuli pe ki taku fakaha atu. 3 Kae ʼe au loto ke kotou iloʼi ko te pule ʼo te tagata fuli ʼe ko Kilisito,+ pea ko te pule ʼo te fafine ʼe ko te tagata,+ pea ko te pule ʼo Kilisito ʼe ko te ʼAtua.+ 4 Ko te tagata ʼae ʼe faikole peʼe faifakakikite kae ʼe ina pulouʼi tona ʼulu, ʼe fakaufiufi ia ki tona pule. 5 Ko te fafine ʼae ʼe faikole peʼe faifakakikite+ kae ʼe mole ina pulouʼi tona ʼulu, ʼe fakaufiufi ia ki tona pule, he ʼe hage pe ko he fafine neʼe tele tona ʼulu.* 6 Koteʼuhi kapau ʼe mole pulouʼi e he fafine tona ʼulu, pea ʼe tonu ke kosi tona lauʼulu. Kae kapau ʼe fakaufiufi ki he fafine te kosi peʼe ko te tele ʼo tona ʼulu, pea ʼe tonu ke ina pulouʼi tona ʼulu.

7 ʼE mole tonu ke pulouʼi e te tagata tona ʼulu he ʼe ko te pāki ia pea mo te kololia ʼo te ʼAtua.+ Kae ko te fafine ʼe ko te kololia ʼo te tagata. 8 Koteʼuhi neʼe mole haʼu te tagata mai te fafine, kae neʼe haʼu te fafine mai te tagata.+ 9 Pea tahi ʼae meʼa, neʼe mole fakatupu te tagata maʼa te fafine, kae ko te fafine maʼa te tagata.+ 10 Koia la ʼae, ʼe tonu ai ke ʼai e te fafine ki tona ʼulu he fakailoga ʼo tana fakalogo, ʼuhi ko te kau ʼaselo.+

11 Kae ʼi te ʼu tisipulo ʼa te ʼAliki, ʼe ʼaoga te fafine ki te tagata pea ʼe ʼaoga te tagata ki te fafine. 12 Koteʼuhi ohage pe ko te haʼu ʼa te fafine mai te tagata,+ ʼe toe feia pe foki, ʼe tupu ake te tagata mai te fafine, kae ʼe ko te ʼAtua ʼae neʼe ina fakatupu ia meʼa fuli.+ 13 Kotou vakaʼi e koutou totonu: ʼE tuha koa mo he fafine ke faikole ki te ʼAtua kae ʼe mole ina pulouʼi tona ʼulu? 14 ʼE mole akoʼi atu koa la e te faʼahiga fakatupu ʼo te tagata ʼe ko he meʼa fakaufiufi moka lauʼulu? 15 Kae kapau ʼe lauʼulu ia he fafine, ʼe mole koa la ko he kololia kia ia? Koteʼuhi neʼe foaki age kia ia tona lauʼulu ohage ko he pulou. 16 Kae kapau ʼe fia mulimuli he tahi ki he talatisio ʼe kehe age, ʼe mole matou maʼu he tahi age talatisio, ʼo feia mo te ʼu kokelekasio ʼa te ʼAtua.

17 ʼI taku fakaha atu te ʼu faʼahi ʼaia, ʼe mole au vikiʼi koutou, koteʼuhi moka kotou fakatahitahi ʼe mole fua lelei kia koutou, kae ʼe fua kovi. 18 Koteʼuhi ʼe au logo ʼe hoko ia koutou he ʼu maveuveu moka kotou fakatahitahi ki te fono. Pea ʼe au tui ʼe ʼi ai hona koga ʼe moʼoni. 19 Koteʼuhi ʼe ʼi ai moʼoni anai he ʼu magaʼi lotu ia koutou,+ ke toe feala foki ke iloʼi lelei ia natou ʼae ʼe tali e te ʼAtua.

20 Koia moka kotou fakatahitahi fuli moʼo kai ki te Taumafa ʼa Te ʼAliki,*+ ʼe mole kotou fai ʼaki he aga fakaʼapaʼapa. 21 Koteʼuhi moka hoko mai tona temi, kua kotou ʼosi kakai koutou, pea ʼe fia kai te tahi kae ʼe kona te tahi. 22 ʼE mole koa la ʼi ai hokotou ʼu ʼapi ke kotou kakai mo iinu ai? Peʼe kotou meʼa noaʼi koa koutou ia te kokelekasio ʼa te ʼAtua pea mo fakatupu ufiufi kia natou ʼae ʼe masisiva? Kotea ʼae ʼe feala ke au ui atu? ʼE tonu koa ke au vikiʼi koutou? Kailoa, ʼe mole au vikiʼi koutou ʼi te faʼahi ʼaia.

23 Koteʼuhi neʼe au toe fakaha atu foki kia koutou te meʼa ʼaeni neʼe au maʼu mai te ʼAliki: ʼI te po ʼae neʼe lavakiʼi ai te ʼAliki ko Sesu,+ neʼe ina toʼo te pane, 24 pea ʼi tana ʼosi fai he fakafetaʼi, neʼe ina tofitofi mo ina ui: “ ʼE fakata e te pane ʼaeni toku sino,+ ʼae ʼe foaki maʼa koutou. Kotou haga fai te faʼahi ʼaeni moʼoku fakamanatu.”+ 25 Neʼe ina toe fai feia pe ʼaki te ipu+ ʼi te ʼosi ʼo te kai,* ʼo ina ui: “ ʼE fakata e te ipu ʼaeni te fuakava foʼou+ ʼae ʼe fakatafito ki toku taʼataʼa.+ Kotou haga fai te faʼahi ʼaeni moʼoku fakamanatu, ʼi te temi fuli ʼae ʼe kotou inu ki ai.”+ 26 Koteʼuhi ʼi te temi fuli pe ʼae ʼe kotou kai ai te pane ʼaia pea mo inu ki te ipu ʼaia, ʼe kotou haga tala te mate ʼo te ʼAliki, ʼo kaku ki tana haʼu.

27 Koia ko ʼae ʼe ina kai te pane peʼe inu ki te ipu ʼo te ʼAliki kae ʼe mole tuha mo ia, ʼe agahala ia ki te sino mo te taʼataʼa ʼo te ʼAliki. 28 Ke vakavakaʼi muʼa e he tagata ia ia totonu ke ina iloʼi pe ʼe tuha mo ia,+ pea hoki feala leva ke ina kai te pane pea mo inu ki te ipu. 29 Koteʼuhi ko ʼae ʼe kai pea mo inu kae ʼe mole mahino ki te ʼuhiga ʼo te sino, ʼe ina tauteaʼi ia ia totonu. 30 Koia la ʼae ʼe tokolahi ia koutou ʼe vaivai pea mo mahahaki, pea ʼe kaugamalie natou ʼe mamate.*+ 31 Kae kapau ʼe tou mahino ki totatou ʼuhiga moʼoni, pea ʼe mole fakamauʼi anai tatou. 32 Kae ka fakamauʼi tatou, pea ʼe fakatonutonuʼi tatou e Sehova,*+ ke ʼaua naʼa tauteaʼi tatou fakatahi mo te malamanei.+ 33 Koia ʼoku tehina, ka kotou fakatahitahi ki te kai ʼo te taumafa ʼaia, kotou atalitali ke kotou katoa. 34 Ka fia kai he tahi, ke kai ʼi tona ʼapi, ke mole tauteaʼi koutou moka kotou fakatahitahi.+ Pea ʼo ʼuhiga leva mo te ʼu faʼahi ʼae ʼe kei toe, ʼe hoki au fakatokatoka anai ʼi taku tau atu.