Pesalemo
ʼE ko te hiva mate ʼa Tavite, ʼae neʼe ina hiva kia Sehova ʼo ʼuhiga mo te ʼu palalau ʼa Kusi te tagata Pesamino.
7 Sehova e, siʼoku ʼAtua, ʼe au nono ia te koe.+
Haofaki au mai ia natou fuli ʼae ʼe natou fakatagaʼi au pea mo ke fakahao au.+
2 Kapau ʼe mole ʼi ai he tahi ke ina haofaki au,
ʼE natou hae mo ʼave anai au ohage ko tona fai e he laione.+
3 Sehova e, siʼoku ʼAtua, kapau neʼe au fai he hala,
Mo fai he aga ʼe heʼe faitotonu,
4 Kapau neʼe au fai he meʼa ʼe kovi kia ia ʼae neʼe ina fai mai he meʼa ʼe lelei,+
Pe neʼe au kaihaʼa toku fili kae neʼe mole ʼi ai hona tupuʼaga,*
5 Ke tuli au e hoku fili pea ke ina maʼu au,
Ke ina liʼaki au ki te kele pea mo malamalaki au,
Pea ke ina pulihi toku kololia ʼi te efu. (Sela)
6 Sehova e, tuʼu ake ʼuhi ko tou hauhau,
ʼO fakafeagai ki ʼoku fili ʼae ʼe iita kia au,+
Ke ke ʼala ake ʼuhi ko au pea mo fakatotonu ke fakahoko te faitotonu.+
7 Ke ʼa takai koe e te ʼu puleʼaga,
Pea ʼe ke fakafeagai anai kia natou mai ʼoluga.
8 ʼE fai anai e Sehova he fakamau ki te hahaʼi.+
Sehova e, fakamauʼi au ʼo mulimuli pe ki taku faitotonu
Pea mo taku agatonu.+
9 Fakalelei siʼou loto, ke ke fakagata te ʼu aga ʼa te kau agakovi,
Kae fakatuʼu maʼu te kau faitotonu,+
He ʼe ko koe ko te ʼAtua ʼe faitotonu,+ ʼe ke sivi te ʼu loto+ mo te ʼu manatu loloto.+
10 ʼE ko te ʼAtua toku meʼa tali tau,+ te Haofakiʼaga ʼo natou ʼae ʼe faitotonu ʼonatou loto.+
11 Ko te ʼAtua ʼe ko he Tuʼi Fakamau faitotonu,+
Pea ʼe fakaha e te ʼAtua ʼana fakamau ʼi te ʼaho fuli.
12 Kapau ʼe mole fakahemala he tahi,+ ʼe fakamasila e te ʼAtua tana heleta,+
ʼE ina teuteuʼi tana nahau ʼo fanahi.+
13 ʼE ina teuteuʼi ʼana mahafu fakatupu mate,
Mo fakaulo te meʼa masila ʼo ʼana kauʼi nahau.+
14 Kotou sioʼi ia ia ʼae ʼe agakovi,
ʼE ina fakahoko te malaʼia pea mo fakatupu te kaka.+
15 ʼE ina keli he luo ʼo loloto ʼosi,
Kae ʼe to pe ia ki te luo ʼae neʼe ina keli.+
16 ʼE to pe anai kia ia te malaʼia ʼae neʼe ina fakahoko,+
ʼE ina kai pe anai ia tana agakovi.