Te Tohi ʼa Suta

1 Ko au Suta, te tagata kaugana ʼa Sesu Kilisito,* pea mo tehina ʼo Sakopo,+ ʼe au faitohi kia natou ʼae kua pauʼi+ mo ʼofainaʼi e te ʼAtua te Tamai pea kua taupau maʼa Sesu Kilisito:+

2 Ke tuputupu ia koutou te manavaʼofa, mo te tokalelei pea mo te ʼofa ʼae mai te ʼAtua.

3 Naʼi tehina ʼofaina, neʼe au loto moʼoni ke au faitohi atu ʼo ʼuhiga mo totatou haofaki e te ʼAtua.+ Kae neʼe au tokagaʼi ia te ʼaoga ʼae ke au faitohi atu moʼo fakalotomalohiʼi koutou ke kotou taupau takotou tui+ ʼae neʼe akoʼi tuʼa tahi ʼo talu ai ki te kau maʼoniʼoni. 4 Ko tona tupuʼaga ʼae he ʼe ko ʼihi tagata kua feulufi ʼi te lotolotoiga ʼo koutou pea kua fualoa te fakakikite ʼi te ʼu Tohi Taputapu tonatou tautea. ʼE ko he ʼu tagata ʼe mole fakaʼapaʼapa ki te ʼAtua pea ʼe natou fakaʼaogaʼi te ʼofa makehe ʼo totatou ʼAtua moʼo takuʼaki ʼanatou aga fakalialia,*+ pea ʼe mole natou agatonu ki totatou pule pea mo ʼAliki pe ʼe tahi, ia Sesu Kilisito.+

5 Logo la kua kotou iloʼi te ʼu faʼahi fuli ʼaeni, kae ʼe au fia fakamanatuʼi atu, neʼe haofaki e Sehova* tana hahaʼi mai te fenua ʼo Esipito,+ kae neʼe ina fakaʼauha ki muli age ia natou ʼae neʼe mole kei tui.+ 6 Pea ko te ʼu ʼaselo ʼae neʼe mole natou taupau ʼonatou tuʼulaga ʼi te kamata kae neʼe natou liʼaki tonatou nofoʼaga totonu,+ neʼe ina haʼi natou ʼo talu ai ʼi te fakapoʼuli gaogao ʼo kaku ki tonatou tautea ʼi te ʼaho lahi.+ 7 ʼO toe feia pe, ko Sotoma mo Komola pea mo te ʼu kolo ʼi ʼonā tafaʼaki, neʼe natou fai ni felaveʼi fakasino heʼe ʼaoga* mo fakalialia pea mo fakahoko te ʼu holi kovi ʼo te kakano.+ Koia neʼe tauteaʼi ai natou ʼaki te afi heʼe gata, ʼo natou liliu ai ko he fakatokaga maʼa tatou.+

8 Logo la te faʼahi ʼaia, kae ko te ʼu tagata ʼaia ʼae kua feulufi ʼi te lotolotoiga ʼo koutou, ʼe natou haga fakakaukauʼi he ʼu aga ʼe kovi, mo natou fai ni aga heʼe maʼa, mo natou meʼa noaʼi te takitaki pea mo natou laukoviʼi natou ʼae ʼe fakamaʼuhigaʼi e te ʼAtua.+ 9 Kae ko Mikaele+ te alekaselo,+ ʼi te temi ʼae neʼe fihi ai mo te Tevolo ʼo ʼuhiga mo te sino ʼo Moisese,+ neʼe manatu neʼe mole tuha mo ia ke ina tauteaʼi ia ia pea mo fai ni palalau ʼe kovi,+ kae neʼe ina ui age: “Ke fakatonutonuʼi koe e Sehova.”*+ 10 Kae ko te ʼu tagata ʼaia ʼe natou palalau kovi ʼo ʼuhiga mo te ʼu aluʼaga fuli ʼae ʼe mole natou mahino ki ai.+ Pea ʼe natou hage ko te ʼu manu ʼe mole fakakaukau,+ pea ʼe natou haga ʼulihi ia natou ʼi tanatou mulimuli ki te ʼu agaaga ʼo te ʼu manu ʼi te ʼu meʼa fuli ʼae ʼe natou fai.

11 Malaʼia kia natou, koteʼuhi kua natou muliʼi te ala ʼo Kaino+ pea kua natou hehe ohage ko Palaame,+ ʼo natou ʼoho ki he totogi, pea kua fakaʼauha natou ʼuhi ko tanatou muhumuhu+ ohage ko Kole.+ 12 Ko te ʼu tagata ʼaia ʼe natou kau ʼi ʼakotou kaitahi fakatautehina. Kae ʼe natou hage ko he ʼu foʼi maka* ʼe ʼū ʼi te tai.+ ʼE ko he ʼu tagata tauhi ovi ʼe natou fafaga pe ia natou totonu kae ʼe mole natou tuʼania he meʼa.+ ʼE natou hage ko he ʼu ʼao ʼe feʼaveʼaki e te matagi, kae ʼe mole ʼua.+ Pea ʼe natou hage ko he ʼu fuʼu ʼakau ʼe mole fua ʼi tona temi taʼukai kua ʼosi mamate* pea neʼe taʼaki. 13 ʼE natou hage ko he ʼu peau ʼi he tai ʼe hou, ʼe natou laku ki te matatai he ʼu meʼa heʼe maʼa pea mo fakaufiufi.+ Pea ʼe natou hage ko he ʼu fetuʼu ʼe hehe pea ʼe tuku anai natou ʼi te fakapoʼuli gaogao ʼo talu ai.+

14 ʼEi ko Enoke,+ ʼae ʼe tuʼulaga fitu ʼi te hakoga ʼo Atama, neʼe toe talanoa foki ʼo ʼuhiga mo natou ʼaia ʼi tana fakakikite: “Kua haʼu ia Sehova* mo ʼana lauʼi miliate* kau ʼaselo maʼoniʼoni+ 15 moʼo fakamauʼi te hahaʼi fuli,+ pea mo tauteaʼi te hahaʼi fuli ʼae ʼe mole fakaʼapaʼapa ki te ʼAtua ʼuhi ko ʼanatou gaue ʼae ʼe kovi. ʼE fai feia anai e te ʼAtua koteʼuhi neʼe natou agakovi. Pea ʼe ko he kau agahala ʼe mole fakaʼapaʼapa kia te ia pea neʼe natou laukovi kia te ia.”+

16 Ko te ʼu tagata ʼaia ʼe natou muhumuhu,+ mo meo ʼo ʼuhiga mo te aluʼaga ʼo tonatou maʼuli, pea mo mulimuli ki ʼonatou holi kovi.+ ʼE toe maʼu ʼi ʼonatou gutu ni palalau fiameʼalahi pea ʼe natou fakaoloolo ʼihi* ke natou maʼu mai ai he ʼu lelei.+

17 Kae ʼu tehina ʼofaina, kotou manatuʼi te ʼu folafola ʼae neʼe fai ʼi muʼa atu* e te kau apositolo ʼo totatou ʼAliki ko Sesu Kilisito, 18 ʼae neʼe natou tau ui atu: “ ʼI te ʼu temi fakaʼosi ʼe ʼi ai anai ni kau vava, ʼe natou mulimuli anai ki ʼonatou holi ʼae ʼe kovi.”+ 19 Ko natou ʼaia ʼe natou fakatupu ni mavetevete ʼi te kokelekasio,+ pea ko ni tagata ʼe agaʼi manu, kae ʼe mole natou maʼu he ʼu manatu fakalaumalie. 20 Kae ʼu tehina, kotou fakatuputupu takotou tui ʼae ʼe maʼoniʼoni pea mo kotou tuku te laumalie maʼoniʼoni ke ina takitaki ʼakotou faikole,+ 21 ke kotou haga nonofo ai ʼi te ʼofa ʼo te ʼAtua,+ ʼo fakatalitali ki te manavaʼofa ʼo totatou ʼAliki ko Sesu Kilisito, ʼae ʼe feala ai ke kotou maʼu te maʼuli heʼe gata.+ 22 Pea kotou haga manavaʼofa+ kia natou ʼae ʼe lotolotolua,+ 23 ʼo kotou haofaki natou+ ʼaki takotou tohoʼi natou mai te afi. Kotou haga manavaʼofa ki ʼihi atu ʼu tehina, kae ʼaki he manavasiʼi. Neʼe natou ʼulihi ʼonatou teu ʼaki he ʼu gaue ʼo te kakano. Koia, ka kotou manavaʼofa kia natou, ʼaua naʼa kotou fāfā ki ʼonatou teu ʼae kua ʼulihi.+

24 Ko te ʼAtua, ʼae ʼe feala ke ina taʼofi koutou naʼa kotou tukia pea mo tokoni atu ke kotou maʼa+ ia muʼa ʼo tona kololia ʼo kotou maʼu ai he fiafia lahi, 25 ko totatou ʼAtua pe ʼe tahi, ia totatou Fakamaʼuli, ke ina maʼu te kololia ʼaki ia Sesu Kilisito totatou ʼAliki, mo te ʼalikisia, mo te mafimafi pea mo te pule talu mai te temi muʼa ʼo kaku mai ki te temi nei pea ʼo talu ai. Ameni.