Senesi
12 Pea neʼe ui e Sehova kia Apalamo: “Mavae ʼi tou fenua mo ʼou kaiga, pea mo te loto fale ʼo tau tamai ʼo alu ki te fenua ʼae ka au fakaha atu.+ 2 ʼE au fakaliliu anai koe ko he puleʼaga lahi, pea ʼe au tapuakiʼi anai koe. ʼE au fakaliliu anai tou higoa ke iloa, pea ʼe ke liliu anai ko he tapuakina ki te hahaʼi.+ 3 ʼE au tapuakiʼi anai ia natou ʼae ʼe natou tapuakiʼi koe, pea ʼe au fakamalaʼia anai ia natou ʼae ʼe natou lotokoviʼi koe,+ pea ʼe tapuakina* moʼoni anai te ʼu famili fuli ʼo te kele ʼaki ia koe.”+
4 Koia neʼe mavae ai ia Apalamo ohage pe ko tona ui age e Sehova, pea neʼe alu ia Lote mo ia. Neʼe taʼu 75 ia Apalamo ʼi tana mavae ʼae ʼi Halani.+ 5 Neʼe ʼave e Apalamo ia Salai+ tona ʼohoana, mo Lote te foha ʼo tona tehina+ pea mo te ʼu koloa fuli ʼae neʼe natou tanaki,+ mo te hahaʼi* kaugana ʼae neʼe natou maʼu ʼi Halani, pea neʼe natou olo ai leva ki te fenua ʼo Kanaane.+ Pea ʼi tanatou tau atu ki Kanaane, 6 neʼe fakalaka ia Apalamo ʼi te fenua ʼo alu ki te koga meʼa ʼae ko Sekemi,+ ʼe tuʼu ovi ki te ʼu fuʼu ʼakau lalahi ʼo Mole.+ ʼI te temi ʼaia, neʼe nonofo te kau Kanaane ʼi te fenua. 7 Neʼe ha leva ia Sehova kia Apalamo pea mo ina ui age: “ ʼE au foaki anai te fenua ʼaeni+ ki tou hakoga.”+ Koia neʼe ina laga ai he ʼaletale maʼa Sehova, ʼae neʼe ha age kia ia. 8 Ki muli age, neʼe alu leva ki te potu moʼugaʼia ʼo te potu esite ʼo Petele,+ pea neʼe ina fakatuʼu leva tona fale la ʼi te vaha ʼo Petele mo Ai.+ Neʼe tuʼu ia Petele ʼi te potu uesite pea ko Ai ʼi te potu esite. Neʼe ina laga ai leva he ʼaletale maʼa Sehova+ pea mo kamata fetapa ai ki te huafa ʼo Sehova.+ 9 Hili ʼaia, neʼe hoko atu pe te faifagona ʼa Apalamo pea neʼe alu ki te Nekepe,+ ʼo ina fehikiʼaki tona nofoʼaga mai ʼae potu ki ʼae potu.
10 Neʼe to leva he hoge ʼi te fenua, pea neʼe hifo ai leva ia Apalamo ki Esipito ʼo nofo ai ʼi he kiʼi temi,*+ he neʼe kua kovi ʼosi te hoge.+ 11 ʼI muʼa ʼo tana hu ki Esipito, neʼe ina ui kia Salai tona ʼohoana: “Fakalelei siʼou loto, kae ke ke fagono mai! ʼE au iloʼi ko koe ko he fafine finemui.+ 12 Koia moka sisio anai te kau Esipito kia koe, ʼe mahino ia ʼe natou ui anai: ‘ ʼE ko tona ʼohoana.’ Pea ʼe natou matehi anai au kae ʼe natou tuku anai koe ke ke maʼuli. 13 Fakalelei siʼou loto kae ke ke ui age ko koe ko toku tokolua, ke natou gaohi leleiʼi au ʼuhi ko koe, pea ke haofaki ai toku maʼuli.”+
14 ʼI te temi pe ʼae neʼe hu ai ia Apalamo ki Esipito, neʼe tokagaʼi e te kau Esipito te finemui ʼo te fafine. 15 Pea neʼe toe sisio mo te kau ʼaliki ʼa Falaone kia ia, pea neʼe natou kamata vikiʼi ia ia kia Falaone. Koia neʼe ʼave ai te fafine ki te fale ʼo Falaone. 16 Neʼe gaohi leleiʼi ia Apalamo ʼuhi ko ia, pea neʼe foaki age ki ai ni ovi, mo ni pipi, mo ni asino tagata mo fafine, mo ni tagata faifekau mo ni fafine faifekau, pea mo ni kamelo.+ 17 Neʼe tauteaʼi leva e Sehova ia Falaone pea mo tona loto fale ʼaki he ʼu mahaki kovi* ʼuhi ko Salai, te ʼohoana ʼo Apalamo.+ 18 Koia neʼe pauʼi ai e Falaone ia Apalamo pea mo ina ui age: “He koʼe neʼe ke fai mai kia au te meʼa ʼaeni? He koʼe neʼe mole ke ui mai ʼe ko tou ʼohoana? 19 He koʼe neʼe ke ui mai ʼe ko tou tokolua?+ He neʼe meʼa pe ke au ʼohoanaʼi. Koʼena tou ʼohoana. Toʼo ia ia pea ke alu!” 20 Koia neʼe fakatotonu ai e Falaone ki ʼana tagata ke natou fakamavae ia ia, mo tona ʼohoana pea mo ʼona koloa fuli.+