Senesi
15 Hili ʼaia, neʼe ui e Sehova kia Apalamo ʼi he meʼa neʼe ha age kia ia: “ ʼAua naʼa ke mataku+ Apalamo. ʼE au puipui anai koe.*+ ʼE lahi ʼaupito anai tou fakapale.”+ 2 Neʼe tali age e Apalamo: “Tuʼi ʼAliki ko Sehova, kotea ʼae ka ke foaki mai anai? ʼE heʼeki ʼi ai haku fanau pea ko ia ʼae ka ina maʼu anai toku ʼapi ohage ko he tofiʼa ʼe ko Eliesele,+ ko he tagata mai Tamaso.” 3 Pea neʼe hoko atu e Apalamo: “Neʼe mole ke foaki mai hoku hakoga+ pea ʼe fetogi anai au e taku tagata faifekau, ʼo ina maʼu anai toku tofiʼa.” 4 Kae neʼe tali age e Sehova kia ia: “ ʼE mole fetogi anai koe e te tagata ʼaia, pea ʼe mole ina maʼu anai tou tofiʼa, kae ʼe ko tou foha totonu ʼae ka ina fetogi anai koe pea mo maʼu anai tou tofiʼa.”+
5 Neʼe ʼave leva ia ia e te ʼAtua ki tuʼa pea neʼe ina ui age ki ai: “Fakalelei siʼou loto, kae ke ke sio ki te lagi pea mo ke lau te ʼu fetuʼu, mo kapau foki ʼe feala hau lau.” Pea neʼe ina hoko atu: “ ʼE feia anai te lahi ʼo tou hakoga.”+ 6 Pea neʼe tui kia Sehova,+ koia neʼe faitotonu ai ia muʼa ʼo te ʼAtua.+ 7 Pea neʼe ina toe ui leva: “ ʼE ko au ia Sehova, ʼae neʼe ina fakamavae koe mai Ule, te kolo ʼo te kau Kaletea ke au foaki atu te fenua ʼaeni. ʼE liliu anai ko hou fenua.”+ 8 Neʼe ina ui age: “Tuʼi ʼAliki ko Sehova, ʼe au lava iloʼi feafeaʼi ʼe au maʼu moʼoni anai te fenua ʼaia?” 9 Neʼe ina tali age: “Toʼo he pipi fafine kei mui ʼe taʼu tolu, mo he tao fafine ʼe taʼu tolu, mo he ovi tagata ʼe taʼu tolu, mo he kulukulu pea mo he lupe kei mui.” 10 Koia neʼe ina toʼo ai te ʼu manu fuli ʼaia ʼo taki taʼaga lua, pea neʼe ina tuku leva he koga ʼo te ʼu manu takitahi ʼaia ke fehagaʼaki mo tona tahi koga, kae neʼe mole ina taʼaga te ʼu manulele. 11 Neʼe kamata feleleʼi mai te ʼu manulele lalahi ke natou kai te ʼu sino ʼo te ʼu manu ʼaia, kae neʼe kapu natou e Apalamo.
12 ʼI muʼa ʼo te to ʼo te laʼa, neʼe moe mate ia Apalamo pea neʼe hifo kia ia he toe fakapoʼuli mo fakamataku. 13 Pea neʼe ui e te ʼAtua kia Apalamo: “Ke ke iloʼi papau ʼe liliu anai tou hakoga ko he kau matapule ʼi he fenua ʼe mole ʼa natou, pea ʼe fakapopulaʼi anai mo fakamamahiʼi ia natou lolotoga taʼu ʼe 400 e te hahaʼi ʼae ʼe nonofo ai.+ 14 Kae ʼe au fakamauʼi anai te puleʼaga ʼae ka natou popula ki ai,+ pea hili ʼaia, ʼe natou mavae anai mai ai mo ni tuʼuga koloa.+ 15 Pea ko koe, ʼe ke mate anai* ʼi te fimalie pea ʼe ʼavaifo anai koe ʼi tou temi matuʼa.+ 16 Kae ʼe toe liliu mai anai tou hakoga ki heni+ ʼi te fa taʼiake, koteʼuhi ʼe heʼeki hoko mai te temi ʼae ke tauteaʼi ai te kau Amole.”+
17 ʼI te kua to ʼo te laʼa pea mo fakapoʼuli gaogao, neʼe ha leva he gutuʼumu neʼe alu ake ai he kohu, pea neʼe fakalaka ʼi te vaha ʼo te ʼu kanoʼi manu he taume neʼe ulo. 18 ʼI te ʼaho ʼaia, neʼe fai e Sehova he fuakava mo Apalamo,+ ʼo ina ui: “ ʼE au foaki anai ki tou hakoga ia te fenua ʼaeni,+ mai te vai tafe ʼo Esipito ʼo kaku ki te vai tafe lahi, ʼae ko te Efalate:+ 19 ia te fenua ʼo te kau Kenite,+ mo te kau Kenase, mo te kau Katemoni, 20 mo te kau Heti,+ mo te kau Pelesite,+ mo te kau Lefaimi,+ 21 mo te kau Amole, mo te kau Kanaane, mo te kau Kilikasi pea mo te kau Sepusi.”+