Senesi
16 Neʼe heʼeki maʼu e Salai, te ʼohoana ʼo Apalamo hana fanau,+ kae neʼe ʼi ai tana fafine faifekau Esipito neʼe higoa ko Akale.+ 2 Koia neʼe ui ai e Salai kia Apalamo: “Fakalelei siʼou loto, ke ke fakalogo mai. Neʼe mole fakagafua e Sehova ke au maʼu fanau. Fakalelei mai, ke ke momoe mo taku fafine faifekau. ʼE lagi feala anai ke au maʼu mai ia ia ni fanau.”+ Pea neʼe fakalogo ai ia Apalamo kia Salai. 3 Neʼe kua taʼu hogofulu te maʼuli ʼa Apalamo ʼi te fenua ʼo Kanaane. Neʼe toʼo leva e te ʼohoana ʼo Apalamo ko Salai ia tana fafine faifekau Esipito ko Akale, ʼo ina foaki ke ʼohoana mo Apalamo, tona ʼohoana. 4 Pea neʼe momoe mo Akale, pea neʼe faitama leva. ʼI tana kua iloʼi ʼae kua faitama, neʼe kamata fehiʼa leva ia ki tana fafine pule.
5 Pea neʼe ui e Salai kia Apalamo: “ ʼE ko tau ia hala mo kapau ʼe agakovi feia mai kia au. Neʼe ko au ʼae neʼe au foaki atu taku fafine faifekau, kae ʼi tana iloʼi ʼae kua faitama, neʼe fehiʼa mai leva ia kia au. Ke fakamauʼi e Sehova ia koe pea mo au.” 6 Neʼe ui e Apalamo kia Salai: “Koʼeni, ʼe ko tau fafine faifekau. Fai kia ia te meʼa ʼae ʼe ke manatu ʼe lelei.” Neʼe fakalainoaʼi ai e Salai ia ia, pea neʼe hola mamaʼo ai tana fafine faifekau.
7 Ki muli age, neʼe maʼu leva ia ia e te ʼaselo ʼa Sehova ʼi te matapuna vai ʼae ʼi te toafa, te matapuna vai ʼo te ala ʼae ʼe alu ki Sule.+ 8 Pea neʼe ina ui age: “Akale, fafine faifekau ʼa Salai, ʼe ke haʼu maifea pea ʼe ke alu kifea?” Neʼe ina tali age: “ ʼE au hola mamaʼo mai taku fafine pule ko Salai.” 9 Pea neʼe ui age e te ʼaselo ʼa Sehova: “Toe liliu ki tau fafine pule pea ke ke fakamalalo ifo ʼi ʼona muʼa.” 10 Neʼe hoko atu e te ʼaselo ʼa Sehova: “ ʼE au fakahahaʼi anai tou hakoga pea ʼe liliu anai ʼo kaugamalie ʼaupito, ʼo mole feala ai hona lau.”+ 11 Pea neʼe toe ui age leva e te ʼaselo ʼa Sehova: “Koʼeni kua ke faitama, pea ʼe ke fanauʼi anai he tamasiʼi tagata. ʼE tonu ke ke fakahigoa ko Isemaele,* he neʼe logo ia Sehova ki tau tagi ʼi tou mamahi. 12 ʼE hage anai ko he asino vao.* ʼE fakafeagai anai ki te hahaʼi fuli pea ʼe fakafeagai anai te hahaʼi fuli kia ia. ʼE haga anai tona nofoʼaga ki ʼona tehina fuli.”*
13 Neʼe faikole leva kia* Sehova ʼae neʼe palalau age ki ai. Neʼe ina ui ki te ʼAtua: “Ko koe ʼe ko he ʼAtua ʼe sio kia meʼa fuli,”+ pea neʼe ina toe ui: “Neʼe au sio moʼoni koa ki ʼae ʼe sio mai kia au?” 14 Koia neʼe fakahigoaʼi ai te vai keli ko Peele-lasai-loi.* (ʼE tuʼu ʼi te vaha ʼo Katesi pea mo Peleti.) 15 Neʼe fanauʼi leva e Akale he tamasiʼi tagata, pea neʼe fakahigoaʼi e Apalamo tona foha ko Isemaele.+ 16 Neʼe taʼu 86 ia Apalamo ʼi te temi ʼae neʼe fanauʼi ai e Akale ia Isemaele.