Pesalemo
Ki te pule ʼo te kau faimaholo, ʼo mulimuli ki te Kitite.* Pesalemo ʼa Tavite.
8 Sehova e, siʼomatou ʼAliki, ʼi taulekaleka leva ʼo tou huafa ʼi te kele katoa!
2 ʼUhi ko ʼou fili,
Neʼe ke fakaha tou malohi ʼaki te ʼu palalau ʼa te ʼu tamaliki pea mo te ʼu toe ʼae ʼe kei meamea,+
ʼO fakalogologo ai te fili pea mo ia ʼae ʼe lagavaka.
3 Ka au sio ki te ʼatu lagi, te ʼu gaue ʼo ʼou nima,
Te mahina mo te ʼu fetuʼu ʼae neʼe ke teuteuʼi,+
4 ʼE au ui ai: “Kotea te ʼuhiga ʼo te tagata ke tupu ai hau manatuʼi ia ia,
Mo te foha ʼo te tagata ke tupu ai hau tokaga ki ai?”+
5 Neʼe ke tuku ia ia ke malalo ifo ʼi te kau ʼaselo,
Neʼe ke fakapale ia ia ʼaki te kololia mo te taulekaleka.
6 Neʼe ke fakanofo ia ia ke pule ki te ʼu gaue ʼo ʼou nima.+
Neʼe ke tuku ia meʼa fuli ki ʼona lalo vaʼe:
7 Te faga ovi mo te faga pipi fuli,
ʼO feia mo te ʼu manu ʼo te vao,+
8 Mo te ʼu manulele, mo te ʼu ika ʼo te tai,
Pea mo meʼa fuli ʼae ʼe taka ʼi te ʼu ala ʼo te tai.
9 Sehova e, siʼomatou ʼAliki, ʼi taulekaleka leva ʼo tou huafa ʼi te kele katoa!