Senesi
4 Neʼe momoe leva ia Atama mo Eva tona ʼohoana, pea neʼe faitama.+ ʼI te temi ʼae neʼe ina fanauʼi ai ia Kaino,+ neʼe ina ui: “Neʼe au fanauʼi* he tamasiʼi tagata ʼaki te tokoni ʼa Sehova.” 2 Ki muli age, neʼe ina toe fanauʼi ia Apele,+ te tehina ʼo Kaino.
Neʼe liliu ia Apele ko he tagata tauhi ovi, kae neʼe liliu ia Kaino ko he tagata gaue kele. 3 Hili he temi, neʼe ʼaumai leva e Kaino he ʼu fua ʼo te gaueʼaga ko he molaga kia Sehova. 4 Kae neʼe ʼaumai e Apele he ʼu akeno, ia te ʼu ʼuluaki tupu ʼo tana faga manu,+ ʼo feia mo ʼonatou gako. Neʼe leleiʼia e Sehova ia Apele pea mo tana molaga,+ 5 kae neʼe mole ina leleiʼia ia Kaino pea mo tana molaga. Koia neʼe kovi ʼosi te ita ʼo Kaino pea neʼe matamamalu. 6 Pea neʼe ui e Sehova kia Kaino: “He koʼe ʼe ke ita lahi feia pea mo matamamalu? 7 Kapau ʼe ke fetogi pea mo fai te meʼa ʼae ʼe lelei, ʼe mole ke toe maʼu anai koa la toku ʼofa?* Kae kapau ʼe mole ke fetogi pea mo fai te meʼa ʼae ʼe lelei, ʼe nono te agahala ʼi te muʼa matapa, ʼe ina fia puleʼi ia koe. Kae ʼe ke lava puleʼi anai koa?”
8 Hili ʼaia, neʼe ui e Kaino ki tona tehina ko Apele: “Ta olo muʼa ki te gaueʼaga.” Pea ʼi tanā ʼi te gaueʼaga, neʼe ʼoho ai ia Kaino ki tona tehina ko Apele ʼo ina matehi.+ 9 Ki muli age, neʼe ui e Sehova kia Kaino: “ ʼE ʼifea tou tehina ko Apele?” pea neʼe ina tali age: “ ʼE mole au iloʼi au. ʼE ko au koa te tagata leʼo ʼo toku tehina?” 10 Kae neʼe Ina ui age: “He koʼe neʼe ke fai te faʼahi ʼaia? Koʼeni, ʼe kalaga mai te toto ʼo tou tehina mai te kele kia te au.+ 11 Pea ʼi te temi ʼaeni, ʼe ke malaʼia anai pea ʼe kapu anai koe ʼi te koga meʼa ʼaeni, he neʼe ke fai he ligi toto ʼi tau matehi tou tehina ʼi te kele ʼaeni.+ 12 Ka ke gaueʼi anai te kele, ʼe mole ke maʼu anai tona fua.* ʼE ke taka noa anai ʼi te kele pea mo feholaʼaki.” 13 Pea neʼe ui e Kaino kia Sehova: “ ʼE mole au lava katakiʼi anai toku tuʼā ʼaeni ʼuhi ko te hala ʼae neʼe au fai. 14 ʼE ke kapu au ʼi te ʼaho nei mai te fenua,* pea ʼe au nofo mamaʼo anai mai ia te koe. ʼE au taka noa anai ʼi te kele pea mo feholaʼaki, pea ʼe mahino ia, ka maʼu anai au e he tahi, ʼe ina matehi anai au.” 15 Pea neʼe tali e Sehova kia ia: “Kapau koia ʼaia, ʼe fakatuʼā tuʼa fitu anai ia ia ʼae ka ina matehi ia Kaino.”
Koia neʼe fakatuʼu ai e Sehova he fakailoga ke ʼaua naʼa matehi ia Kaino e he tahi ʼe felaveʼi mo ia. 16 Neʼe alu mamaʼo leva ia Kaino mai ia Sehova ʼo nofo ʼi te fenua ʼo te ʼAunofo,* ʼi tuʼa atu ʼo Eteni+ ʼi te potu esite.
17 Ki muli age, neʼe momoe ia Kaino mo tona ʼohoana.+ Neʼe faitama leva tona ʼohoana pea neʼe ina fanauʼi ia Enoke. Pea neʼe ina laga he kolo ʼo ina fakahigoaʼi ki tona foha ko Enoke. 18 Ki muli age, neʼe tupu ia Ilate, te foha ʼo Enoke. Pea ko Ilate ko te tamai ʼa Mehusaele, ko Mehusaele ko te tamai ʼa Metusaele, pea ko Metusaele ko te tamai ʼa Lameke.
19 Pea neʼe ʼohoana leva ia Lameke mo te ʼu fafine ʼe lua. Neʼe higoa te ʼuluaki ko Ata, pea neʼe higoa te lua ko Tesila. 20 Neʼe fanauʼi leva e Ata ia Sapale. Neʼe ko ia ʼae neʼe ʼuluaki nofo ʼi te ʼu fale la pea mo taupau te faga manu. 21 Neʼe higoa tona tehina ko Supale. Neʼe ko te kui ʼaia ʼo natou ʼae ʼe ta alepa pea mo puhi fagufagu. 22 Pea neʼe fanauʼi e Tesila ia Tupale-kaino, ʼae neʼe ina faʼu te ʼu meʼa gaue kehekehe ʼaki te kapa mo te ukamea. Neʼe higoa te tokolua ʼo Tupale-kaino ko Naama. 23 Neʼe tohi leva e Lameke te ʼu folafola ʼaeni maʼa ʼona ʼohoana ko Ata mo Tesila:
“ ʼU ʼohoana ʼo Lameke, kolua fagono mai ki toku leʼo.
Kolua fakalogo mai ki taku palalau:
Neʼe au matehi he tagata he neʼe au lavea ia ia,
ʼEi, he tama tupulaga he neʼe ina taʼi au.
24 Kapau ʼe fakatuʼā tuʼa 7 anai ia ia ʼae ka ina matehi ia Kaino,+
Pea ʼe fakatuʼā tuʼa 77 anai ia ia ʼae ka ina matehi ia Lameke.”
25 Neʼe toe momoe ia Atama mo tona ʼohoana, pea neʼe ina fanauʼi he tama. Pea neʼe ina fakahigoaʼi ko Seti,*+ he neʼe ina ui: “Neʼe foaki mai e te ʼAtua he tahi age hakoga moʼo fetogi ia Apele, he neʼe matehi ia ia e Kaino.”+ 26 Neʼe ʼi ai foki te foha ʼo Seti, neʼe higoa ko Enosi.+ ʼI te temi ʼaia, neʼe kamata fetapa te hahaʼi ki* te huafa ʼo Sehova.