Numelo
27 Pea neʼe ʼomai te ʼu ʼofafine ʼo Selofati.+ Ko Selofati ko te foha ʼo Hefele, te foha ʼo Kileate, te foha ʼo Makile, te foha ʼo Manase, pea neʼe kau ki te ʼu famili ʼo Manase, te foha ʼo Sosefo. Neʼe higoa ʼona ʼofafine ko Masela, mo Noa, mo Okala, mo Milika pea mo Tilitesa. 2 Neʼe natou tutuʼu ia muʼa ʼo Moisese, mo Eleasale te pelepitelo, mo te kau pule+ pea mo te hahaʼi fuli, ʼi te huʼaga ʼo te fale la ʼo te fono. Pea neʼe natou ui: 3 “Neʼe mate tamatou tamai ʼi te toafa, kae neʼe mole kau ia ki te kutuga ʼae neʼe agatuʼu kia Sehova, ia natou ʼae neʼe lagolago kia Kole.+ Neʼe mate ia ʼo mulimuli pe ki tana agahala kae neʼe mole maʼu hona ʼu foha. 4 He koʼe ʼe puli anai te higoa ʼo tamatou tamai mai tona famili he neʼe mole maʼu hona foha? Foaki mai homatou kele ohage pe ko tau foaki he ʼu kele ki te ʼu tehina ʼo tamatou tamai.” 5 Neʼe fakaha ai e Moisese te aluʼaga ʼaia ia muʼa ʼo Sehova.+
6 Pea neʼe ui leva e Sehova kia Moisese: 7 “ ʼE tonu te meʼa ʼae neʼe ui e te ʼu ʼofafine ʼo Selofati. ʼE tonu ke ke foaki age honatou kele ko honatou tofiʼa ohage pe ko tau foaki he ʼu kele ki te ʼu tehina ʼo tanatou tamai, pea ʼe ke foaki anai kia natou te tofiʼa ʼo tanatou tamai.+ 8 Pea ke ke ui ki te kau Iselaele: ‘Kapau ʼe mate he tagata kae neʼe mole maʼu hona foha, ʼe tonu anai ke kotou foaki tona tofiʼa ki tona ʼofafine. 9 Pea kapau ʼe mole ina maʼu hona ʼofafine, ʼe kotou foaki anai tona tofiʼa ki ʼona tehina. 10 Pea kapau ʼe mole hona ʼu tehina, ʼe kotou foaki anai tona tofiʼa ki te ʼu tehina ʼo tana tamai. 11 Pea kapau ʼe mole he ʼu tehina ʼo tana tamai, ʼe kotou foaki anai tona tofiʼa ki he tahi ʼe nā kaiga totonu, pea ʼe ina maʼu anai te tofiʼa ʼaia. ʼE liliu anai te tonu ʼaia ko he lao maʼa te kau Iselaele, ohage pe ko tona fakatotonu e Sehova kia Moisese.’ ”
12 Pea neʼe ui e Sehova kia Moisese: “Hake ki te moʼuga ʼaeni ʼo Apalimi,+ pea ke ke sio ki te fenua ʼae ʼe au foaki anai ki te kau Iselaele.+ 13 Ka kua ke sio ki te fenua, ʼe tuku fakatahi anai ia koe mo ʼau kui,*+ ohage pe ko tou tehina ko Alone,+ 14 koteʼuhi ʼi te temi ʼae neʼe fakatupu kē mai ai te hahaʼi ʼi te toafa ʼo Tesine, neʼe kolua talagataʼa ki taku fakatotonu, pea neʼe mole kolua fakaha toku maʼoniʼoni ʼi ʼonatou muʼa ʼi te ʼu vai ʼo Melipa,+ ʼi Katesi,+ ʼae ʼi te toafa ʼo Tesine.”+
15 Pea neʼe ui e Moisese kia Sehova: 16 “Sehova e, ia koe ʼae ko te ʼAtua ʼe ina foaki te maʼuli ki te hahaʼi fuli, ke ke fakanofo he tagata ke ina taki te hahaʼi, 17 ʼe hu anai ki tuʼa mo hu anai ki loto ʼi ʼonatou muʼa. Pea ʼe ina taki anai natou ki tuʼa mo fakahu anai natou ki loto, ke mole liliu ai te hahaʼi ʼa Sehova ohage ko ni ovi ʼe mole honatou tagata tauhi ovi.” 18 Neʼe ui ai e Sehova kia Moisese: “Ke ke ʼave ia Sosue, te foha ʼo Nune, ko he tagata ʼe tuha mo te faʼahi ʼaia, pea ke hili ki ai ʼou nima.+ 19 Pea ʼe ke fakatuʼu anai ia muʼa ʼo Eleasale te pelepitelo pea mo te hahaʼi fuli, pea ʼe tonu anai ke ke fakanofo ia ia ke ina takitaki natou.+ 20 ʼE ke tuku anai kia ia te pule,+ ke fakalogo ai te kau Iselaele fuli kia ia, kae ʼe mole ina maʼu katoa anai tau pule.+ 21 ʼE alu anai ʼo tuʼu ia muʼa ʼo Eleasale te pelepitelo, ʼae ka ina fakafehuʼi ia Sehova maʼa ia ʼaki te Ulime, ke iloʼi ai tana tonu.+ Pea ko ia mo te kau Iselaele fuli, ia te hahaʼi katoa, ʼe natou hu anai ki tuʼa peʼe hu anai ki loto moka ʼe fakatotonu age kia natou.”
22 Neʼe mulimuli lelei pe ia Moisese ki te ʼu meʼa fuli ʼae neʼe fakatotonu age e Sehova. Neʼe ina ʼave ai ia Sosue ʼo fakatuʼu ia muʼa ʼo Eleasale te pelepitelo pea mo te hahaʼi fuli, 23 pea neʼe ina hili ki ai ʼona nima ʼo fakanofo ai ke ina takitaki natou,+ ohage pe ko tona fakaha e Sehova ʼaki ia Moisese.+