Numelo

15 Neʼe toe ui e Sehova kia Moisese: 2 “Palalau ki te kau Iselaele pea ke ui age kia natou: ‘Ka kotou hu ki te fenua ʼae ʼe au foaki atu ke kotou nonofo ai,+ 3 pea ka kotou toʼo he manu mai te faga pipi, peʼe ko te faga ovi, peʼe ko te faga tao ʼo momoli ohage ko he molaga ʼe tutu maʼa Sehova pea ko he ʼaele lelei kia Sehova,+ tatau aipe pe ʼe ko he holokoseta,+ peʼe ko he sakilifisio moʼo fakahoko he fakapapau makehe, peʼe ko he molaga ʼe foaki ʼaki he lotolelei,+ peʼe ko he molaga ʼe momoli ʼi te ʼu ʼaho lalahi,+ 4 ʼe tonu anai kia ia ʼae ʼe ina momoli tana molaga ke ina toe momoli kia Sehova he molaga meʼa kai, ko te vahe tahi ki te hogofulu ʼo he efa* falena lelei+ neʼe natu ʼaki te vahe tahi ki te fa ʼo he hine* lolo. 5 ʼE kotou toe momoli anai he molaga vino, ko te vahe tahi ki te fa ʼo he hine vino, fakatahi mo te holokoseta+ peʼe ko te sakilifisio ʼo te ʼu akeno tagata takitahi. 6 Kae kapau ko he ovi tagata, ʼe kotou momoli anai he molaga meʼa kai, ko te vahe lua ki te hogofulu ʼo he fua efa falena lelei ʼe tahi neʼe natu ʼaki te vahe tahi ki te tolu ʼo he hine lolo. 7 Pea ʼe kotou momoli anai he molaga vino, ko te vahe tahi ki te tolu ʼo he hine vino, ke liliu ko he ʼaele lelei kia Sehova.

8 “ ‘Kae kapau ʼe kotou momoli kia Sehova he vitulo ohage ko he holokoseta,+ peʼe ko he sakilifisio moʼo fakahoko he fakapapau makehe,+ peʼe ko he sakilifisio ʼo te tokalelei,+ 9 ʼe kotou toe momoli fakatahi anai te vitulo mo he molaga meʼa kai,+ ko te vahe tolu ki te hogofulu ʼo he fua efa falena lelei ʼe tahi neʼe natu ʼaki te vaelua ʼo he hine lolo. 10 ʼE kotou toe momoli anai he molaga vino,+ ko te vaelua ʼo he hine vino, ohage ko he molaga ʼe tutu maʼa Sehova pea ʼe ko he ʼaele lelei kia te ia. 11 ʼE kotou fai feia anai ki te ʼu vitulo takitahi, peʼe ki te ʼu ovi tagata takitahi, peʼe ki te ʼu akeno tagata takitahi peʼe ki te ʼu tao takitahi. 12 ʼEi, ʼe kotou fai feia anai ki te ʼu manu takitahi, ʼo mulimuli pe ki te lahi ʼo te ʼu manu ʼae ka kotou momoli. 13 ʼE fai feia anai e te kau Iselaele fuli moka natou momoli he molaga ʼe tutu maʼa Sehova pea ʼe ko he ʼaele lelei kia te ia.

14 “ ‘Kapau ʼe nofo he matapule ia koutou peʼe kua fualoa tana nofo ia koutou, pea kapau ʼe tonu ke ina toe momoli he molaga ʼe tutu maʼa Sehova pea ʼe ko he ʼaele lelei kia te ia, ʼe ina fai pe anai ohage ko takotou fai.+ 15 ʼE ko he lao pe anai ʼe tahi kia koutou ʼae ko te kau Iselaele, ʼo feia mo te matapule ʼae ʼe nofo ia koutou. ʼE ko he lao ʼaia mai he taʼiake ki he tahi taʼiake, ʼo talu ai. ʼE hage pe anai te matapule ko koutou, ia muʼa ʼo Sehova.+ 16 ʼE ko he lao pe anai ʼe tahi kia koutou pea mo te matapule ʼae ʼe nofo ia koutou.’ ”

17 Neʼe toe ui e Sehova kia Moisese: 18 “Palalau ki te kau Iselaele pea ke ui age kia natou: ‘Ka kotou hu ki te fenua ʼae ʼe au taki koutou ki ai 19 pea ka kotou kai te pane* ʼo te fenua,+ ʼe kotou foaki anai he meʼa ʼofa kia Sehova. 20 ʼE kotou foaki anai he meʼa ʼofa neʼe toʼo mai takotou ʼuluaki+ falena pea ʼe kotou fai ʼaki anai he ʼu pane takafuafua.* ʼE kotou momoli anai ohage pe ko te meʼa ʼofa ʼae neʼe toʼo mai te hahaʼaga fulumeto. 21 ʼE kotou foaki anai kia Sehova he koga ʼo takotou ʼuluaki falena ohage ko he meʼa ʼofa, mai he taʼiake ki he tahi taʼiake.

22 “ ‘Kapau ʼe kotou fai he lakahala pea ʼe mole kotou mulimuli ki te ʼu fakatotonu fuli ʼae neʼe fakaha e Sehova kia Moisese, 23 ia te ʼu meʼa fuli ʼae neʼe fakatotonu atu e Sehova kia koutou mo ʼokotou taʼiake ki ʼamuli ʼaki ia Moisese, talu mai te ʼaho ʼae neʼe fakaha atu ai e Sehova te ʼu fakatotonu ʼaia kia koutou, 24 pea kapau ʼe kotou fai te lakahala ʼaia kae neʼe mole kotou iloʼi pea neʼe mole iloʼi e te hahaʼi, ʼe tonu anai ke momoli e te hahaʼi katoa he vitulo kei mui ohage ko he holokoseta pea ʼe ko he ʼaele lelei kia Sehova. ʼE natou momoli fakatahi anai te vitulo ʼaia mo te molaga meʼa kai pea mo te molaga vino ʼo mulimuli ki te ʼu fakatotonu ʼo ʼuhiga mo te ʼu holokoseta.+ Pea ʼe natou toe momoli anai mo he tao kei mui ki te molaga ʼo te agahala.+ 25 Ko te meʼa ʼaia ka fai e te pelepitelo ke molehi ai te ʼu agahala ʼa te hahaʼi ʼo Iselaele. ʼE fakamolemole anai tanatou agahala+ he neʼe ko he faihala ia, pea neʼe natou ʼaumai ai he ʼu manu kia muʼa ʼo Sehova ke momoli ohage ko he molaga ʼe tutu maʼa Sehova, ʼo feia mo te molaga ʼo te agahala. Neʼe natou fai te faʼahi ʼaia ʼuhi ko tanatou lakahala. 26 ʼE fakamolemole anai te agahala ʼa te kau Iselaele fuli pea mo te matapule ʼae ʼe nofo ʼi te lotolotoiga ʼo natou, koteʼuhi neʼe natou fai te lakahala kae neʼe mole natou iloʼi.

27 “ ‘Kapau ʼe agahala he tahi kae ʼe mole ina iloʼi, ʼe tonu anai ke ina ʼaumai he tao fafine ʼe taʼu tahi ke momoli ohage ko he molaga ʼo te agahala.+ 28 ʼE momoli anai e te pelepitelo te manu ʼaia ia muʼa ʼo Sehova ke fakamolemole ai te agahala ʼo ia ʼae neʼe agahala kae neʼe mole ina iloʼi. Ko te meʼa ʼaia ka fai e te pelepitelo ke fakamolemole ai tana agahala.+ 29 ʼE ko he lao pe anai ʼe tahi ki te kau Iselaele pea mo te matapule ʼae ʼe nofo ʼi te lotolotoiga ʼo natou mo kapau neʼe ina fai he meʼa kae neʼe mole ina iloʼi.+

30 “ ‘Kae kapau ʼe fai e he tahi he meʼa ʼi tona loto faʼitaliha,+ pe ʼe ko he tagata Iselaele peʼe ko he matapule, ʼe laukovi ia kia Sehova pea ʼe tonu anai ke matehi. 31 ʼE tonu anai ke matehi ia ia ʼaia he ʼe ina meʼa noaʼi te folafola ʼa Sehova pea mo maumauʼi tana fakatotonu.+ ʼE ina utu pe anai te ʼu fua ʼo tana hala.’ ”+

32 ʼI te temi ʼae neʼe nonofo ai te kau Iselaele ʼi te toafa, neʼe maʼu atu he tagata ʼe tae fafie ʼi te ʼaho ʼo te Sapato.+ 33 Pea neʼe ʼave e natou ʼae neʼe natou maʼu atu ia te tagata ʼaia kia Moisese, mo Alone pea mo te hahaʼi fuli. 34 Neʼe puke leva ia ia mo leʼoleʼo+ koteʼuhi neʼe heʼeki tala te meʼa ʼae ʼe tonu ke fai kia ia.

35 Neʼe ui e Sehova kia Moisese: “ ʼE tonu ke matehi te tagata ʼaia+ pea ʼe tuki makaʼi anai ia ia e te hahaʼi fuli ʼi tuʼa atu ʼo te nofoʼaga.”+ 36 Neʼe ʼave leva ia e te hahaʼi ki tuʼa atu ʼo te nofoʼaga pea neʼe natou tuki makaʼi ia ia, ʼo mate ai, ohage pe ko tona fakatotonu e Sehova kia Moisese.

37 Neʼe toe ui e Sehova kia Moisese: 38 “Palalau ki te kau Iselaele pea ke ui age kia natou ke natou fai he tapaʼi kie kua sipisipi ʼi te lalo tapaʼi kofu ʼo ʼonatou kofu pea mo tui he filo ʼuʼui ʼi ʼoluga ʼo te tapaʼi kie ʼaia kua sipisipi.+ ʼE natou fai anai te faʼahi ʼaia mai he taʼiake ki he tahi taʼiake. 39 ‘ ʼE tonu anai ke kotou fai te tapaʼi kie ʼaia kua sipisipi ke feala hakotou sisio ki ai mo kotou manatuʼi te ʼu fakatotonu fuli ʼa Sehova pea mo mulimuli ki ai.+ ʼE mole tonu ke kotou mulimuli ki te ʼu holi ʼo ʼokotou loto mo ʼokotou mata, he ʼe feala ai ke kotou heʼe agatonu ki te ʼAtua.*+ 40 Pea ʼe tokoni atu anai ke kotou manatuʼi pea mo mulimuli ki ʼaku fakatotonu fuli pea ke kotou maʼoniʼoni ki tokotou ʼAtua.+ 41 Ko au ia Sehova tokotou ʼAtua, ʼae neʼe ina fakamavae koutou mai te fenua ʼo Esipito, ke au liliu ai ko tokotou ʼAtua.+ Ko au ia Sehova tokotou ʼAtua.’ ”+