Te ʼu Gaue ʼa Te Kau Apositolo
6 Pea ʼi te temi ʼaia, neʼe tuputupu ʼo kaugamalie te kau tisipulo. Neʼe muhumuhu leva te kau Sutea ʼae neʼe palalau Fakakeleka ki te kau Sutea ʼae neʼe palalau Fakahepeleo, koteʼuhi neʼe mole tokagaʼi ʼanatou vitua ʼi te tufa ʼo te meʼa kai ʼi te ʼaho takitahi.+ 2 Koia neʼe fakatahiʼi e te toko Hogofulu-ma-lua te kau tisipulo fuli pea mo natou ui: “ ʼE mole tonu* ke matou tuku te folafola ʼa te ʼAtua kae matou tokakaga ki te tufa ʼo te meʼa kai.+ 3 Koia, ʼu tehina, kotou filifili ia koutou he ʼu tagata ʼe toko fitu ʼe fakaʼapaʼapaʼi,+ pea mo fonu ʼi te laumalie maʼoniʼoni mo te poto,+ ke matou fakanofo natou ki te gaue ʼaoga ʼaia.+ 4 Kae ʼe matou tokakaga tafito pe anai ki te faikole pea mo te minisitelio ʼo te folafola ʼa te ʼAtua.” 5 Neʼe leleiʼia e te kau tisipulo fuli ia tanatou palalau ʼaia. Neʼe natou filifili leva ia Setefano, te tagata neʼe tui malohi pea fonu ʼi te laumalie maʼoniʼoni, mo Filipo,+ mo Polokole, mo Nikanole, mo Timone, mo Palemenasi pea mo Nikola, te tagata poloselite* mai Atiokia. 6 Neʼe natou taki leva natou ki te kau apositolo. Pea ʼi te ʼosi faikole ʼa te kau apositolo, neʼe natou hili ʼonatou nima ki te ʼu tagata ʼaia neʼe filifili.+
7 Koia, neʼe hoko atu pe te mafola ʼo te folafola ʼa te ʼAtua,+ pea neʼe haga tuputupu ʼo kaugamalie age ia te ʼu tisipulo+ ʼi Selusalemi. Pea neʼe tokolahi te kau pelepitelo ʼae neʼe liliu ʼo tui.+
8 Ko Setefano neʼe fonu ʼi te ʼofa ʼo te ʼAtua pea mo te malohi. Pea neʼe lahi te ʼu meʼa fakaofoofo* pea mo te ʼu milakulo neʼe ina fakahoko ʼi te lotolotoiga ʼo te hahaʼi. 9 Kae neʼe ʼomai ʼihi tagata ʼo te kutuga neʼe higoa ko te Sinakoka ʼo Te Kau ʼAteaina, mo ʼihi hahaʼi mai Silene mo Alesatelia, pea mo ʼihi mai Silisia mo Asia ʼo fakafihiʼi ia Setefano. 10 Kae neʼe mole natou lavaʼi ia tona poto pea mo te laumalie maʼoniʼoni ʼae neʼe ina takitaki ʼana palalau.+ 11 Koia neʼe natou fakalotoʼi fakafufu he ʼu tagata ke natou ui: “Neʼe matou logo ki tana palalau kovi ʼo ʼuhiga mo Moisese pea mo te ʼAtua.” 12 Neʼe natou fakaneke te hahaʼi, mo te kau takitaki Sutea pea mo te kau sekelipa ke natou feʼohofi ʼo puke fakamalohi ia ia, pea mo taki ki te Sanetualio.* 13 Neʼe natou ʼaumai leva ni fakamoʼoni loi ke natou ui: “ ʼE mole tuku e te tagata ʼaeni tana palalau fakafeagai ki te koga meʼa taputapu ʼaeni pea mo te Lao. 14 Ohage la, neʼe matou logo ki tana ui ʼae ko Sesu te tagata Nasaleti, ʼe ina holoʼi anai te fale ʼaeni mo fetogi te ʼu lao ʼae neʼe tuku holo mai e Moisese kia tatou.”
15 Ko natou fuli ʼae neʼe heheka ʼi te Sanetualio neʼe natou sioʼi fakamamaʼu ia Setefano, pea neʼe natou tokagaʼi neʼe hage tona fofoga ko te fofoga ʼo he ʼaselo.