ʼUluaki Koloniko
23 ʼI te kua matuʼa ʼa Tavite pea mo vave mate, neʼe ina fakanofo tona foha ko Salomone ke hau ki Iselaele.+ 2 Neʼe ina fakatahiʼi te kau ʼaliki fuli ʼo Iselaele, mo te kau pelepitelo+ pea mo te kau Levite.+ 3 Neʼe lau leva te kaugamalie ʼo te kau Levite ʼae neʼe taʼu 30 ʼo fai ki ʼoluga.+ Neʼe lau takitahi ia natou, pea neʼe natou toko 38 000. 4 Neʼe kau ia natou ʼaia te toko 24 000 neʼe natou takitaki te gaue ʼo te fale ʼo Sehova, pea ko te toko 6 000 neʼe ko he ʼu pule pea mo he kau tuʼi fakamau,+ 5 pea ko te toko 4 000 neʼe ko he ʼu tagata leʼo matapa+ pea ko te toko 4 000 neʼe natou fakavikiviki+ kia Sehova ʼaki ni meʼa faimaholo, ʼae neʼe ui e Tavite neʼe ina faʼu moʼo vikiʼi te ʼAtua.
6 Neʼe fakatuʼutuʼu* fakakutuga leva natou e Tavite+ ʼo mulimuli ki te ʼu foha ʼo Levi, ʼae ko Kelesoni, mo Keate pea mo Melali.+ 7 Ko te ʼu foha ʼo Kelesoni neʼe ko Laetane pea mo Simei. 8 Ko te ʼu foha ʼo Laetane neʼe ko Sehiele te pule, mo Setame pea mo Soele.+ Neʼe natou toko tolu. 9 Ko te ʼu foha ʼo Simei neʼe ko Selomote, mo Hasiele pea mo Halani. Neʼe natou toko tolu. Neʼe ko te ʼu pule ʼaia ʼo te ʼu famili ʼo Laetane. 10 Pea ko te ʼu foha ʼo Simei neʼe ko Sakate, mo Sina, mo Seuse pea mo Pelia. Neʼe ko te ʼu foha ʼaia ʼe toko fa ʼo Simei. 11 Neʼe ko Sakate te pule, pea mo Sesia te lua. Kae neʼe mole lahi te ʼu foha ʼae neʼe maʼu e Seuse pea mo Pelia, koia neʼe lau ai ia naua ko he foʼi famili ʼe tahi pea neʼe natou tokakaga ki he gaue pe ʼe tahi.
12 Ko te ʼu foha ʼo Keate neʼe ko Amilame, mo Siteseale,+ mo Hepelone pea mo Usiele.+ Neʼe natou toko fa. 13 Ko te ʼu foha ʼo Amilame neʼe ko Alone+ pea mo Moisese.+ Kae neʼe tuku keheʼi tuʼumaʼu pe ia Alone+ ke ina fakamaʼoniʼoniʼi te Potu Taputapu ʼAupito, ʼei, ia ia mo ʼona foha, ke natou momoli ni sakilifisio ia muʼa ʼo Sehova, mo tauhi kia te ia, pea mo tapuakiʼi te hahaʼi ʼi tona huafa.+ 14 Pea neʼe kau te ʼu higoa ʼo te ʼu foha ʼo Moisese, te tagata ʼa te ʼAtua moʼoni, ʼi te telepi ʼo te kau Levite. 15 Ko te ʼu foha ʼo Moisese neʼe ko Kelesomi+ pea mo Eliesele.+ 16 ʼI te ʼu foha ʼo Kelesomi neʼe ko Sepuele+ te pule. 17 ʼI te hologa* ʼo Eliesele, neʼe ko Lesapea+ te pule. Neʼe mole maʼu e Eliesele hona tahi ʼu foha kae neʼe kaugamalie age te ʼu foha ʼo Lesapea. 18 ʼI te ʼu foha ʼo Siteseale,+ neʼe ko Selomita+ te pule. 19 Ko te ʼu foha ʼo Hepelone neʼe ko Selisa te pule, mo Amalia te lua, mo Sakasiele te tolu pea mo Sekameame+ te fa. 20 Ko te ʼu foha ʼo Usiele+ neʼe ko Mikea te pule, pea mo Sisekia te lua.
21 Ko te ʼu foha ʼo Melali neʼe ko Makeli pea mo Musi.+ Ko te ʼu foha ʼo Makeli neʼe ko Eleasale pea mo Kisi. 22 Neʼe mate ia Eleasale kae neʼe mole hona foha, kae neʼe ko ʼona ʼofafine pe. Koia neʼe ʼohoanaʼi leva ia natou e te ʼu foha ʼo Kisi, ʼae ko ʼonatou kaiga.* 23 Ko te ʼu foha ʼo Musi neʼe ko Makeli, mo Etele pea mo Selemote. Neʼe natou toko tolu.
24 Neʼe ko te ʼu foha ʼaia ʼo Levi ʼo mulimuli ki ʼonatou famili pea mo ʼonatou pule famili. Neʼe lau te kaugamalie ʼo te kau Levite ʼae neʼe taʼu 20 ʼo fai ki ʼoluga, pea neʼe tohi ʼonatou higoa ki te gaue ʼae neʼe fai ʼi te fale ʼo Sehova. 25 Koteʼuhi neʼe ui age e Tavite: “Kua foaki e Sehova te ʼAtua ʼo Iselaele ia te tokalelei ki tana hahaʼi,+ pea ʼe nofo anai ʼo talu ai ʼi Selusalemi.+ 26 Koia ʼe mole toe maʼua anai ke feʼaveʼaki e te kau Levite te tapenakulo pea mo te ʼu meʼa gaue kehekehe ʼae ʼe fakaʼaogaʼi ki te tauhi.”+ 27 Koia neʼe lau ai te kaugamalie ʼo te kau Levite ʼae neʼe taʼu 20 ʼo fai ki ʼoluga, ʼo mulimuli ki te ʼu fakatotonu fakamuli ʼae neʼe fai e Tavite. 28 Ko tanatou gaue neʼe ko te tokoni ki te ʼu foha ʼo Alone+ ʼo ʼuhiga mo te fai ʼo te ʼu gaue ʼo te fale ʼo Sehova: Neʼe natou tokakaga ki te ʼu malaʼe,+ mo te ʼu fale kai, mo te fakamaʼoniʼoniʼi ʼo te ʼu meʼa taputapu kehekehe, pea mo fai he gaue pe ʼi te ʼu gaue ʼae neʼe fai ʼi te fale ʼo te ʼAtua moʼoni. 29 Neʼe natou tokakaga ki te ʼu pane ʼae neʼe hili fakatuʼuga,*+ mo te falena lelei ʼae ki te ʼu molaga meʼa kai, mo te ʼu pane hala fakatupu,+ mo te ʼu keke ʼae neʼe fakamoho ʼi te ʼu fakapaku, mo te falena ʼae neʼe natu,+ pea mo te fua ʼo te ʼu meʼa kehekehe. 30 ʼI te uhu fuli+ mo te afiafi fuli, neʼe tonu ke natou fakatahitahi ʼo fakafetaʼi pea mo fakavikiviki kia Sehova.+ 31 Neʼe natou tokoni ki te momoli ʼo te ʼu holokoseta kia Sehova ʼi te ʼu Sapato,+ mo te tuʼu afiafi ʼo te mahina,+ pea lolotoga te ʼu ʼaho lalahi,+ ʼo mulimuli pe ki tona tohi ʼi te lao. Neʼe natou fai tuʼumaʼu pe te ʼu faʼahi ʼaia ia muʼa ʼo Sehova. 32 Neʼe natou toe fakahoko foki mo ʼonatou maʼua ʼae ʼo ʼuhiga mo te fale la ʼo te fono, mo te fale taputapu, pea neʼe natou tokoni ki ʼonatou tehina, te ʼu foha ʼo Alone, ʼo ʼuhiga mo te ʼu gaue ʼae neʼe fai ʼi te fale ʼo Sehova.