Te ʼu Gaue ʼa Te Kau Apositolo

14 ʼI Ikoniome, neʼe nā hu fakatahi ki te sinakoka ʼo te kau Sutea. ʼI te lelei ʼo tanā faiakonaki, neʼe tui leva te hahaʼi tokolahi, Sutea mo Keleka. 2 Kae ko te kau Sutea ʼae neʼe mole tui neʼe natou fakamaveuveu pea mo fakakoviʼi te hahaʼi ʼae neʼe mole Sutea, ke natou fakafeagai ki te ʼu tehina.+ 3 Neʼe nonofo fualoa ʼi ai ia Paulo mo Palenapa, pea neʼe foaki age e Sehova* te malohi ke nā palalau mo he lototoʼa. Neʼe ina fakafealagia age ke nā fakahoko he ʼu milakulo pea mo he ʼu meʼa fakaofoofo* moʼo fakamoʼoni ʼaki te logo ʼae neʼe nā fakamafola, ia te logo ʼo ʼuhiga mo tona ʼofa makehe.+ 4 Kae neʼe vaelua te hahaʼi ʼo te kolo, neʼe kau ʼihi mo te kau Sutea kae kau ʼihi mo te ʼu apositolo. 5 Neʼe faigaʼi e te hahaʼi ʼae neʼe mole Sutea pea mo te kau Sutea mo ʼonatou pule ke natou gaohi koviʼi pea mo taumakaʼi naua.+ 6 ʼI tanā iloʼi te aluʼaga ʼaia, neʼe nā feholaki ai ki te ʼu kolo ʼo Likaoni, ko Lisitia mo Telepe, pea mo te ʼu tafaʼaki.+ 7 Neʼe hoko atu tanā tala ʼi ai te logo lelei.

8 ʼI Lisitia neʼe ʼi ai he tagata neʼe maʼimoa ʼona vaʼe talu mai tana tupu pea neʼe mole lava haʼele. 9 Neʼe heka te tagata ʼaia ʼo fakalogo ki te faiakonaki ʼa Paulo. Neʼe sioʼi fakamamaʼu e Paulo, ʼo ina tokagaʼi ai kua ina maʼu te tui ke feala hona fakamalolo.+ 10 Koia neʼe ina ui leʼo lahi age: “Tuʼu ake.” Neʼe mafuta ake leva te tagata ʼo haʼele.+ 11 ʼI te sisio ʼa te hahaʼi ki te meʼa ʼae neʼe fai e Paulo, neʼe natou kalaga ʼi te lea Fakalikaoni: “Kua liliu te ʼu ʼatua ohage ko he ʼu tagata pea kua natou hihifo mai kia tatou!”+ 12 Pea neʼe natou fakahigoaʼi ia Palenapa ko Seusi,* kae natou fakahigoaʼi ia Paulo ko Helemesi,* koteʼuhi ko ia tafito ʼae neʼe palalau. 13 Pea ko te pelepitelo ʼa te ʼatua ko Seusi, ʼae neʼe tuʼu tona fale lotu ʼi te huʼaga ʼo te kolo, neʼe ina ʼaumai he ʼu vitulo mo he ʼu fihu* ki te ʼu matapa ʼo te kolo. Neʼe loto ia, ʼo feia mo te hahaʼi, ke natou momoli ni sakilifisio.

14 Kae ʼi te logo ʼa te ʼu apositolo ko Palenapa mo Paulo ki te faʼahi ʼaia, neʼe nā hae ʼonā kofu pea nā feleleʼi ki te hahaʼi mo kalaga: 15 “ ʼU tagata, he koʼe ʼe kotou fai te ʼu meʼa ʼaeni? Mo maua foki ko he ʼu tagata pe pea ʼe ʼi ai ʼoma vaivaiʼaga ohage pe ko koutou.+ Pea ʼe ma tala atu te logo lelei, ke kotou maliu mai te ʼu meʼa vaʼiganoa ʼaeni kae ke kotou haga ki te ʼAtua maʼuli, ʼae neʼe ina fakatupu te lagi, mo te kele, mo te tai pea mo te ʼu meʼa fuli ʼae ʼe maʼu ai.+ 16 ʼI te ʼu temi muʼa neʼe ina fakagafua ki te ʼatu puleʼaga fuli ke natou fai te ʼu meʼa ʼae ʼe natou loto ki ai,+ 17 logo la neʼe ina foaki he fakamoʼoni+ ʼo ʼuhiga mo ia ʼi tana fai he ʼu meʼa ʼe lelei, ʼi tana foaki kia koutou mai te lagi te ʼua mo te ʼu temi mahu,+ ʼo foaki atu te meʼa kai ke kotou makokona ai mo fakafiafiaʼi ʼokotou loto.”+ 18 Logo la tanā fai te ʼu palalau ʼaia, kae neʼe faigataʼa tanā taʼofi te hahaʼi ke natou momoli age ni sakilifisio.

19 Kae neʼe tau mai he kau Sutea mai Atiokia mo Ikoniome, ʼo natou fakaneke te hahaʼi+ pea neʼe natou taumakaʼi ai ia Paulo mo toho ki te tuʼa kolo he ʼe ʼi tanatou manatu kua mate ia.+ 20 Kae ʼi tona takatakai e te kau tisipulo, neʼe tuʼu ake ia pea neʼe hu ki te kolo. ʼI te ʼaho ake, neʼe alu mo Palenapa ki Telepe.+ 21 ʼI tanā ʼosi tala te logo lelei ʼi te kolo ʼaia pea mo fai ni tisipulo kaugamalie, neʼe nā toe liliu ki Lisitia, mo Ikoniome pea mo Atiokia. 22 Neʼe nā fakalotomalohiʼi te ʼu tisipulo ʼi ai,+ mo uga natou ke hoko atu pe tanatou tui, ʼo nā ui: “ ʼE lahi te ʼu mamahi ʼe tonu ke tou fakalaka ai ʼi muʼa ʼo tatatou hu ki te Puleʼaga ʼo te ʼAtua.”+ 23 Neʼe nā toe fakanofo mo he ʼu tagata ʼafeā ʼi te ʼu kokelekasio takitahi.+ Neʼe nā faikole pea mo sesunio,+ ʼo nā tuku ai te ʼu tagata ʼafeā ʼaia kia Sehova,* ʼae kua natou tui ki ai.

24 Neʼe nā fakalaka leva ʼi Pisitia ʼo nā olo ki Pafilia.+ 25 Pea ʼi tanā ʼosi tala te folafola ʼi Peleka, neʼe nā hifo ki Atalia. 26 Mai te potu ʼaia, neʼe nā folau vaka leva ki Atiokia. ʼI muʼa atu, ʼi te kolo ʼaia, neʼe kole e te ʼu tehina ki te ʼAtua ke ina fakaha kia naua tona ʼofa makehe, ke nā fai te gaue ʼae kua nā fakahoko katoa ʼi te temi nei.+

27 ʼI tanā kua tau atu ki ai pea mo fakatahitahiʼi te kokelekasio, neʼe nā fakamatala age te ʼu gaue fuli ʼae neʼe fai e te ʼAtua ʼaki ia naua, mo tana fakagafua ki te hahaʼi ʼae ʼe mole Sutea ke natou tui.+ 28 Neʼe nā nonofo fualoa ʼi ai mo te ʼu tisipulo.