Te ʼu Gaue ʼa Te Kau Apositolo
26 Neʼe ui age e Akilipa+ kia Paulo: “Kua gafua tau tali ki te ʼu tukugakovi ʼae ʼe fai kia koe.” Neʼe faoʼi e Paulo tona nima pea neʼe ina ui:
2 “Hau ko Akilipa, ʼe au fiafia ʼi te ʼaho nei ʼi taku tuʼu ʼi ʼou muʼa ʼo tali ki te ʼu tukugakovi fuli ʼae neʼe fai mai e te kau Sutea,+ 3 tafito la he ʼe ke iloʼi lelei te ʼu agaʼi fenua fuli ʼo feia mo te ʼu fihi ʼa te kau Sutea. Koia ʼe au kole atu ke ke kataki ʼo fagono mai.
4 “ ʼE iloʼi lelei e te kau Sutea fuli te faʼahiga maʼuli ʼae neʼe au maʼu talu mai taku kei veliveli ʼi te lotolotoiga ʼo taku hahaʼi* pea mo Selusalemi.+ 5 Ko natou ʼae neʼe malama kia au, ʼe natou iloʼi neʼe au maʼuli ohage ko he Faliseo,+ ʼo mulimuli ki te magaʼi lotu ʼae ʼe faigataʼa ʼona lekula.+ Pea kapau ʼe natou lotolelei ʼe feala ke natou fakamoʼoni ki ai. 6 Kae ʼe fakamauʼi au ʼi te ʼaho nei ʼuhi ko taku ʼamanaki ki te fakahoko ʼo te fakapapau ʼae neʼe fai e te ʼAtua ki ʼatatou kui.+ 7 ʼE ʼamanaki ʼotatou telepi ʼe 12 ke natou sisio ki te fakahoko ʼo te fakapapau ʼaia, ʼo natou foaki fakamalotoloto ai ki te ʼAtua he tauhi taputapu ʼi te ʼaho mo te po. Koia Hau ko Akilipa, neʼe tukugakoviʼi au e te kau Sutea ʼuhi ko te ʼamanaki ʼaia.+
8 “He koʼe ʼe faigataʼa kia koutou takotou tui ʼe fakatuʼuake e te ʼAtua te kau mate? 9 Kia au, neʼe au tui papau neʼe tonu ke au fakahoko he ʼu tuʼuga gaue moʼo fakafeagai ki te huafa ʼo Sesu te tagata Nasaleti. 10 Neʼe ko te faʼahi pe ʼaia ʼae neʼe au fai ʼi Selusalemi, ʼo au pilisoniʼi te tokolahi ʼi te kau maʼoniʼoni,+ he neʼe fakagafua mai e te kau pelepitelo pule.+ Pea neʼe au lagolago ki tonatou matehi. 11 Neʼe au faigaʼi ke natou fakafisi ki tanatou tui ʼaki taku fakatagaʼi liuliuga natou ʼi te ʼu sinakoka fuli. Pea ʼi te kovi ʼo toku ita kia natou, neʼe au fakatagaʼi natou ʼo kaku ki te tahi ʼu kolo.
12 “Neʼe au fai te faʼahi ʼaia, ʼo au fagona ai ki Tamaso ʼaki te fakagafua pea mo te ʼu fakatotonu mai te kau pelepitelo pule. 13 Pea ʼi te ala, ʼi te fetapa, Hau ko Akilipa, neʼe mu mai he malama mai te lagi kia au mo natou ʼae neʼe kaugā fagona mo au, pea neʼe malohi age ʼi te gigila ʼo te laʼa.+ 14 Neʼe matou fetokaʼi fuli. Pea neʼe au logo ki he leʼo neʼe ina ui mai ʼi te Fakahepeleo: ‘Saulo, Saulo, he koʼe ʼe ke fakatagaʼi au? ʼE ke fakamamahiʼi ia koe totonu ʼi tau fakatutuʼu, ohage ko he manu ʼe fakatutuʼu ki te tagata tauhi manu ʼae ʼe ina taki ia ia ʼaki te ʼakau masila.’ 15 Kae neʼe au ui: ‘Ko ai ia koe ʼAliki?’ Pea neʼe tali mai e te ʼAliki: ‘Ko au ia Sesu, ʼae ʼe ke fakatagaʼi. 16 Kae ke ke tuʼu ake. Neʼe au ha atu kia koe, he neʼe au filifili koe. ʼE ke liliu anai ko he tagata faifekau pea mo he fakamoʼoni, moʼo fakamafola te ʼu meʼa ʼae neʼe ke sio ki ai pea mo te ʼu meʼa ʼae ka au fakaha atu anai ʼo ʼuhiga mo au.+ 17 Pea ʼe au haofaki anai koe mai te hahaʼi ʼaeni pea mo te hahaʼi ʼae ʼe mole Sutea, ʼae ʼe au fekauʼi koe ki ai+ 18 ke ava ʼonatou mata,+ ke natou mavae mai te fakapoʼuli+ ki te malama,+ mai te pule ʼa Satana+ ki te ʼAtua, pea ke feala hanatou maʼu te fakamolemole ʼo te ʼu agahala+ pea mo te tofiʼa fakatahi mo natou ʼae neʼe fakamaʼoniʼoniʼi ʼuhi ko tanatou tui kia te au.’
19 “Koia Hau ko Akilipa, neʼe mole au talagataʼa ki te meʼa ʼaia neʼe ha mai mai te lagi, 20 kae neʼe au ʼave te logo, ʼuluaki kia natou ʼae ʼi Tamaso+ pea kia natou leva ʼae ʼi Selusalemi,+ pea ki te ʼu kolo fuli ʼo Sutea, ʼo feia mo te ʼu fenua matapule. Neʼe au fakaha age ʼe tonu ke natou fakahemala pea mo tafoki ki te ʼAtua, ʼo natou fai he ʼu gaue ʼe tuha mo te fakahemala.+ 21 Ko te tupuʼaga la ʼaia ʼo toku puke e te kau Sutea ʼi te fale lotu pea natou faigaʼi ke natou matehi au.+ 22 Kae ʼaki te tokoni ʼa te ʼAtua, ʼe kei hoko atu pe ia ʼaho nei taku fai he fakamoʼoni ki te hahaʼi malalo pea mo natou maʼoluga, ʼo au fakaha pe te ʼu meʼa ʼaeni ʼe tonu ke hoko ʼae neʼe tala e te kau Polofeta pea mo Moisese,+ 23 neʼe tonu ke mamahi ia Kilisito,*+ pea neʼe ʼuluaki fakatuʼuake ia ia mai te kau mate+ ʼo ina fakaha te malama ki te hahaʼi ʼaeni pea mo te hahaʼi ʼae ʼe mole Sutea.”+
24 ʼI te fai e Paulo te ʼu palalau ʼaia, neʼe ui leʼo lahi e Feseto: “ ʼE ke vale, Paulo! Neʼe lahi fau tau ako, koia ʼae kua ke ʼulu vale ai!” 25 Kae neʼe ui e Paulo: “ ʼE mole au ʼulu vale, Kovana Lahi ko Feseto, kae ʼe au fai he ʼu palalau ʼe moʼoni mo fakapotopoto. 26 Pea ko te hau, ʼae ʼe au palalau fakahagatonu ki ai, ʼe ina iloʼi lelei te ʼu meʼa ʼaeni. ʼE au tui papau ʼe mole puli he meʼa kia ia ʼi te ʼu meʼa ʼaeni, he neʼe mole fai fakafufu.+ 27 Hau ko Akilipa, ʼe ke tui koa ki te kau Polofeta? ʼE au iloʼi ʼe ke tui ki ai.” 28 Kae neʼe ui e Akilipa kia Paulo: “Kei toe siʼi pe pea ke fakatafoki au ke au Kilisitiano.” 29 Neʼe ui age leva e Paulo: “Pe ʼe hoko ʼi te temi nei peʼe ki ʼamuli, ʼe au kole ki te ʼAtua, ʼo ʼuhiga mo koe pea mo natou fuli ʼae ʼe fagono mai kia au ʼi te ʼaho nei, ke kotou liliu ko he kau Kilisitiano ohage ko au, gata pe ki te ʼu seini ʼaeni.”
30 Neʼe tuʼu ake ai leva te hau, mo te kovana, mo Pelenise pea mo te ʼu tagata ʼae neʼe heheka fakatahi mo natou. 31 Kae ʼi tanatou mavae, neʼe natou feuiʼaki: “Neʼe mole fai e te tagata ʼaeni he meʼa ʼe tonu ai ke matehi peʼe ke pilisoniʼi.”+ 32 Pea neʼe ui e Akilipa kia Feseto: “Neʼe feala pe ke fakaʼateainaʼi te tagata ʼaeni, mo ka na pau la neʼe mole tagi kia Sesale.”+