Sopo
13 “Neʼe au sio tonu ki te ʼu meʼa fuli ʼaia,
Neʼe au logo tonu ki ai pea mo mahino ki ai.
2 Ko te meʼa ʼae ʼe kotou iloʼi, ʼe au toe iloʼi pe la mo au,
ʼE mole au malalo age au ia koutou.
3 ʼE au fia palalau tonu pe au ki te Mafimafi,
ʼE au fia fakaha ʼaku manatu ki te ʼAtua.+
4 Kae ʼe kotou ʼulihi au ʼaki ni loi,
Ko koutou ko ni toketa ʼe mole hokotou ʼaoga.+
5 Ka na pau la ʼe kotou fakalogologo
ʼE kotou fakaha ai ʼe kotou agapoto.+
6 Fakalelei siʼokotou loto, kotou fakalogo ki ʼaku manatu,
Mo tokagaʼi ʼaku tali.
7 ʼE kotou fai anai koa ni tukugakovi hala ʼi te huafa ʼo te ʼAtua,
Mo palalau kaka maʼa ia?
8 ʼE kotou kau anai koa mo ia?
ʼE kotou lagolago anai koa ki te ʼAtua moʼoni?
9 Kapau ʼe ina sivi koutou, ʼe fua lelei anai koa kia koutou?+
ʼE kotou kakaʼi anai koa ia ia ohage ko he tagata?
10 Kapau ʼe kotou fai fakafufu he aga fakapalatahi,
ʼE ina fakatonutonuʼi moʼoni anai ia koutou.+
11 ʼE mole kotou matataku anai koa ki tona kololia,
Pea ʼe mole ina fakamatakuʼi anai koa ia koutou?
12 ʼE hage ʼakotou palalau poto* ko te lefulefu,
Pea ʼe hage ʼakotou manatu ko ni kaupa kele ʼe maumau gafua.
13 Kotou fakalogologo ke au palalau
Pea ke hoko mai te meʼa ʼae ʼe tonu ke hoko!
14 He koʼe ʼe au tali ke tuʼutamakiʼia toku maʼuli
Mo tuku ke hoko mai he malaʼia?
15 Tatau aipe pe ʼe ina matehi au, ʼe au toe talitali pe anai,+
ʼE au fakaha anai ʼaku manatu kia te ia.
16 ʼE liliu anai ko toku haofakiʼaga,+
He ʼe mole feala ke alu ki te ʼAtua ia te tagata ʼae ʼe mole fakaʼapaʼapa kia te ia.*+
17 Kotou fakalogo lelei ki ʼaku palalau,
Kotou tokagaʼi te meʼa ʼae ʼe au fakaha atu.
18 Kua au tokalelei ki toku fakamau,
ʼE au iloʼi lelei pe ʼe au tonu.
19 Ko ai ʼae ka ina fakafihiʼi au?
Kapau ʼe au nofo fakalogologo, ʼe au mate anai!*
20 ʼAtua e, ko meʼa pe ʼe lua ʼe au kole atu,*
Pea ʼe mole au nono anai ʼi ʼou muʼa:
21 Fakamamaʼo ia au tou nima ʼae ʼe fakatupu mamahi,
Tuku tau fakamatakuʼi au.+
22 Palalau mai pea ʼe au tali atu anai,
Peʼe fakagafua mai muʼa ke au palalau, pea hoki ke tali mai leva.
23 Kotea te ʼu agahala mo te ʼu hala ʼae neʼe au fai?
Fakaha mai muʼa taku talagataʼa mo taku agahala.
25 ʼE ke faiga anai koa ke ke fakamatakuʼi he lau ʼakau ʼe viligia ʼi te matagi?
Peʼe ke tuli anai koa he luna moamoa?
26 ʼE ke tohi tuʼumaʼu ni tukugakovi mamafa ʼo ʼuhiga mo au,
Pea ʼe ke fakatuʼā ia au ʼuhi ko te ʼu agahala ʼae neʼe au fai ʼi toku temi tupulaga.
27 Neʼe ke fakamaʼu ʼoku vaʼe ʼaki ni papa,
ʼE ke sivisivi ʼoku ala fuli,
ʼE ke iloʼi ʼoku lakaʼaga fuli.
28 ʼE hage te tagata* ko he meʼa kua pala,
Ohage ko he teu kua kai e te ʼu kiʼi manu.