Lua Samuele
10 Neʼe mate leva ia te hau ʼo te kau Amone,+ pea neʼe fetogi ia ia e tona foha ko Hanune.+ 2 Neʼe ui e Tavite: “ ʼE au fakaha anai toku ʼofa agatonu kia Hanune te foha ʼo Nakase ohage pe ko te fakaha mai e tana tamai kia au tona ʼofa agatonu.” Koia, neʼe fekauʼi e Tavite tana kau tagata faifekau ke natou olo ʼo fakafimalieʼi ia ia ʼi te kua mate ʼo tana tamai. Kae ʼi te temi ʼae neʼe hu ai te kau tagata faifekau ʼa Tavite ki te fenua ʼo te kau Amone, 3 neʼe ui age e te kau ʼaliki ʼo te kau Amone kia Hanune, tonatou hau: “ ʼE ke manatu koa neʼe fekauʼi mai e Tavite tana kau tagata moʼo fakalotofimalieʼi koe he ʼe ina fia fakaʼapaʼapaʼi tau tamai? Neʼe mole koa la fekauʼi mai e Tavite tana kau tagata faifekau ke natou vakavakaʼi mo sioʼi te kolo, pea ke natou maumauʼi?” 4 Koia, neʼe toʼo ai e Hanune te kau tagata faifekau ʼa Tavite ʼo ina tele te vaelua ʼo ʼonatou kava+ mo tuʼusi ʼonatou kofu ʼi ʼonatou koga loto. Pea neʼe ina tuku leva ke natou olo. 5 ʼI te fakaha age kia Tavite te faʼahi ʼaia, neʼe ina foimo fekauʼi atu aipe he ʼu tagata kia natou, koteʼuhi neʼe natou ufiufi ʼosi. Neʼe ui e te hau kia natou: “Kotou nonofo ʼi Seliko+ ʼo kaku ki te loloa ʼo ʼokotou kava, pea hoki kotou toe liliu mai leva.”
6 Ki muli age, neʼe tokagaʼi leva e te kau Amone tonatou kua fehiʼaʼinaʼi e Tavite. Koia, neʼe fekauʼi ai e te kau Amone he kau tagata ʼave logo ke natou totogi he kau tagata Silia mai Pete-leopi+ pea mo he kau Silia mai Tesopa,+ ia he kau solia neʼe haʼele lalo ʼe toko 20 000, ʼo feia mo te hau ʼo Maaka,+ mo ʼana tagata ʼe toko 1 000 pea mo he ʼu tagata mai Isetope* ʼe toko 12 000.+ 7 ʼI te logo ʼa Tavite ki ai, neʼe ina fekauʼi ia Soape pea mo te foʼi kautau katoa, ʼo kau ai mo ʼana tagata tau malolohi.+ 8 Neʼe ʼomai te kau Amone ʼo fakaʼatu ki te tau ʼi te huʼaga ʼo te matapa ʼo te kolo, kae tutuʼu te kau Silia ʼae mai Tesopa mo Leopi, ʼo feia mo te kau Isetope* pea mo te kau Maaka ʼi te tuʼa kolo.
9 ʼI te sio ʼa Soape ʼe tauʼi ia ia mai muʼa pea mai muli, neʼe ina filifili ai he kau tagata toʼa mai te kautau ʼa Iselaele pea neʼe ina fakaʼatu ke natou tauʼi te kau Silia.+ 10 Neʼe ina tuku leva te toe ʼo te kau tagata ke takitaki e* tona tehina ko Apisai,+ pea ke ina fakaʼatu ke natou tauʼi te kau Amone.+ 11 Pea neʼe ina ui age: “Kapau ʼe malolohi age te kau Silia ia au, pea ʼe ke haʼu anai ʼo haofaki au. Kae kapau ʼe malolohi age te kau Amone ia koe, ʼe au alu atu anai ʼo haofaki koe. 12 ʼE tonu ke tou malolohi mo lototoʼa+ ʼuhi ko tatatou hahaʼi mo te ʼu kolo ʼo totatou ʼAtua, pea ʼe fai anai e Sehova te meʼa ʼae ʼe lelei ki ʼona mata.”+
13 Pea neʼe olo leva ia Soape mo tana kau tagata ʼo tauʼi te kau Silia, kae neʼe natou feholaki.+ 14 ʼI te sisio ʼa te kau Amone ki te kua feholaki ʼa te kau Silia, neʼe natou toe feholaki mo natou ia muʼa ʼo Apisai ʼo hu ki te kolo. Neʼe tuku leva e Soape te kau Amone kae toe liliu ki Selusalemi.
15 ʼI te sisio ʼa te kau Silia ki te kua malo ʼa Iselaele, neʼe natou toe fakatahitahiʼi tanatou kau solia.+ 16 Koia, neʼe pauʼi ai e Atatesele+ te kau Silia ʼae neʼe ʼi te potu fenua ʼo te Vai Tafe.*+ Neʼe natou ʼomai leva ki Elami, pea neʼe takitaki natou e Sopake, te pule ʼo te kautau ʼa Atatesele.
17 Neʼe fakaha age te faʼahi ʼaia kia Tavite. Neʼe ina foimo fakatahiʼi atu aipe ia Iselaele katoa ʼo natou fakalaka ʼi te Solotane ʼo olo ki Elami. Neʼe fakaʼatu leva te kau Silia ke natou tauʼi ia Tavite.+ 18 Kae neʼe feholaki te kau Silia ia muʼa ʼo Iselaele. Neʼe matehi e Tavite te ʼu tagata taki saliote ʼe toko 700 pea mo te ʼu tagata heka hosi Silia ʼe toko 40 000. Neʼe ina toe matehi ʼi ai ia Sopake, te pule ʼo tanatou kautau.+ 19 ʼI te logo ʼa te ʼu hau fuli ʼae ʼe fakalogo kia Atatesele, ki te kua malo ʼa Iselaele, neʼe natou foimo kumi ai te tokalelei mo Iselaele pea neʼe natou fakalogo leva kia natou.+ Pea neʼe matataku leva te kau Silia ʼi te toe tokoni ki te kau Amone.